Akadda Filipi 3:1-21
3 Nona abalaga, mwagalalegevi mwa Nabuya, kinddirutxa oulebelani dhilobo dhakakene, ddinilela opurelamo wenyu.
2 Porhe-porhe na abale ankala ninga anabwa, porhe-porhe na abale anira dhotakala, porhe-porhe na abale anfuna wila mutxetteliwe.*
3 Vowi iyo nili abale anna otxetteliwa webaribari, ninttidda mabasa a Mulugu na muya wa Mulugu, ningaya mwaha wa Kristu vina kaninroromela dha maningo,
4 miyo ddikaana mwaha wa ororomela dha maningo opitta muttu mwina.
Akala okalawo muttu mwina onubuwela wi okaana mwaha wa ororomela dha maningo, miyo ddihikana vopitta:
5 miyo dditxetteliwe siku na noutanu nauraru, ddili wa nlogo na Izrayel, nihimo na Benjami, mukadda Ebreu obaliwe na Ahebreu; mowiwanana na nlamulo, ddili Mfarizi.
6 Miyo ddankalela ntidi ofwara-fwara mulogo, vina ddanvirihamo na murima wotene ejile yaloga nlamulo wi joligana.
7 Mbwenyi, dhotedhene dhonana miyo ttima, ovano ddinona wi kahiyo elo* mwaha wa Kristu.
8 Txibarene, ottiya ejivi ddinona dhilobo dhotedhene ninga dhotowa ttima mwaha wa eziwelo enddimuwa ya Kristu, Nabuya waga; mwaha waye ddihirumela oyelela dhilobo dhotedhene vina ddinona ninga lixu wi ddikale mumodhani na Kristu,
9 wila ddikale vamodha na iyene, ottiya mwaha wa oligana waga ondha mwa ofwara Nlamulo, mbwenyi mwaha wa oligana ondha mwa omuroromela Kristu; vowi Mulugu onawona abale animuroromela Kristu ninga aligani.
10 Miyo ddinofuna omuziwa iyene vina oziwa guru envenyihile mukwani, ddinofuna vina otabuwa ninga mutabuweliye vina okwa ninga mukweliye,
11 wila egawodheya ddiwodhe ofwanya ovenyihiwa mukwani woroma.
12 Kahiyo wi ddihimala wakela obe ddihimala wakwana, mbwenyi ddinovilibihedha wila ddone akala ddinele ofwanya ejile eddikuweleli Kristu Yezu.
13 Abali, kaddinivyona ninga muttu omalile wakela, enkosimi jiji: Ddinodduwala dha mundduni, ddikosaga guru wi ddifwanye dhosogorho.
14 Ddinovilibihedha wila ddifwanye nlivo na wirimu niddisakuleli Mulugu, mwa Kristu Yezu.
15 Nona iyo notene oli owarala, nikane yubuwelo eji, vano akala munowubuwela n’ekalelo yottiyana, Mulugu onele ouziwihani monelo wapama.
16 Dhahene, kintanala guru gani ekosilehu, nidhowegevi neddaga dila yakakene.
17 Abali, motene mudditagihe miyo, vina mwatagihe abale ankalawo afwaraga yotagiha yuttiyedheni iyo.
18 Vowi attu enjene—wale miyo ddannaromola dila dhinjidhene—ovano ddinaromola ddunlaga, sabwani awene ankalawo ninga amwiddani a pingirhizi ya goyi* ya Kristu.
19 Omagomelo wa attu abo, kutolotxiwa, mulugu wawa erugulu, anogayana esile dhafwanyelani okanela manyazo vina anubuweletxa dhilobo dha vati.
20 Mbwenyi elabo yehu eli wirimu, nona ninomujedhela na murima wehu wotene mvuni ondha wenewo, Nabuya Yezu Kristu.
21 Iyene onele olabana owodha waye onddimuwa wakeliye wi eddihena dhilobo dhotene vina onele osaddula maningo ehu awobana, akale ninga maningo aye ottittimiheya.
Manota
^ Obe, “abale anfuna wila mugwaddiwe maningo.”
^ Obe txino, “ddihigana ottiya.”
^ Kang’ana Mazu Atapuleliwe.