Ahebreu 6:1-20
6 Ovano, vamalilehu ottiya masunziho oroma mwaha wa Kristu, ndhowegeni vasogorho wila nikaane nroromelo noliba, nihiyelelaga masunziho ehu oroma, kuloga otxinuwa mwa merelo ehu abure na omuroromela Mulugu,
2 masunziho anloga mwaha wa obatiziwa, otapuleliwa mada, ovenyihiwa mukwani wa abale akwile na ottongiwa wa mukalakala.
3 Esidhá ninele okosa Mulugu aganirumeliha.
4 Attu ena àkodda masunziho ebaribari vina kawo muttu onwodha wakamihedha orugunutxa mirima dhawa, awene anonihedhiwamo, aheha mivaho dha wirimu, ahakela muya wokoddela
5 ahakela nzu napama na Mulugu, na guru dha elabo endhawo.*
6 Nona kinwodheya wakamihedha sabwani awene amukomela dila yanawili Mwana Mulugu vapingirhizini vina anomukosiha oveyihiwa na attu enji,
7 sabwani mattaka anowakela maruriho a Mulugu venevo vanrubweliwani muzogwe mudhidhi na mudhidhi, ngamala anobala milima dhinapurihamo abale anlima.
8 Mbwenyi agabala minga na makupu a minga anonyanyaliwa, anogwihedhiwa ntowa vina omagomelowa anoddumeyiwa.
9 Nona abali okweleya, masiki nilogaga dhahene, ninokuluvela dhilobo dhattima mwa mpaddi wenyu, dhilobo dhiniwanana na ovuneya.
10 Txibarene Mulugu ddoligana, iyene kanadduwale mabasa enyu na okwela wenyu nzina naye mwa walabela akoddeli vina mwa odhowavi mwalabelaga.
11 Mbwenyi ninfuna wi muttu ddi muttu wa nyuwo adidelevi mmabasani mwaye wila akaane ebaribari ya njedhelo ofiyedha omagomo,
12 wila muhikale awara mbwenyi mwatagihe abale anakela esile dhipikirheliwe sabwa ya nroromelo nawa vina ovilela wawa.
13 Sabwani Mulugu mmukoseliye nipikirhelo naye Abrahamu, oviddubelele iyenene mwinya vowi kawo mwina oli munddimuwa ompitta iyene.
14 Iyene ohiloga: “Txibarene ddinele oururiha vina ddinele wenjedha ziza nawo.”
15 Nona Abrahamu mmaleliye ojedha na ovilela ohakela nipikirhelo ntti.
16 Sabwani attu anoddubela amuromolaga muttu munddimuwa vina oddubela oko onogomiha wakulana wotene, vowi awene anona ninga ebaribari.
17 Yakakene, muganeli Mulugu wawoniha mowakwana-mwene abale anhalana dhopikirhela wi yofuna yaye kintxinjeya, iyene ohakuluveliha mwa oddubela,
18 wi mwa dhilobo esi bili dhihintxinjeya oku niziwaga wila kinwodheya Mulugu ozivala, iyo ottawele mumburoni mottawela, nakele nipangarhazo noliba wila nittiddelevi njedhelo nivahiwehu.
19 Nikaana njedhelo ntti ninga nangura wa egumi yehu, ninnikaliha woliba vina nihovaga elo; njedhelo ntto ninonidhowiha mwari mwa kurtina na mumparhani,
20 mwenemo muvolowile Yezu wila anifugulele dila, iyene okala namakutta munddimuwa okala n’okala-wene n’ekalelo ya Melkizedeki.
Manota
^ Obe, “masaka a musogorho.” Kang’ana Mazu Atapuleliwe.
