Dhilebiwe na Joau 1:1-51
1 Omaromelo nàli Nzu, Nzu nali na Mulugu, vina Nzu nàli mulugu.*
2 Omaromelo-wene iyene wali na Mulugu.
3 Dhilobo dhotedhene dhittanddiwe mwa iyene vina kittanddiwe nne elobo modha, ehili mwa iyene.
Edhile ottanddiwa
4 mwa iyene ji egumi vina egumiyá yali txeza ya attu.
5 Txeza enomoneya mwiddimani, vano eddimayá kipemberhile.
6 Wahikalawo mulobwana mmodha warumiwe ninga mwanamukatti wa Mulugu, nzina naye nàli Joau.
7 Mulobwana oddo, odha ninga munamoona wi avahe onamoona wa txeza, wi attu otene ewaga onamoona waye, arumele.
8 Iyene kali txezayá eji, vano odhele ovaha onamoona wa txezayá.
9 Yafuna odha mwilaboni ji txeza ya ebaribari enamoneya attu otene.
10 Iyene wali mwilaboni, vina elabo ettanddiwe mwa iyene, vano elaboyá kimuziwile.
11 Iyene odha muzizani mwaye, mbwenyi attu a ziza naye kamwakelile.
12 Vano otene amwakelile, iyene ohavaha owodha wi akale ana a Mulugu, sabwani ahiroromela nzina naye.
13 Awene ahibaliwa, kahiyo na nikami, nne na ofuna wa maningo, nne ofuna wa attu, mbwenyi n’ofuna wa Mulugu.
14 N’eji, ole onkuweliwa Nzu obaliwa na maningo omuttu bakala vari vehu. Iyo nihona nttittimiho naye ninligana na nttittimiho na mwana wa nammodha wa babe. Iyene wahidhaleliwa mahala vina na ebaribari ya Mulugu.
15 (Joau ovaha onamoona waye, ndde, ohivuwiha: “Oddu, dduddwene wamuloga miyo, wi ‘Ole ondha mundduni mwaga oddikwaranya miyo, vowi iyene wahikalawo miyo ddihinatti.’”)
16 Iyo notene nihakela mahala a Mulugu mwaha waye, sabwani iyene ddodhala mahala a Mulugu.
17 Nlamulo ovahiwe ddi Mizé, mbwenyi mahala a Mulugu vina ebaribari edhile okalawo na Yezu Kristu.
18 Kawo muttu omonile Mulugu, mbwenyi mwana mmodha odduwene onladdana na Mulugu* vina oli vakuvi va Babe ddiniziwihile Babi waye.
19 Oku onamoona ovahile Joau, Ayuda mwarumelani anamakutta na Alevita ovenyana o Jeruzalemi wi anvuze Joau dhahi: “Nyuwo muli ani?”
20 Iyene kakoddile wakula, ohiloga ebaribari, eraga: “Miyo kaddili Kristu.”
21 Awene ahinvuza: “Kito, mulani? Muli Eliya?” Iyene ohakula: “Kaddili.” “Muli Namavuhulela?” Iyene ohakula: “Nne!”
22 Awene ahinvuzavi: “Kito mulani? Munaddele wi iyo niwodhe wawakula abale anirumile. Nyuwo munloga wi mulani?”
23 Iyene ohiloga: “Miyo ddili lizu na muttu onlaleya mwiddeddereni dhahi, ‘Kogolelani dila ya Yehova,’ dhahene ninga mwalogile namavuhulela Izaiya.”
24 Abale arumiwe àli a nikuru na Afarizi.
25 Awene ahinvuzavi vina: “Kito ombatizelani, akala kuli Kristu, nne Eliya nne namavuhulela?”
26 Joau ohawakula: “Miyo ddinbatiza na manje. Vari venyu okalavo muttu ohinimuziwenyu,
27 ole ondha mundduni mwaga, miyo kaddinfwanyela nne omurula sandáliya dhaye.”
28 Esidhá dhipadduwile o Betánia mpaddi mwina wa Jordau, wenewo wabatiza Joau.
29 Mmangwananimwá iyene omona Yezu adhaga vàliye, venevo ohiloga: “Mmone, Mwana-Nibila wa Mulugu, onttimiha ottega mwilaboni!
30 Oddu, dduddwene wamuloga miyo, ddiraga: ‘Mundduni mwaga munodha muttu onddikwaranya miyo, vowi iyene wahikalawo miyo ddihinatti.’
31 Nne miyo vina kaddamuziwa, nona jijene edhele miyo obatiza na manje wi iyene aziwiwe mu Izrayel.”
32 Joau vina ohivaha onamoona, alogaga: “Ddihona muya wokoddela otitaga wirimu n’ekalelo ya kangayiwa vina okala vadhulu vaye.
33 Nne miyo vina kaddamuziwa, mbwenyi oddule oddirumile obatiza na manje, oddaddela: ‘Ole onamoniwe muya wokoddela omutitelaga vina okala na iyene, odduwene ddinbatiza na muya wokoddela.’
34 Miyo ddihona ejiya, vina ddinovaha onamoona wi iyene Mwana Mulugu.”
35 Mmangwananimwá, Joau wali mburo wakakene na anamasunza aye eli,
36 vina mmoneliye Yezu eddaga ohiloga: “Mmone, Mwana-Nibila wa Mulugu!”
37 Anamasunza abale eli mwiwalani alogaga eso, ahinfwara Yezu.
38 Muzugunuwele Yezu awona anfwaraga, ohavuza: “Muntamela eni?” Awene amwakula: “Rabi (entapulela “Namasunziha”) munkala wuvi?”
39 Iyene ohiloga: “Kadhaunoni munele wona.” Venevo awene adhowa vina ahona vakaliye. Akala na iyene sikunene nttile, yali wora 16.*
40 André mbale wa Simoni Pedro wali mmodha wa abale ewale mazu a Joau vina anfwarile Yezu.
41 Voroma-vene iyene ohinfwanya mbalaye Simoni vina omwaddela: “Nihinfwanya Mesiya” (entapulela “Kristu”),
42 iyene omuttukulela wali Yezu, Yezu mmwang’aneliye, ohiloga: “Weyo oli Simoni mwana Joau onakuweliwege Sefas” (entapulela “Pedro”).
43 Mmangwananimwá Yezu wafuna adhowe o Galileya. Venevo onfwanya Filipi vina omwaddela: “Kakala namafwara waga.”
44 Filipi wali o Betsaida sidadi ya André na ya Pedro.
45 Filipi ohinfwanya Nataniyel vina ohiloga: “Nihinfwanya ole olebiwe Mmalamuloni a Mizé vina olebiwe na anamavuhulela: Yezu mwana Jozé, w’o Nazareti.”
46 Vano Nataniyel ohiloga: “Koddi enowodheya o Nazareti obudduwa elobo yapama?” Filipi omwakula: “Kadhawuno wone.”
47 Yezu mmoneliye Nataniyel amwaddamelaga, ohiloga mwaha waye: “Onodha Mwizrayel webaribari ohina ottambi.”
48 Nataniyel ohinvuza: “Nyuwo muddiziwile dhavi?” Yezu omwakula: “Filipi ahinatti oukuwela, miyo ddihuwona buli mutxiddo mwa mfigera.”
49 Nataniyel ohiloga: “Rabi, nyuwo muli Mwana Mulugu, nyuwo muli Mwene wa Izrayel.”
50 Yezu omwakula: “Onrumelela sabwa ya miyo ouwaddela wi dduhuwona mutxiddo mwa mfigera? Onele wona dhilobo dhinddimuwa opitta esi.”
51 Venevo iyene ohiloga: “Ddinouwaddelani ebaribari: Nyuwo munele wona erimu jifuguwile, anju a Mulugu awelaga vina amutitelaga Mwana-muttu.”
Manota
^ Obe, “nali na ekalelo y’omulugu.”
^ Obe, “vapetoni va Babe.” Eji enaddiwana okuluveliwa na ettomo enddimuwa.
^ Na egregu, “wora dha txiguwo [nzuwa banimalile opattuwa].”
