Dhilebiwe na Joau 15:1-27
15 “Miyo ddili muri wa mvidera webaribari, Babaga ddi namalimayá.
2 Iyene onogwadda dhirasi dhotedhene dhili mwa miyo dhihimbala vina onosasanyedha dhotedhene dhimbala wi dhibalegevi milima.
3 Nyuwo mumala okoddela sabwa ya nzu nulaleyileni miyo.
4 Mukale mumodhani na miyo, miyo ddinele okala mumodhani na nyuwo. Dhahene ninga erasi ehinwodha obala milima woka egahikale omvideraniwa, nyuwo vina kamunawodhe obala milima mugahikale mumodhani na miyo.
5 Miyo ddili muri wa mvidera, nyuwo muli dhirasidhá. Onkala mumodhani na miyo, miyo ddikalá mumodhani na iyene, oddo ddinbala milima dhinjidhene, vowi nyuwo kamunwodha okosa elobwene muhili na miyo.
6 Akala muttu kankala mumodhani na miyo, onoponyedhiwa otakulu ninga erasi enuma. Dhirasi eso dhinottiyiwa vamodhavi, dhinovokeliwa vamottoni, dhinoddumeyiwa.
7 Nyuwo mugakalavi mumodhani na miyo vina mazu aga akalavi na nyuwo, mugakumbirha enfunenyu, enele opadduwa dhawene.
8 Eji enomuttittimiha Babaga, mudidele obala milima dhinjidhene vina monihe wi muli anamasunza aga.
9 Ninga munddikwelela Baba, miyo vina ddinoukwelani, mukalevi mukwelani mwaga.
10 Mugewelela malamulo aga, munele okalavi mukwelani mwaga, dhahene ninga miyo oniwelela malamulo a Baba vina ddinkalavi mukwelani mwaye.
11 “Dduwaddeleleni esidhá, wi mukane wagalala wakakene onna miyo, wagalala wenyu vina wakwane.
12 Nlamulo naga ttintti: Mukwelanege muttu na mukwaye dhahene ninga mukwelileni miyo.
13 Kawo onna okwela onddimuwa ompitta ole onaperhekela akwaye egumi yaye.
14 Nyuwo munkala akwaga mugakosa esile dhinurumani miyo.
15 Kaddinukuwelani vina adhari, sabwani mudhari kanziwa dhinkosa nabuyaye, vano ddinukuwelani akwaga, sabwani ddihuziwihani dhotene dhimwiwalemi Babaga.
16 Kahiyo nyuwo oddisakulile, ddi miyo ousakulileni vina ddihuttomani wi mudhowe mwabaale milima, milima dhinakalewovi, dhahene dhotene dhinimulobenyu Baba na nzina naga, iyene onouvahani.
17 “Ddinourumani esidhá, wi mukwelanege muttu na mukwaye.
18 Akala elabo enouwiddani, muziwe wi ehinatti ouwiddani nyuwo, eromile oddidda miyo.
19 Nyuwo kokosaga epaddi ya elabo, elaboyá egahukwelani sabwa yokala a elabo. Vano, vowi kamunkosa epaddi ya elabo, mbwenyi miyo ddihusakulani mwilaboni, nona elaboyá enowiddani.
20 Kamudduwale dhuwaddelileni miyo: Mudhari kanimpitta nabuyaye. Akala addifwara-fwara, nyuwo vina munele ofwara-fwariwa. Akala ahiwelela mazu aga, anele wiwelela vina enyu.
21 Vano anele oukoselani dhotedhene esi sabwa ya nzina naga, vowi kanimuziwa Ole oddirumile.
22 Miyo kohidha ddiloga na awene, kaganna muladdu wa dhottega dhawa. Mbwenyi ovanene, awene kanwodha ottawa dhottega dhawa.
23 Onddidda miyo onomwidda vina Babaga.
24 Miyo kohikosa vari vawa mabasa ahikosile muttu mwina, kagakanile muladdu wa yottega; ovano awene ahiddona, ahidditxiga miyo vina amutxiga Babaga.
25 Mbwenyi eji epadduweli wi akwanihedheye mazu alebiwe Munlamuloni mwawa: ‘Additxiga ddihina muladdu.’
26 Miyo ddinele ourumelani mukamihedhi ondha wa Baba. Obu muya webaribari, ondha wa Babani, onauvaheni onamoona mwaha waga,
27 vina nyuwo munele ovaha onamoona, sabwani mwalivi na miyo ovenyana omaromelo.
