Dhilebiwe na Joau 12:1-50
12 Ahalagawo masiku matanu na nimodha wi ajiwe mattanga a Paskwa, Yezu ofiya o Betánia wali Lázaro, ole wanvenyihiliye mukwani.
2 Wenewo okuweleliwa siyarhi, Marta ddagawa. Lázaro wali mmodha wa abale aja* na Yezu.
3 Venevo Maria ottukula meya lituru* wa makura a nardu onukela, ahataganyihiwe na elo, a muttengo munddimuwa; okuttulela manyalo a Yezu vina okuputta na nttitti naye. Mbamwa mudhala onukela wa makurayá.
4 Venevo Juda Iskariote mmodha wa anamasunza aye, ole wafuna omuguliha, ohiloga:
5 “Makura aba onukela akoddeleni oguliwa adenáriyu 300, kobiridhá dhivahiwa ayelegi?”
6 Mwebaribari, yamulogiha ejiya kiyali sabwa ya wazuzumela ayelegi, mbwenyi wali mbava. Ddi iyene wakoya kasha ya kobiri vina wanniyamo kobiridhá.
7 Venevo Yezu ohiloga: “Kamuttiyeni muyana oddu akose ejiya wi asasanyedhe wekiwa waga.
8 Sabwani ayelegi ankalavi na nyuwo mudhidhi wotene, mbwenyi na miyo kamunakalevi mudhidhi wotene.”
9 Muttitti mwinjene wa Ayuda ohiwa wi Yezu wali o Betánia venevo adhowawo. Kadhowile bahi sabwa ya Yezu mbwenyi vina wila amone Lázaro odduwene wavenyihiwe mukwani na Yezu.
10 Anddimuwa a anamakutta alaganela vina ompa Lázaro,
11 sabwani mwaha waye, Ayuda enjene andhowawo vina annimuroromela Yezu.
12 Mmangwananimwá, muttitti mwinjene wadhowile omattangani ohiwa wi Yezu wel’odha o Jeruzalemi.
13 Venevo attukula makubari a minddu ahinfwarela vina aroma okuwa: “Ninoulobani, kanvuneni, worurihiwa ddule ondha na nzina na Yehova vina worurihiwa ddi Mwene wa Izrayel!”
14 Yezu ohinfwanya mwana-buru, owelavo, dhahene ninga mulebeliwani:
15 “Kuwove mwana-muyana w’o Sioni. Kewa! Mwene wawo onodha, bagilatile vadhulu va mwana-buru.”
16 Vamaromo anamasunza aye kanonelamo esidhá, mbwenyi Yezu mmaleliye ottittimihiwa, awene ahubuwela wi esidhá dhahilebiwa mwaha waye vina dhahireya mwa iyene.
17 Attu àli na iyene mudhidhi omukuweliye Lázaro mwikuttani,* anvenyiha mukwani, anvaha onamoona.
18 Nona, attu a muttitti adhowa ogumana na Yezu, sabwani ahiwa wi iyene wahikosa ezinddiyelo eji.
19 Vano Afarizi anloga mukalelani: “Ehoneya-wene wi kaninwodha elo. Moone! Attu otene anonfwara.”
20 Mwa abale adhowile omattangani webedha, ahikalamo vina Agregu.
21 Awene amususela Filipi wali mukadda Betsaida w’o Galileya amukumbirha dhahi: “Nabuya, ninfuna nimone Yezu.”
22 Filipi omwaddela André. Mmalelani André na Filipi adhowa ologa na Yezu.
23 Vano Yezu ohawakula: “Ofiya mudhidhi wi Mwana-muttu attittimihiwe.
24 Ddinouwaddelani ebaribari, ttaga ya tirigu egamottela vati, egahikwe, enkala ttaga modha bahi; vano egakwa, enobala milima dhinji.
25 Akala muttu onokwela egumi yaye, onele oyelela, vano ole onidda egumi yaye mwilaboni mpuno, onele okoya wi afwanye egumi yohimala.
26 Akala muttu onofuna okala mwimeleli waga, addifwaregevi, vina vanakale miyo panakale mwimeleli waga. Akala muttu onofuna okala mwimeleli waga, Babani onele omuttittimiha.
27 Yezu ohiloga; apa murima waga onoddiparuwa, ddiloge eni? Babani muddivune mwaha wa mudhidhi obu wa masoso. Vano, miyo ddidhele mudhidhene obu.
28 Babani, kattittimihani nzina nenyu.” Venevo nihiweya lizu nadha wirimu naloga: “Miyo ddimala ottittimiha vina ddinele ottittimiha wili.”
29 Muttitti walivo ohiwa eso vina oroma ologa wi jayi erumile. Ena anloga: “Anju ologile na iyene.”
30 Yezu ohakula: “Lizu ntto kaniddidhele miyo, mbwenyi nudheleni nyuwo.
31 Ovanene elabo ejino enele ottongiwa vina mulamuleli wa elabo ejino onele ottamagihiwa.
32 Miyo ddigamala otomeyiwa mwilaboni, ddinele wakukusela wa miyo attu otene.”
33 Mwebaribari, iyene walogela ejoyá wi onihe mukwelelo ogakwiliye.
34 Venevo attu a muttittiyá amwakula dhahi: “Nihiwa Munlamuloni wi Kristu onokalawo namukalakala. Kito munlogelani wi Mwana-muttu onele otomeyiwa? Mwana-muttu oddo bani?”
35 Yezu ohawaddela: “Txeza enakale na nyuwo mwa mudhidhi mung’onovi. Mwedde oku txezaya bilivi na nyuwo wi eddima enaupemberheni. Onedda mwiddimani, kanziwa ondhowiye.
36 Oku txeza bilivi na nyuwo, muroromele txezayá wila mukale ana a txeza.”
Mmalele Yezu ologa dhotene esi, ovenyavo vina opitala.
37 Masiki iyene vakosiye vizinddiyelo dhinjene vamentoni vawa, aweneyá kamuroromela,
38 wi akwanihedheye mazu a namavuhulela Izaiya ologile dhahi: “Yehova, bani ororomelile dhilaleyilehu?* Vina bani wonihiwe owodha wa mono wa Yehova?”
39 Izaiya ohiloga vina mwahayá ogattukuleli awene ohirumela:
40 “Iyene ohapiba omentoni vina ovaddiha murima wawa, wi ahone na mento awa nne ahinonelemo na murima wawa, arugunutxa murima, miyo ddavulumutxa.”
41 Izaiya ologile esuwene sabwani ohona nttittimiho na Kristu vina ohiloga mwaha wa ovuwa waye.
42 Anddimuwa enjene a Ayuda annimuroromela Yezu, mbwenyi sabwa ya Afarizi, kalagiha vanamwinjini ovaga ottamagihiwa mu sinagoga;*
43 vowi akweletxa ottittimihiwa na attu, ottiya ottittimihiwa na Mulugu.
44 Venevo, Yezu ohiloga na lizu noliba: “Onddiroromela miyo, kanddiroromela miyovi mbwenyi onomuroromela vina oddule oddirumile;
45 vina onddona miyo, onomoona vina Ole oddirumile.
46 Miyo ddidha mwilaboni ninga txeza, wi wotene ole onddiroromela, ahikale mwiddimani.
47 Mbwenyi akala muttu onowiwa mazu aga vano ahivirihamo, miyo kaddinimuttonga sabwani kaddidhele ottonga elabo, vano ddidhele ovuna elaboyá.
48 Ole onddipwaza vina ohinrumela mazu aga okalawo onamuttonge. Mazu alaleyilemi banamuttonge siku nomariha.
49 Miyo kaddilogile na ofuna waga, vano Baba oddirumile, oddivaha dhilobo dhologa vina dhosunziha.
50 Vina ddinoziwa wi ofwara esile dhiddirumiliye onofwanyiha egumi yohimala. Nona dhotene dhinlogimi, ddinloga dhahene ninga muddaddelile Baba.”
Manota
^ Obe, “agilatile vameza.”
^ Kuloga, obo mpimo wa akadda Roma wakwanela garama 327.
^ Obe, “masiye a aliba okwa anubuweliwa na Mulugu.”
^ Na egregu, “dhilobo dhiwalani na iyo.”
^ Kang’ana Mazu Atapuleliwe.
