Akadda Filipi 1:1-30
1 Paulo na Timóteo, arumiwi a Kristu Yezu, ninowalebela akoddeli otene o Filipo ali mumodhani na Kristu Yezu, anddimuwa a mulogo vamodha na adhari okamihedha:
2 Mulugu Babihu vina wa Nabuya Yezu Kristu auvaheni mahala aye na murenddele.
3 Mudhidhi wotene onuwubuwelani miyo, ddinomutamalela Mulugu waga
4 mmalobeloni mwaga anukoselani miyo na ntidi, nyuwo motene. Ddinokosa malobeloyá na murima wohagalala,
5 mwaha wa okamihedha wenyu* odhowana vasogorho miselu dhapama, ovenyana siku noroma ofiyedha ddabuno.
6 Ddinokuluvela wi Mulugu, odduwene oromile mabasa a pama mwa nyuwo, onele opuliha ofiyedha siku na Kristu Yezu.
7 Japama miyo wubuwela dhahene mwaha wenyu, vowi miyo ddinoukwelani nyuwo motene na murima waga, nyuwo mwakelile mahala a Mulugu, vamodha na miyo oli mukambura, oku ddilabihedhaga nlamulo wila ddikane ofuru wa olaleya miselu dhapama.
8 Mulugu onoziwa wi ddinonukeliwa na nyuwo motene, miyo ddinoukwelani venjene, dhahene ninga munkosela Kristu Yezu.
9 Nona, miyo ddinomulobavi Mulugu wila okwela wenyu wunuwegevi na eziwelo ya ebaribari vina na ononelamo;
10 wila nyuwo mutamelege esile dhili dhamakamakadha* wi muhikane muladdu vina muhakwakwattutxe ena ofiyedha siku na Kristu;
11 mukamihedhiwaga na Yezu Kristu, munodhala milima dha oligana, wila Mulugu avuwihiwe vina attittimihiwe.
12 Abalaga, ddinfuna muziwe yawi esi dhinddipadduwela ovanene, dhinokamihedha wunuwa wa olaleyiwa miselu dhapama;
13 nona, ofugeliwa waga mwaha wa Kristu, ohiziweya na Ang’aneli otene a Mwene w’o Roma vamodha na attu otene.
14 Ovano abali enjene mwa Nabuya ahilibiha murima wawa mwaha wa ofugeliwa waga vina anolagihavi oliba wawa murima vopitta alaleyaga mazu a Mulugu ahovaga elo.
15 Ebaribari wi ena anomulaleya Kristu na nrima, atamelaga mavurhano, mbwenyi ena anomulaleya na efunelo yapama.
16 Abale animulaleya Kristu na efunelo yapama, ankosela mwaha wa omukwela, vowi anoziwa wi miyo ddisakuleliwe obarela miselu dhapama.
17 Mbwenyi, abale animulaleya mwaha wa nrima vina antamela ovurhana, kankosa na efunelo yapama, vowi awene antamela odditotela makattamiho miyo, oku baddili mukambura.
18 Yodhelavoya jivi? Attu anolaleyeliwa miselu mwaha wa Kristu, masiki akala anlaleyeliwa n’efunelo yapama obe nne. N’ejo ddinoziveliwa, vina ddinodhowa ddiziveliwagavi,
19 vowi ddinoziwa wi yodhelavoyá enakale ovuneya waga mwaha wa malobelo ankosinyu na ntidi, vina ddikamihedhiwaga na muya wa Yezu Kristu.
20 Miyo ddikaana nikuluvelo, vina ddinojedhela wi kaddinakane manyazo na elo-wene; mwa olaleya ddihovaga elo, Kristu onele ottittimiheya mmanigoni mwaga ovanene ninga munttittimihedhiwiye, masiki ddikalewo obe ddikwe.
21 Miyo ddinona dhahi, ddigakalawo, ddinimukalelawo Kristu, mbwenyi ddigakwa ddinokana yopurelamo.
22 Vano ddigakalagawo na maningo aga a omuttu, eji enele oddiwodhiha omulabela venjene Kristu; vano kaddinziwiha yosakula yaga.
23 Miyo ddili wogaweya na dhosakula esi bili, vowi ddinofuna okwa wila ddakale vamodha na Kristu, eji jilitxi yamakamakayá.
24 Mbwenyi mwaha wenyu, jofuneya miyo okalawovi.
25 Bili dhawene, ddinona wi ddinele okalawovi wila munuwihe mabasa animuttiddelinyu Mulugu, vina muttabe mwaha wa nroromelo nenyu,
26 dhahene, ddigakala na nyuwo dila yanawili ottaba wenyu onele winjiva mwaha wa onfwara Yezu Kristu.
27 Enfunemi bahi, ja nyuwo okalawo n’ekalelo enoniha wi muhilaleyeliwa miselu dhapama mwaha wa Kristu, peno akala ddinodha ouwonaniwo obe kaddindhawo, nyuwo munele okalavi olibene, munokana yubuwelo modhene,* munowiwanana vina munelege olaba mumodhani wila muroromelegevi miselu dhapama,
28 muhovaga elo enuwirelani amwiddani enyu, ejo enowoniha wi attu abo anele otolotxiwa, mbwenyi nyuwo munele ovuniwa; esi dhotene dhindha wa Mulugu.
29 Nyuwo kamwakelile bahi gari ya omuroromela Kristu, muhakela vina gari ya otabuwa mwaha waye.
30 Nyuwo mufwanyiwa makattamiho akakene anna miyo, vina abuwene anavi miyo, ofiyedha ddabuno.
Manota
^ Obe, “mwaha wa ovilibihedha wenyu.”
^ Obe, “dhinna ttima enddimuwa.”
^ Na egregu, “muya mmodha.”
