Dhilebiwe na Joau 11:1-57
11 Mulobwana dhahi wakuweliwa Lázaro wali muredda. Iyene wali w’o Betánia murudda wa arogoriye Maria na Marta.
2 Maria oddu ddule wamukuttuleli makura onukela Nabuya vina wamukuputtile manyalo na nttitti naye. Lázaro wali muredda, wali murogoriye.
3 Nona arogoriye a Lázaro amurumela Yezu mpaganyo obu: “Nabuya, ole onimukwelinyu muredda.”
4 Mwiwale Yezu eso, ohiloga: “Eredda ejo kahiyo yokwana, epadduwele wila Mulugu attittimihiwe vina Mwana Mulugu attittimihiwe.”
5 Yezu wannimukwela Marta, mbalaye vina Lázaro.
6 Mbwenyi mwiwaliye wi Lázaro wali muredda, okalavi masiku meli mburo wakakene waliye.
7 Vasogorhova, Yezu ohawaddela anamasunza aye: “Ndhoweni wili o Judeya.”
8 Anamasunza aye alogana: “Rabi, akadda Judeya afuna auponyedheni malugu ovanenevi, nyuwo munfuna mudhowewo dila yanawili?”
9 Yezu ohawakula: “Omutana kuna wora 12? Ole onedda na txeza ya mutana kankwakwattuwa, sabwani onowona txeza ya mwilaboni.
10 Mbwenyi onedda na mattiyu ddinkwakwattuwa, vowi kanna txeza.”
11 Yezu mmaleliye ologa eso, ohenjedhedhavo dhahi: “Mukwehu Lázaro onogona, mbwenyi miyo ddindhowa wenewo ddanvenyihe.”
12 Venevo anamasunza aye ahilogana: “Nabuya, akala iyene onogona, onele ovenya.”
13 Vano Yezu walogana okwa wa Lázaro. Mbwenyi anamasunza aye obuwela wi iyene waloga ogona mwaha wa tturho.
14 Venevo Yezu ohatapulelamo: “Lázaro ohikwa.
15 Miyo ddihagalala mwaha wenyu sabwani kaddali wenewo wi nyuwo murumele. Ndhoweni oliye.”
16 N’eji Tomé wakuweliwa Munakono, ohawaddela dhahi anamasunza ena: “Iyo vina ndhoweni wi n’akwe vamodha na iyene.”
17 Mfiyedhewo Yezu, oziwa wi Lázaro wali mwikuttani* mwari mwa malabo manayi.
18 Betánia wali vakuvi na Jeruzalemi, walapelena makilometuru mararu.*
19 Ayuda enjene adhowa ompangarhaza Marta na Maria, mwaha wa okweliwa murogorawa.
20 Marta mwiwaliye wi Yezu wel’ofiya ohinfwarela mbwenyi Maria wali wogilatene vatakulu.
21 Marta ohiloga dhahi na Yezu: “Nabuya, nyuwo kokala veneva murogoraga kagakwile.
22 Vano miyo ddinoziwa wi elobo-elobovi enamukumbirhenyu Mulugu ovanene, Iyene onele wuvahani.”
23 Yezu omwaddela: “Murogorinyu onele ovenya.”
24 Marta omwakula: “Ddinoziwa wila iyene onele ovenya mukwani siku nomariha.”
25 Yezu ohiloga: “Miyo ddili ovenya mukwani vina ddili egumi. Ole onddiroromela miyo, masiki akwe onele wiyelela okalawo.
26 Wotene ole oliwo, vina onddiroromela miyo, txipo kanakwe-wene. Onorumela esidhá?”
27 Marta ohakula: “Ndde Nabuya, miyo ddinororomela wi nyuwo muli Kristu, Mwana Mulugu, wafwanyela odha mwilaboni.”
28 Mmaleliye ologa esidhá, odhowa omukuwela mbalaye Maria, vina omwaddela vaye-vene: “Namasunziha ofiya, onowukuwela.”
29 Mwiwaliye ejiya, ovenya nowaguva odhowa ogumana na iyene.
30 Yezu wali ahinatti ofiya mmuruddanimwa, walivi mburo wagumaniliye na Marta.
31 Ayuda àli vatakulu va Maria ampangarhazaga, ahona wi Maria ovenya nowaguva obudduwavo, awene ahinfwara obuwelaga wi odhowile wikuttani* onle.
32 Mfiyedhe Maria mburo wali Yezu vina amona, okokora osogorho waye, ologa na iyene: “Nabuya, nyuwo kokala veneva murogoraga kagakwile.”
33 Yezu mmoneliye Maria vamodha na Ayuda anvelela onlaga, oribiwa murima venjene vina okubanya.
34 Yezu ovuza: “Mmwinterile wuvi?” Amwakula: “Nabuya, kadhaunoni moone.”
35 Vina Yezu oroma wunla.
36 Venevo, Ayuda àlivo ahiloga: “Konani, okwela wamukweliyena!”
37 Vano ena àlivo anloga: “Mulobwana oddu ofugulile mento a muttu wohona, kagakosile elobo txilobo wi Lázaro anakwe?”
38 Venevo Yezu oribiwa wili murima vina odhowa wikuttani.* Ekuttayá yatopiwe vamaluguni vina nakalawo nlugu ninddimuwa nafugiwana omavolowelowa.
39 Yezu ohiloga: “Kaburutxaniwo nluguna.” Marta murogori wa marafulayá, omwiyihedha: “Nabuya, ddinona ninga maningoyá anonuka, sabwani mukweliye avira malabo manayi.”
40 Yezu omwakula: “Miyo kadduwaddelile wi ogaroromela onowona nttittimiho na Mulugu?”
41 Venevo aburutxawo nluguna. Yezu ottukulela mento aye wirimu vina ohiloga: “Babani, ddinoutamalelani sabwani muddivuruwana.
42 Mwebaribari, miyo ddiziwa wi nyuwo munoddivuruwana, enlogelemi dhahene, jawi muttitti obu oli veneva orumele wi ddi nyuwo oddirumile.”
43 Mmaleliye ologa eso, iyene okuwa na lizu noliba: “Lázaro, kabudduwela otakulu!”
44 Marafulayá obudduwa wopopotteliwene mada na manyalo, kove yaye jikuneliwe na guwo. Venevo Yezu ohawaddela “Kamutapuleni mmuttiye adhowe.”
45 Ayuda enjene adhowile omona Maria vina onile dhikosile Yezu amuroromela.
46 Mbwenyi enayavo adhowa wawaddela Afarizi dhakosile Yezu.
47 Venevo anddimuwa a anamakutta na Afarizi atugumaniha Sinedriyu* vina ahiloga: “Ninakose eni, vowi mulobwana oddu onokosa vizinddiyelo dhinjene?
48 Nigamuttiya okosagavi esi, otene anomuroromela, agamala akadda Roma anodha anakihe mburo wehu* vamodha na nlogo nehu.”
49 Venevo mmodhayavo wakuweliwa Kayifá wali namakutta munddimuwa yaka ejile, ohawaddela dhahi: “Nyuwo kamunziwa elo,
50 nyuwo kamunnonelamo wi japama mulobwana mmodha okwela ovuneya wa attu enjene, ehili nlogo notene otolotxiwa.”
51 Mbwenyi iyene kalogile ejiya na ofuna waye, mbwenyi ninga wali namakutta munddimuwa yakene-ejile wela ovuhulela wi Yezu agahikwela nlogo.
52 Kahiyo opeliwa nlogovi bahi, mbwenyi vina àtugumanihe ana Mulugu amalile obalaleya.
53 Oromana siku-nene nttile, aroma olaganela ompa.
54 Nona, Yezu kedda Ayuda amonaga, mbwenyi ovenya, odhowa murudda waddamana na mwiddeddereni, sidadi dhahi enkuweliwa Efrayim, okala wenewo na anamasunza aye.
55 Paskwa wa Ayuda wela waddamela, venevo attu enjene a mmuruddani adhowa o Jeruzalemi Paskwayá ahinaroma, wi avikoddelihe ninga mwarumela malamulo a Mizé a ovikoddelihana.
56 Awene annimutamela Yezu mumparhani vina anloga muttu na mukwaye: “Munonamo dhavi? Koddi iyeneyá kanadhe vamattangani apa?”
57 Vano anddimuwa a anamakutta na Afarizi ahivuwiha muselu wi onimona Yezu awaddele, awene amuttidde.*
Manota
^ Obe, “masiye a aliba okwa anubuweliwa na Mulugu.”
^ Na egregu, “estadiyu 15.” Estadiyu modha yakwanela meturu 185.
^ Obe, “masiye a aliba okwa anubuweliwa na Mulugu.”
^ Obe, “masiye a aliba okwa anubuweliwa na Mulugu.”
^ Kang’ana Mazu Atapuleliwe.
^ Kuloga, mparha.
^ Obe, “ammage.”
