Ahebreu 3:1-19
3 Nona abali ororomeleya,* mukuweleliwe odhowa wirimu, mmubuwelege ole onimurumelihu ninga murumiwi vina namakutta munddimuwa—Yezu.
2 Iyene omwiwelela Mulugu odduwene wanvahile mabasa aye, dhahene ninga Mizé wamwiwelela mudhidhi wattiddiye mabasa munyumbani ya Mulugu.
3 Vowi, iyene* onowoniwana nttittimiho ninddimuwa ompitta Mizé, sabwani ole ommaga nyumba onovahiwa nttittimiho ninddimuwa opitta nyumbayá.
4 Mwebaribari, nyumba ji nyumba emmagiwa na muttu, mbwenyi ottanddile dhilobo dhotedhene ddi Mulugu.
5 Mizé wali wororomeleya mudhidhi wattiddiye mabasa nyumba yotene ya Mulugu, eji ehivaha onamoona wa esile dhigalogiwe musogorho,
6 mbwenyi Kristu ororomeleya ninga mwana wa ntakulu na Mulugu. Iyo nili ntakulu Naye, bari nigahittiye ologa na nikuluvelo ofiyedha omagomo vina nigahittiye njedhelo nehu, nttuwene ningayelihu.
7 Nona, jijuwene enloga muya wokoddela: “Ddabuno, mugavuruwana lizu naye,
8 kamumihe murima wenyu ninga mudhidhi obule watatamulilenyu owali waye onddimuwa, vamwehilenyu mwiddeddereni.
9 Mwiddeddereni-mwene mpo muddehile azamani enyu mudhidhi waddipambihilani, masiki vonilanivi matikiniho aga mwa vyaka 40.
10 Nona ddisilidhiwana attu a nsaka nttile vina ddihiloga: ‘Mudhidhi wotene awene anokodda mmirimani mwawa esile dhinkosimi vina kanziwa mabasa aga.’
11 Ddihiddubela musilidhiwani mwaga: ‘Awene kanavolowe mumburoni mwaga movuma.’”
12 Porhe-porhe abali, wi vari venyu vanadhe okalavo muttu wa murima wabure vina ohinroromela, amuttiyaga Mulugu oliwo.
13 Mbwenyi, mulibihegena muttu na mukwaye masiku otene, oku baniliwo nsaka ntti ninkuweliwa “Ddabuno,” wi anakalewo mmodha mwa nyuwo onumihe murima waye, adhe owodhiwa na guru ya yottega.
14 Sabwani iyo ninakele dhakakene dhinakele Kristu nigattiddelavi ofiyedha omagomo, nikuluvelo nanihu vamaromo.
15 Dhahene ninga munlogeliwani: “Ddabuno, mugavuruwana lizu naye, kamumihe murima wenyu ninga mudhidhi obule watatamulilenyu owali waye onddimuwa.”
16 Txibarene, bani ewale vano atatamula owali onddimuwa wa Mulugu? Kahiyo otene abale abudduwile mu Ejipitu, asogorheliwaga na Mizé?
17 Ottiya ejivi, Mulugu wasilidhiwe na ani mwa vyaka 40? Kahiyo n’abale attegile, akwa mwiddeddereni?
18 Vina bani àddubeleliye wi kagavolowile mumburoni mwaye movuma? Kahiyo abale ahamwiweleli?
19 Nihona wi awene kawodhile ovolowa mburo waye wovuma, sabwani kaana nroromelo.
