Akadda Filipi 4:1-23
4 Nona, abalaga anakwelimi; miyo ddinonukeliwa venjene ouwonani, nyuwo muli ottaba na nlivo* naga, muvilibihedhe wedda dhahene mwa Nabuya, abali okweleya.
2 Ddinomukokomeza Evódia, ddinomukokomeza vina Síntike wila akaane yubuwelo modhene mowiwanana na Nabuya.
3 Ddinouloba weyo vina ninga muttu olabile vamodha na miyo wi wakamihedhegevi ayana abo alabile na miyo mmabasani a ovuwiha miselu dhapama, vamodha na Klementi vina na anamalaba akwaga ena, abuwene alebiwa mazina awa munivuruni na egumi.
4 Mudhidhi wotene muttabege mwa Nabuya. Ddinologa wili Muttabege!
5 Watanala wenyu attu ena oziweye na attu otene. Nabuya oli vakuvi.
6 Kamudhugudheyele elo-wene, dhotedhene esile dhinfunenyu mmuziwihe Mulugu na malobelo, mmunlelaga na ntidi vina mmutamalelaga.
7 Dhawene, murenddele wa Mulugu ompitta dhubuwelo dha attu, onele okoya murima na dhubuwelo dhenyu mwa Kristu Yezu.
8 Nona abali, muhittiye otanalela dhotedhene dhili dhebaribari, dhotedhene dhinfwanyela ozuzumeliwa, dhotedhene dhili dhawakwana, dhotedhene dhili dhokweleya, dhotedhene dhinlogiwa pama, dhotedhene dhili dhoriheya na dhotedhene dhinfwanyela ottittimihiwa.
9 Mweddegena dhotedhene dhisunzilenyu na miyo, dhirumelilenyu, dhiwalenyu vamodha na esile dhiddonilenyu ddikosaga; Mulugu wa murenddele onele okala na nyuwo.
10 Ddinottaba venjene mwa Nabuya vowi muhoniha wili oddizuzumela wenyu. Ddinoziwa wi nyuwo kamwaddidduwalile, vano mwali muhinatti ofwanya mukalelo woddikamihedha.
11 Kaddinlogela esidhá mwaha wa ojombeliwa, ddihisunza ohagalala na mikalelo dhaga.
12 Miyo ddiziwa okalawo na dhing’onovi vina ddiziwa okalawo na dhinji. Na mikalelo dhotedhene ddisunza yoviteya enziwa attu ang’onovi, ya orubala vina ya opiwa dala, ya okaana dhawinjiva vina ya ojombeliwa.
13 Ddinowodha dhotedhene mwaha wa ole onddivaha guru.
14 Vano, mukosa yapama oddikamihedha musegedheyani mwaga.
15 Txibarene, nyuwo abali o Filipi, munoziwa wi mumalelinyu wiwa miselu dhapama dila yoroma ddibudduwaga o Masedónia, kawo mulogo mwina oddikamihedhi vina orumelile wakela nikamihedho naga ahili nyuwo bahi;
16 vowi vàli miyo o Tesalónika, nyuwo muddirumela elobo wila ddakwanihedhena dhaddijombela, kahiyo dila modha bahi mbwenyi dila bili.
17 Kahiyo yawila ddintamela wakela mivaho, mbwenyi ddintamela dhobala dhininjiviha kobiri yenyu.*
18 Ovano ddikaana dhotedhene dhinfunemi vina dhimpitta esile dhinfunemidha, ddimala wakwana makamaka ovanene vakelilemi esile dhimurumilenyuna Epafrodito. Eso dhili ninga mvaho onrumeliwa, wonukela vina onimuzivela Mulugu.
19 Dhawene Mulugu waga onele ouvahani vowinjiva-vene dhotedhene dhinujombelani mowiwanana na dhorela dhaye dhottittimiheya mwa Kristu Yezu.
20 Mulugu wehu vina Babihu attittimihiwe okala n’okala-wene. Amen.
21 Na nzina na Kristu Yezu, mwaperhekele malejelo aga akoddeli otene. Abali ali na miyo anouperhekelani malejelo.
22 Akoddeli otene makamaka a ntakulu na Sézari anouperhekelani malejelo.
23 Mahala a Nabuya Yezu Kristu akale na nyuwo mwaha wa okoddela wenyu murima.
