Ahebreu 8:1-13
8 Aba ba makani manddimuwayá anlogihu: Iyo nikaana namakutta munddimuwa ninga oddu, iyene ogilati omononi woja wa Mulugu wirimu,
2 iyene murumiwi wa mburo wokoddela vina wa musasa webaribari, omagiwe na Yehova, ottiya na attu.
3 Sabwani wotene ole onttomiwa ninga namakutta munddimuwa, onofuniwana operheka mivaho na mikutto. Nona yanfuneya wi namakutta munddimuwa oddo vina akaane yoperheka.
4 Iyene kokala velaboni ya vati, kagali namakutta, sabwani ahikalawo attu amperheka mivaho afwaraga Nlamulo.
5 Attu abo anokosa mabasa okoddela ninga esanzo, enoniha esile dhili wirimu, dhahene ninga mutonyihedhiwe Mizé na Mulugu afunaga omaga musasa: Vowi Iyene ohiloga: “Okale pasope wi okose dhotedhene ofwaraga yotagiha elagihiwe weyo mudhidhi waliwe vamwangoni.”
6 Mbwenyi Yezu ottomeliwa mabasa opitta okala apama, wapitta anamakutta ena, sabwani iyene vina namalogela wa nipagano napamana.
7 Kowiliwa nipagano noroma kanaviriganile, kigali yofuneya okalawo nina nanawili.
8 Sabwani iyene ohona ovirigana wa nlogo, nona aloga: “‘Moone! Anofiya malabo,’ onloga ddi Yehova, ‘anakose miyo nipagano niswa na nlogo na Izrayel vina na nlogo na Judá.
9 Kaninakale ninga nipagano nttile nikosilemi na azamani awa siku nattiddilemi mono wila ddaburutxe mwilaboni ya Ejipitu, sabwani awene keddilenavi nipagano naga, nona ddittiya watanala,’ onloga ddi Yehova.
10 “‘Nipagano ninakose miyo na nlogo na Izrayel masiku abo agavira,’ ttintti: ‘Ddinele wika malamulo aga muyubuweloni mwawa, vina ddinele oleba mmirimani mwawa. Miyo ddinele okala Mulugu wawa, awene anele okala nlogo naga, onloga ddi Yehova.
11 “‘Vina kawo muttu onamusunzihe mukwaye wa elabo yakakene nne mbalaye, alogaga: “Omuziwe Yehova!” Sabwani otene anele oddiziwa, oromana mwana ofiyedha munddimuwa.
12 Vowi ddinele weddela ttagaraga merelo awa ohiligana vina kaddinobuwele vina dhottega dhawa.’”
13 Mwa ologa “nipagano niswa,” iyene ohigomiha nawale. Sabwani ejile egomihiwe vina yuluvalile ehalile vang’onovi wila erimele.
