Dhilebiwe na Joau 10:1-42
10 “Ddinouwaddelani ebaribari, onvolowa muttangani mwa mabila ahiviraga vamusuwo, vano alupelamo oddo mbava.
2 Mbwenyi onvolowa aviraga vamusuwo ddi mukumbuzi wa mabila.
3 Mwang’aneli ononfugulela musuwo, mabilayá anowiwa lizu naye. Iyene onokuwela mabilayá na nzina naye-naye vina onottukulela otakulu.
4 Agamala oburutxa mabila otene, iyene onosogorhela vina mabilayá anonfwara sabwani anoziwa lizu naye.
5 Kaninfwara muttu ohinimuziwani ottiya ejo anomuttawa, sabwani kanziwa lizu na attu ahinaziwani.”
6 Yezu ohiloga yoladdaniha eji, mbwenyi awene kanonelimo yafuniye ologa.
7 Nona, Yezu ohiloga wili: “Ddinouwaddelani ebaribari, miyo ddili musuwo wa mabila.
8 Otene abale anloga wi akumbuzi a ebaribari, ambava; mbwenyi mabilayá kanavuruwana.
9 Miyo ddili musuwo. Ole onvolowa muttangani aviraga mwa miyo onovuneya, onele ovolowa, onele obudduwa vina onele ofwanya yoja.
10 Mbava ondhela wiya, opa vina otolotxa. Mbwenyi miyo ddidhele wi mukane egumi, egumiyá yowakwanela.
11 Miyo ddili mukumbuzi wapama, mukumbuzi wapama onoperheka egumi yaye mwaha wa mabila aye.
12 Namalaba ohili mukumbuzi vina ohili mwinya wa mabila, agona mwiji ofiyaga onottiya mabilayá, onottawa—apo mwijiyá onottidda mabila vina onobalaletxa—
13 Iyene onttawela sabwani namalaba, kantanala mabilayá.
14 Miyo ddili mukumbuzi wapama. Ddinoziwa mabila aga, vina mabila aga anoddiziwa.
15 Dhahene ninga munddiziwela Baba, miyo vina ddinomuziwa vina ddinoperheka egumi yaga mwaha wa mabila aga.
16 “Ddikaana mabila meena ahili a nikuru ntti, abo vina ddinele odhana. Awene anele ovuruwana lizu naga, akale nikuru nimodha na mukumbuzi mmodha.
17 Nona, Babani onoddikwela, sabwani ddinoperheka egumi yaga wi ddakele wili.
18 Kavo onddakiha, vano miyo ddinoperheka na ofuna waga. Ddikaana ofuru,* wa operheka vina ddikaana ofuru* wa wakela wili. Nlamulo ntti oddivahile ddi Babaga.”
19 Vahiteya wili ogawana wa Ayuda mwaha wa mazu aba.
20 Enjiyá anloga: “Iyene ovolowiwa domonyo vina otaduwa. Muninvuruwanela nni?”
21 Oku enayá anloga: “Aba kahiyo mazu a muttu ovolowiwe domonyo. Koddi domonyo onowodha ofugula mento a aliba ohona?”
22 O Jeruzalemi wahikosiwa Mattanga a Ottabelana Mparha. Nàli nsaka na oridha,
23 vina Yezu wela wedda mumparhani, mburo onkuweliwa nikodde na Salomau.
24 Venevo Ayuda amurugunuwa vina ahinvuza: “Munanittiye naganyedhaga mpaka mudhidhi gani? Akala muli Kristu, kanaddeleni.”
25 Yezu ohawakula: “Miyo ddihuwaddelani, masiki dhawene nyuwo kamunrumela. Mabasa ankosa miyo na nzina na Babaga anovaha onamoona waga.
26 Vano nyuwo kamunrumela sabwani kamuli mabila aga.
27 Mabila aga anovuruwana lizu naga, miyo ddinoziwa mabila aga vina mabilayá anoddifwara.
28 Miyo ddinowavaha egumi yohimala, awene txipo kanatolotxiwe vina kavo onaddake mmadani mwaga.
29 Eddivahile Babaga enddimuwa opitta dhilobo dhina dhotene vina kawo onwodha omwaka Babaga mmadani mwaye.
30 Miyo na Baba nili mumodhani.”*
31 Ayuda addodda malugu dila yanawili wila amponyedhe.
32 Yezu ohawaddela: “Ddihulagihani mabasa menjene apama na owodha wa Babani. Mwa mabasa aba bavi anaddivokele nyuwo malugu?”
33 Ayuda amwakula: “Iyo kaninauvokeleni malugu mwaha wa mabasa apama erilenyu, mbwenyi mwaha wa oveyiha, sabwani nyuwo masiki bamuli muttu, munovikosiha mulugu.”
34 Yezu ohavuza dhahi: “Munlamuloni mwenyu kilebiwe, ‘Miyo ddihiloga: “Nyuwo muli amulugu”’?*
35 Akala Mulugu, ohakuwela ‘amulugu’ abale attongiwe na nzu na Mulugu—vina malebo kantxinjeya—
36 nyuwo munologa na miyo ottittimihiwe na Babaga vina orumiwe mwilaboni, ‘Weyo onoveyiha,’ mwaha wa miyo ologa wi, ‘Ddili Mwana Mulugu’?
37 Akala miyo kaddinkosa mabasa a Babaga, kamuddiroromele.
38 Vano akala miyo ddinokosa, masiki nyuwo muhiddirumelaga miyoyá, karumelani mabasa ankosemi wila muziwe vina murumele wi Babani oli mumodhani na miyo, miyo ddili mumodhani na Babani.”
39 Venevo atamela omuttidda dila yina, mbwenyi iyene ottawa.
40 Iyene ovenyavo dila yanawili odhowa mpaddi mwina w’o Jordau, mburo wabatiza Joau voroma-vene, okala wenewo.
41 Enjene adhowa waliye vina anloga: “Joau kakosile ezinddiyelo, mbwenyi dhotedhene dhilogiliye mwaha wa mulobwana oddu s’ebaribari.”
42 Vina enjene àli venevo amuroromela.
Manota
^ Na egregu, “owodha.”
^ Na egregu, “owodha.”
^ Obe, “ninowiwanana.”
^ Obe, “a mikalelo dha omulugu.”
