Akadda Filipi 2:1-30
2 Akala munowalibiha ena mumodhani na Kristu, vina munowapangarhaza mwaha wowakwela, akala munowawubuwela ena na okwela vina munowaweddela ttagaraga,
2 muddittabihege monihaga wi munna yubuwelo modhene, okwelana wakene, mwiwananege, mukane murima mmodha.
3 Muhikose elobo-txilobo na mavurhano nne na ovittukulela, mbwenyi na oviyeviha muttu-muttu awonegena akwaye onddimuwa ompitta waye,
4 muhitamelaga dhinupurihani nyuwo bahi, mbwenyi mutamelege vina dhinapuriha ena.
5 Mukane yubuwelo na mweddelo wakakene wanna Yezu,
6 masiki iyene walivi n’ekalelo ya Mulugu, kobuwelile otamela okala ninga Mulugu.
7 Iyene ohileva dhotene dhaniyena, orumela okala mudhari vina okala muttu.
8 Ottiya ejo, mbaleliwiye ohiviyeviha, ohiwelela mpaka orumela okwa; ndde, okwa vapingirhizini.
9 Sabwa ya ejuwene, Mulugu ohimuttukuwiha na ettomo enddimuwa vina n’opama waye, ohinvaha nzina nimpitta mazina otene,
10 wila otene amukokorele* Yezu—akale abale ali wirimu, ali elabo ya vati vina abale ali vati va mattaka,*—
11 attu otene anonelemo wi Yezu Kristu ddi Nabuya, wila attittimihiwe Mulugu Baba.
12 Abali na arogora okweleya, mudhidhi wotene walimi na nyuwo mwanniwelela, ovano vahilimi na nyuwo mwiwelelegevi vopitta, n’ekalelo yakakene muttu ddi muttu wa nyuwo alabe na guru na wova wila afwanye ovuneya.
13 Mulugu ddinulibihani vina iyene onouvahani efunelo na owodha wa wirana mabasa sabwani iyene onofuna okosa ejoyá.
14 Mukosege dhotedhene muhabagana vina muhipambihagana,
15 wila mukale attu ahinna yosumuleliwana nne muladdu, mukale ana okoddela a Mulugu vari va attu otakala murima vina ohiwananeyana, oku nyuwo mung’animelaga vari vawa ninga txeza ya mwilaboni,
16 muttiddele deretu nzu na egumi, dhawene ddinele okaana mwaha wa ogaya siku na Kristu, mwa oziwa wila kaddittamagele ebewene, nne vina kaddittiddile mabasa ebewene.
17 Mbwenyi, masiki ddikuttuliwaga ninga mukutto wa mvaho wa vinyu, wila ddikamihedhe mabasa a Mulugu ddinohagalala venjene vamodha na nyuwo vowi nroromelo nenyu ninouttukulelani okosa elobo yakakene.
18 N’ekalelo yakakene, nyuwo vina muhagalale, agalalaní vina vamodha na miyo.
19 Ddinojedhela mwa Nabuya Yezu ourumelani Timóteo momaguva wila miyo ddilibiheye ddigakela miselu dhenyu.
20 Kaddinna muttu mwina oniviperheka dhahene, iyene onele wukamihedhani venjene.
21 Sabwani ena anzuzumela dhawa, ottiya dha Yezu Kristu.
22 Nyuwo munoziwa pama wi iyene ohiviperhekela ottidda mabasa vamodha na miyo, alaleyaga miselu dhapama, dhahene ninga mwana onttidda mabasa vamodha na babe.
23 Nona, ddi iyene onaurumeleni miyo, ddigaziwa enfuna oddipadduwela.
24 Mbwenyi, ddinokuluvela mwa Nabuya wi miyo vina ddinele odha mohigonela.
25 Ovano ddinona wi japama ourumelani Epafrodito, mbalaga onlabimina vamodha vina oli munyakoddo wa Kristu vamodha na miyo, odduwene oddirumelinyu wi akwanihedhe esile dhinddijombela,
26 iyene onofuna vaddiddi ouwonani, mbwenyi, onokubanya sabwa ya nyuwo wiwa wi iyeneyá wali muredda.
27 Txibarene, iyene wali muredda vaddiddi, wali nena n’okwa; mbwenyi Mulugu omweddela ttagaraga, pumwenemo, kamweddele iyenevi bahi; oddeddela miyo vina, wila okubanya waga onattabwe.
28 Ddinomuruma momaguva wila mugamona muhagalale wili, odhugudheya waga ovuguwe.
29 Nona mmwakele ninga munawakelinyu anamafwara a Nabuya, attu ninga aba mwarihege,
30 sabwani iyene wali nena n’okwa mwaha wa mabasa a Kristu, vina iyene ohileva egumi yaye wila addikamihedhe vowi nyuwo mwali wolapela-wene.
