Ahebreu 7:1-28
7 Sabwani Melkizedeki oddo mwene w’o Salém vina namakutta wa Mulugu Namadhulu-dhulu, odhowa ogumana na Abrahamu, mudhidhi weyela Abrahamu wadhowiliye oraba koddo, àpawo amwene ena, vina ohimururiha,
2 vina Abrahamu ohinvaha nekumi wa dhotedhene. Voroma-vene, nzina naye nintapulela “Mwene Woligana,” ottiya ejo, iyene mwene w’o Salém, entapulela “Mwene wa Murenddele.”
3 Iyene kanna babe, kanna maye, kanna ziza vina kaninziweya siku nibaliwiye nne vina siku nikwiliye, mbwenyi iyene ohiliganihiwa na Mwana Mulugu, nona namakutta okala n’okala-wene.
4 Moone nttittimiho na mulobwana oddu, ofiyedha Abrahamu muzamani wehu onvaha nekumi wa dhottapatta dhaye, dhattimadhá.
5 Ebaribari wi ninga munlogela Nlamulo, abale ali ana a Levi anakela mabasa a onamakutta, anomulogosa nekumi wa nlogo, kuloga wa abalawa, masiki aweneyá akalaga a ziza na Abrahamu.
6 Mulobwana oddo wahali wa ziza na Levi, omwakela nekumi wa Abrahamu vina omururiha ole wakoseliwe mapikirhelo.
7 Attu anoziwa wi ole onruriha munddimuwa ompitta ole onakela nrurihona.
8 Akadda Levi animwakela nekumi, attu ankwa, mbwenyi malebo anloga wi muttu mwina onimwakela nekumi kankwa.
9 Enologiwa vina wi mwaha wa Abrahamu ompitxa nekumi, akadda Levi animwakela nekumi, ahimpitxa vina nekumi,
10 sabwani Levi wali ahinatti obaliwa vagumanile muzamani waye na Melkizedeki.
11 Akala yanwodheya ofwanya oligana mwaha wa onamakutta wa akadda Levi, (sabwani eji yali ekalelo ya Nlamulo navahiwe nlogo), ki egakaleleni vina yofuneya okalawo namakutta mwina, odduwene onlogiwa ninga Melkizedeki, ottiya ninga Aroni?
12 Sabwani ogasadduliwa onamakutta, enofuneya vina osadduliwa Nlamulo.
13 Sabwani mulobwana onlogiwana dhilobo esi, ddwa ziza nina nihinrumelihiwa olaba vebuwani.
14 Enoziweya wi Nabuya wehu wali wa nlogo na Judá, mbwenyi Mizé kalogile elo-wene yawi anamakutta anadhe muzizani na Judá.
15 Ejo yoneyile-wene mudhidhi odhile namakutta mwina oli ninga Melkizedeki,
16 iyene okala namakutta, kahiyo sabwa yawi odhile muzizani dhahene ninga enruma nlamulo, mbwenyi sabwa ya owodha wa egumi ehintolowa.
17 Nona, yoleba modha enloga dhahi mwaha wa iyene: “Weyo oli namakutta namukalakala ninga Melkizedeki.”
18 Dhahene, yoruma yoroma ehifudhiwa sabwani jawobana vina kinwodha onikamihedha.
19 Nlamulo kanikosihile elo-wene okala yowakwana, mbwenyi ejile enivahile Mulugu joligana vina jinkuluvelihu. Ejuwene jinkosiha dhotedhene okala dhowakwana vina enoniwodhiha omwaddamela Mulugu.
20 Sabwani Mulugu oddubela mudhidhi omuttomiliye Yezu ninga namakutta
21 (ebaribari wi akalawo attu akalile anamakutta ahiddubeleliwe na Mulugu, mbwenyi oddu okalile namakutta mwaha wa Mulugu omuddubelile alogaga dhahi: “Yehova oddubela vina kaneyelele mundduni, ‘Weyo oli namakutta namukalakala’”),
22 Yezu okala nikuluveliho na nipagano nina namakamaka.
23 Ottiya ejo, yanfuneya anamakutta enji okala vamburoni va akwawa, sabwani okwa wanabarela odhowanavi mabasa awa,
24 vano, vowi Yezu kankwa kavanfuneya anamakutta ena wi ahalena onamakutta waye.
25 Dhahene, iyene onowodha wavuna mowakwana-mwene abale animususela Mulugu mwaha waye, sabwani iyene onokalawovi wila àlogele wa Mulugu.
26 Vowi jofwanyelela iyo okaana namakutta munddimuwa ninga odduwene wororomeleya, ohinna muladdu, ohinna yotakala, ottiyanihiwe na attegi vina ottukuleliwe wirimu okwaranya odhulu.
27 Mottiyana na anamakutta abale, kili yofuneya iyene operheka mikutto siku na siku, voroma mukutto wa dhottega dhaye, ngamala mukutto wa dhottega dha nlogo, sabwani iyene operheka mukutto dila modha bahi, mwa oviperheka iyenene mwinya.
28 Attu anttomiwa na Nlamulo ninga anamakutta anddimuwa akaana dhowobana dhawa, mbwenyi nzu na oddubela wa Mulugu nikosiwe mmalile witiwa Nlamulo, ninomuttoma Mwana wakwanihiwe mwa dhotedhene okala n’okala-wene.
