Ahebreu 4:1-16
4 Nona ninga ninohala nipikirhelo nimodha na ovolowa mburo waye wovuma, nikale pasope wila anakalewo muttu mmodha wa nyuwo ohinafwanyelele ovolowamo.
2 Vowi iyo vina nihilaleyeliwa miselu dhapama dhahene ninga awene, vano nzu newalani kanapurelile, vowi kakanile nroromelo noliba dhahene ninga abale ewale.
3 Vano iyo onimuroromela nivolowa mburo waye wovuma, mbwenyi mwaha wa attu ena iyene ohiloga: “Ddihiddubela musilidhiwani mwaga, ‘Awene kanavolowe mumburoni mwaga movuma.’” Masiki mabasa aye bamalile, ovenyana mudhidhi ottanddiliye elabo.
4 Sabwani epaddi modha enloga dhahi mwaha wa siku nanotanu nowili: “Siku nanotanu nowili Mulugu ohivumela mabasa aye otene akosiliye,”
5 enologa vina “Awene kanavolowe mumburoni mwaga movuma.”
6 Nona, ninga anohala ena ahinatti ovolowamo, vina abale alaleyeliwe miselu dhapama voroma, kavolowilemo mwaha wa ohiwelela,
7 iyene ohipimelela siku nimodha dila yanawili mwa ologa “Ddabuno”, Musalmuni wa Davidi mvirele masaka menjene ninga muromoleliwani odhulu, “Ddabuno, mugavuruwana lizu naye, kamumihe murima wenyu.”
8 Vowi kowiliwa Jozuwé wattukuleli mumburoni movuma, vasogorhova Mulugu kagalogile sabwa ya siku nina.
9 Dhahene attu a nlogo na Mulugu ahalana siku nina novuma ninkuweliwa sabuddu.
10 Sabwani muttu ovolowile mumburoni movuma mwa Mulugu ovumela vina mabasa aye dhahene ninga Mulugu ovumelile mabasa aye.
11 Nona nikoseni guru yotene wila nivoloweni mumburoni mwaye movuma, wi ahikalewo muttu onfwara yeddelo yakakene yohiwelela.
12 Sabwani nzu na Mulugu tta egumi vina nikaana owodha, ninowiva opitta supadda ningwadda oku-n’oku, ninovolowa ofiyedha ogawa egumi* na muya;* ninogawa mpule mungumana makuva na mwari mwa makuvayá, vina ninowodha woniha dhubuwelo na esile dhinfuna murima.
13 Kayiwo elo ettanddile Mulugu ehinoniye mbwenyi dhotedhene dhili nyimwa vina dhinowoneya vamentoni va Ole onanittonge.
14 Vowi nikaana namakutta munddimuwa ovolowile wirimu, Yezu Mwana Mulugu, nidhowegevi nilogaga mwaha wa omuroromela wehu iyene.
15 Sabwani kaninna namakutta munddimuwa ohinwodha ononelamo mikalelo dhehu, mbwenyi iyene ohehiwa mwa mikalelo dhotedhene dhahene ninga iyo, masiki vahaniyena yottega.
16 Nona na nroromelo* ndhoweni nisusele vampaddoni va mahala a Mulugu wi nakele ttagaraga yaye vina nifwanye mahala a Mulugu wila anikamihedhe vansakaniva.