Ahebreu 9:1-28
9 Nipagano nawale nahikana malamulo afwara namakutta mudhidhi wamulabeliye Mulugu, mburo wokoddela velaboni ya vati.
2 Musasa obule woroma wanna dhipaddi bili, epaddi yoroma wakala panti enddimuwa, meza na pawu dhaperhekeliwa Mulugu, mburo obo wakuweliwa Mburo Wokoddela.
3 Vano okodde wa kurtina nanawili, wahikala mburo wa musasa wakuweliwa Mburo Wokoddela-koddela.
4 Kuwenewo wali ebuwa ya woru vaddumeyiwa lubani, yobo ya nipagano yobiwe na woru mwali jaru ya woru mwakoyiwe maná, mukonkozo wa Aroni wasorhile folori na tabwa bili dha malugu valebiwe nipagano;
5 vina vadhuluva vahikala akerubi akunela tampa ya yobo ya nipagano na makapwa awa. Ovano, obu kahiyo mudhidhi wa ologa esidhá modha-modha.
6 Nomala dhilobo esi omagiwa dhahene, anamakutta anovolowa mburo woroma wa musasa malabo otene wila amuttiddele mabasa awa Mulugu.
7 Mbwenyi mburo wanawili onvolowawo ddi namakutta munddimuwa bahi dila modha vayakani na nikami nimperhekiye mwaha wa dhottega dhaye na dhottega dha nlogo dhinkosani ahiziwaga.
8 Dhahene muya wokoddela onononihedhamo wi dila yovolowana mburo wokoddela yali ehinatti wonihiwa, oku musasa woroma buliwo.
9 Musasa obu ezinddiyelo ya esile dhinkosiwa masaka abano, afwariwaga masasanyedho aba, dhinoperhekiwa mivaho na mikutto. Mbwenyi esodhá kadhinwodha okoddeliha mowakwana mubuwelo * wa muttu onimuttiddela mabasa Mulugu.
10 Mivaho esi na mikuttodha, dhiniwanana na dhoja, dhomwa na mattanga ottiyana-ttiyana ovikoddeliha. * Sisene dhafuneya munlamuloni na Mizé mwaha wa maningo; dheteliwe wila dhotedhene dhikale dhomyala mudhidhi ogafiya.
11 Vano mudhele Kristu, ninga namakutta munddimuwa wa dhilobo dhapama dhipadduwile, iyene ovolowa mmusasani munddimuwa vina w’oligana ohisasanyiwe na mada a attu vina ohili wa vati apano.
12 Iyene ovolowa mburo w’okoddela, vano kavolowilewo na nikami na mbuzi dhapogo, nne na ana-ng’ombe, mbwenyi na nikami naye-nene, okosile ejoyá dila modha bahi vina ohinifurula namukalakala.
13 Vowi akala nikami na mbuzi dhapogo, na ana-ng’ombe a pogo vina munddura wa mwana-ng’ombe nasigihiwa abale akwarulile nankoddeliha maningo awa,
14 nikami na Kristu nihinna yovirigana niperhekeliwe Mulugu na muya wamukalakala, nikaana ttima enddimuwa vina ninonikoddeliha mmereloni a maningo ehu, a mubuwelo wehu wila nimuttiddele mabasa Mulugu oliwo.
15 Nona, iyene mulogeli wa nipagano niswa wila abale akuweliwe, akele dhohalana dhipikirheliwani okala n’okala-wene, vowi okalawo muttu wakwelile wila afuruliwe na yobolo mwaha wa ottegela nipagano nawale.
16 Vowi, vankosiwa nipagano muttu na Mulugu, enofuneya wi ole onimelela nipaganona akwe,
17 sabwani nipagano ninlaba muttuya agakwa, mbwenyi akala muttuya wemeleli okalawovi, nipaganona kaninlaba.
18 Sabwani, nipagano nawale naromile olaba na nikami.
19 Mmalele Mizé wawaddela attu otene dhotedhene dhinruma Nlamulo, iyene ottukula nikami na ana-ng’ombe, na mbuzi dha pogo vina manje, ottukula moya wofila omagelela omuruni wa hisopo, obwiniha munikamini, owazela nivuru na nipagano vina ohawazela attu a nlogo,
20 alogaga dhahi: “Ntti tti nikami na nipagano nurumileni Mulugu wiwelela.”
21 Iyene vina owazela nikamina musasa vina dhobo dhotedhene dhattiddiwana mabasa a Mulugu.
22 Ndde, ninga munlogela Nlamulo, dhilobo dhotedhene dhinkoddelihiwa na nikami, nona nigahikuttuliwe nikami kinwodheya oleveleliwa dhottega.
23 Ninga ezinddiyelo ya dhilobo dha wirimu, dhinofwanyela okoddelihiwa dhahene; mbwenyi esile dhili dha wirimu dhinofuna mukutto munddimuwa opitta obu.
24 Vano, Kristu kavolowile mburo wokoddela osasanyiwe na mada a attu, obuwene oli ezinddiyelo ya mburo wokoddela, webaribari, mbwenyi iyene ovolowile wirimu okuwene oliye vamentoni va Mulugu animelelagawo iyo.
25 Yafuneya kiyali ya iyene oviperhekaga dila dhinjidhene, dhahene ninga munkosela namakutta munddimuwa onvolowa yaka-yaka mburo wokoddela na nikami nihili naye.
26 Kokala dhawene, egafuneya Kristu wonagavi goyi ovenyana mpaddutxeliwe elabo. Mbwenyi iyene oviperheka dila modha bahi masiku abano omariha, wi attimihe yottega na oviperheka waye ninga mukutto.
27 Yakakene vina ninga muttu onkwa dila modha bahi, ngamala battongiwa,
28 dhahene vina Kristu operhekiwe dila modha bahi, wila agomihe dhottega dha enjene vina ageyela dila yanawili kaneyelele yottega, vano onele woniwa na attu enjene animujedha na murima wotene wila avuniwe.
