Dhilebiwe na Joau 14:1-31
14 Yezu ohenjedhedha alogaga: “Kamukubanye mmurimani mwenyu; mmuroromele Mulugu, muddiroromele miyo vina.
2 Vatakulu va Babani vakala mimburo gwé. Kohikalavo, miyo ddigahuwaddelani, ddinodhowa ddausasanyedheleni mimburodhá.
3 Vina ddigamala odhowa, ddusasanyedhelani mburo ddinele wiyela dduttukuleni, wi vanakale miyo nyuwo vina mukale venevo.
4 Nyuwo munoziwa dila ya mburo ondhowemi.”
5 Tomé ologana: “Nabuya, kaninziwa ondhowenyu. Ninaziwe dhavi dilayá?”
6 Yezu omwakula: “Miyo ddili dila, ddili ebaribari vina ddili egumi. Kawo ondhowa wa Baba ahili mwa miyo.
7 Nyuwo koddiziwa, mugahimuziwa Babaga; oromana ovanene nyuwo munomuziwa vina munomona.”
8 Filipi ohiloga: “Nabuya, nilagihení Baba, ejo enonakwanela.”
9 Yezu omwakula: “Ddili na nyuwo mudhidhi mwinjene, Filipi, kunaddiziwavi? Onddona miyo onomona vina Baba. Ki onlogelani wi ‘Nilagihení Baba’?
10 Kunrumela wi miyo ddili mumodhani na Baba vina Baba oli mumodhani na miyo? Dhinusunzihani miyo kahiyo dhaga, mbwenyi Baba oli mumodhani na miyo onokosa mabasa aye.
11 Murumele ddigaloga wi ddili mumodhani na Baba vina Baba oli mumodhani na miyo, obe murumele mwaha wa mabasa ankosimi.
12 Ddinouwaddelani ebaribari, onddiroromela miyo onele okosa mabasa ankosa miyo, vina onele okosa mabasa manddimuwa opitta aba, sabwani miyo ddindhowa wa Baba.
13 Vina dhotedhene dhinakumbirhenyu na nzina naga, miyo ddinele okosa, wi Baba attittimihiwe mwaha wa Mwanaye.
14 Elobo-elobovi enakumbirhenyu na nzina naga, miyo ddinele okosa.
15 “Akala nyuwo munoddikwela, munele wiwelela malamulo aga.
16 Miyo ddinele omukumbirha Baba, vina iyene onele ouvahani mukamihedhi* mwina onakale na nyuwo namukalakala;
17 mukamihedhiyá, bu muya wokoddela onziwiha ebaribari ohinakela attu a mwilaboni, sabwani kanona nne kanziwa. Nyuwo munoziwa vowi onkalavi na nyuwo vina oli mwa nyuwo.
18 Kaddinaunyanyaleni. Miyo ddinele ouwiyelelani.
19 Mohigonela attu a mwilaboni kanaddone vina, vano nyuwo munele oddona, sabwani miyo ddikalawo, nyuwo vina munele okalawo.
20 Sikunene-ntto nyuwo munele oziwa wi miyo ddili mumodhani na Babaga, vina nyuwo muli mumodhani na miyo, miyo ddili mumodhani na nyuwo.
21 Onddikwela ddule onrumela malamulo aga vina onvirihamo. Onddikwelayá onele okweliwa na Babaga vina miyo ddinele omukwela ddivilagihaga wa iyene.”
22 Juda ohili Iskariote, ohinvuza: “Nabuya, epadduwile txini mugafunaga oviziwiha wa iyo bahi ottiya oviziwiha vina wa attu a mwilaboni?”
23 Yezu omwakula: “Akala muttu onoddikwela, onele wiwelela nzu naga, Babaga onele omukwela, vina iyo ninodhowa nakalege na iyene.
24 Ohinddikwela kaniwelela mazu aga. Mazu aniwenyu kahiyo aga, ba Baba oddirumile.
25 “Ddinuwaddelani esidhá oku baddilivi na nyuwo.
26 Mbwenyi mukamihedhi oli muya wokoddela onaurumeleni Baba na nzina naga onele wusunzihani dhilobo dhotedhene vina onele oubutxedhani dhuwaddeleni miyo.
27 Ddinouttiyedhani murenddele, ddinouvahani murenddele waga. Kaddinuvahani nyuwo dhahene ninga munvahela elabo. Kamukubanye mmurimani mwenyu vina kamove.
28 Muhiwa dhuwaddeleni miyo, ‘Ddinodhowa vina ddinele owiyelelani.’ Nyuwo koddikwelaga mugahagalala na odhowa waga wa Baba, sabwani Baba munddimuwa opitta miyo.
29 Dduwaddeleni esidhá dhihinapadduwa, wi dhigapadduwa muroromele.
30 Kaddinaloge mudhidhi mwinjene na nyuwo, sabwani mulamuleli wa elabo ejino onofiya vina oddoya kanddiwodha.*
31 Vano wila attu a mwilaboni aziwe wi ddinomukwela Baba, ddinkosa dhahene ninga muddirumeli Baba. Kavenyani, ndhoweni nivenyenivo apava.
