Dhilebiwe na Joau 13:1-38
13 Mattanga a Paskwa ahinatti, Yezu wanziwa wi wahifiya mudhidhi wa ottiya elabo ejino wi adhowe wa Babe. Dhahene sabwa ya wakwela attu aye àli mwilaboni, iyene ohakwelavi ofiyedha omagomo.
2 Mudhidhi wajani, Ddiabo wahimala wika mmurimani mwa Juda Iskariote mwana Simoni, yubuwelo ya omuguliha Yezu.
3 Yezu wanziwa wi Babe wahimperhekela dhotedhene mmadani mwaye, wanziwa vina wi wadhile wa Mulugu vina wadhowa wa Mulugu,
4 dhahene iyene ovenya vameza vina orula mukumi waye. Ottukula tuwaliya, omagela muyununi.
5 Venevo ohika manje mbasiyani, oroma osuwa manyalo a anamasunza aye vina akuputtaga na tuwaliya yamageleliye muyununi mwaye.
6 Mmaleliye ofiya vàli Simoni Pedro. Simoni Pedro ohiloga dhahi: “Nabuya, munfuna musuwe manyalo aga?”
7 Yezu omwakula: “Enkosimi kunnonelamo ovanene, mbwenyi onele ononelamo musogorho.”
8 Pedro ohilogana: “Nyuwo txipo kamunasuwe manyalo aga.” Yezu omwakula: “Akala miyo kaddinsuwa, kunkala waga vina.”*
9 Venevo Simoni Pedro omwakula: “Nabuya, bahito kaddisuweni, mbwenyi muhiddisuwe manyalovi, musuwe vina mada na musorhoyá waga.”
10 Yezu omwaddela: “Ole ohabile, oli wokoddelene kanfwanyela ovisuwa ehili manyalo bahi. Nyuwo muli okoddelene, mbwenyi kahiyo nyuwo motene.”
11 Vowi iyene wannimuziwa wafuna omuguliha. Nona aloga wi: “Kahiyo nyuwo motene muli okoddelene.”
12 Mmaleliye wasuwa manyalo vina abala mukumi waye, ogilati vameza dila yanawili, ohiloga dhahi: “Munonelamo eji yuwireleni miyo?
13 Nyuwo munddikuwela ‘Namasunziha’ vina ‘Nabuya,’ kamuvonyile, sabwani miyo ddili-wene.
14 Akala miyo oli Nabuya vina namasunziha wenyu ddihusuwani manyalo, enofuneya* nyuwo vina musuwegena manyalo.
15 Sabwani ddihusunzihani yokosa wi dhahene ninga mukoseleni miyo, nyuwo vina mukosege yakakene.
16 Ddinouwaddelani ebaribari, mudhari kanimpitta nabuyaye, nne orumiwe kanimpitta ole omurumileyá.
17 Akala munoziwa esidhá, munele wagalala mugavirihamo.
18 Kaddinuwaddanani motene; ddinowaziwa àsakulilemi. Vano enofuneya wakwanihedheya epaddi eji ya malebo enloga: ‘Ole waja pawu na miyo, oddisadduwela.’
19 Ddinouwaddelani esi ovanene dhihinatti opadduwa, wi dhigapadduwa murumele wila malebo aba additonya miyo.
20 Ddinouwaddelani ebaribari: Onimwakela muttu ddi muttu onimuruma miyo, onoddakela miyo vina; onddakela miyo, onomwakela vina Ole oddirumile.”
21 Mmalele Yezu ologa eso, oribiwa murima venjene vina ohiloga: “Ddinouwaddelani ebaribari, mmodhavo mwa nyuwo onele oddiguliha.”
22 Anamasunzayá aroma wang’anana mukalelani, ahimuziwaga bani walogiwanavo.
23 Namasunza waye mmodha, odduwene wakweliwetxa na Yezu, wali wogilatene vameza vakuvi na Yezu.
24 Venevo Simoni Pedro omukosela ezinddiyelo na musorho namasunzayá oddo vina ologana dhahi: “Kanaddele iyene onimulogana ani.”
25 Dhahene iyene omusamela Yezu vamurimani vina ohinvuza: “Nabuya, oddoyá bani?”
26 Yezu ohakula: “Dduddule onanvahemi pedaso ya pawu enfunemi onyettiha mutijelani.” Venevo mmaleliye onyettiha pawuyá, ohinvaha Juda mwana Simoni Iskariote.
27 Mmalele Juda ottukula pedaso ejile ya pawu, Satana ohinvolowa. Venevo Yezu omwaddela: “Enkosiwe, kakosa momaguva.”
28 Mbwenyi, mwa abale àli vameza, kavo ononelimo emuttukulele Yezu ologa ejiya.
29 Vowi Juda ddakoya kasha ya kobiri, ena obuwela wila Yezu wamwaddela wi “Agule dhafunani vamattangani,” obe wanfwanyela wavaha ayelegi elobo-txilobo.
30 Mmalele Juda wakela pedaso ejile ya pawu, obudduwavo momaguva. Yali mattiyu.
31 Mbudduwelevo Juda, Yezu ohiloga: “Ovano Mwana-muttu onottittimihiwa vina Mulugu onottittimihiwa mwaha waye.
32 Mwinyene Mulugu onele omuttittimiha, onamuttittimihe momaguva.
33 Anaga okweleya, ddilivi na nyuwo mudhidhi mung’onovi. Nyuwo munele odditamela, vano ddinouwaddelani dhahene ninga mwawaddelelemi Ayuda, wi ‘Ondhowemi nyuwo kamunwodha odhowawo.’
34 Ddinouvahani nlamulo niswa, mukwelanege muttu na mukwaye; dhahene ninga mukwelileni miyo, nyuwo vina mukwelanege muttu na mukwaye.
35 Attu otene anele oziwa wi muli anamasunza aga—mugakwelagana muttu na mukwaye.”
36 Simoni Pedro ohinvuza: “Nabuya, mundhowa wuvi?” Yezu omwakula: “Ondhowemi weyo kunwodha oddifwarawo ovanene, mbwenyi ogamala onele oddifwara.”
37 Pedro omwakula: “Nabuya, ddinkoddelani oufwarani ovanene? Miyo ddinoperheka egumi yaga mwaha wenyu.”
38 Yezu omwakula: “Weyo onele operheka egumi yawo mwaha waga? Ddinouwaddela ebaribari, mutubi kunonle, weyo ohinatti oddikodda dila ttaru.”
