Dhilebiwe na Joau 16:1-33
16 “Dduwaddelileni esidhá wila munakwakwattuwe.
2 Attu anele outtamagihani musinagoga.* Txibarene, onofiya mudhidhi wawi, abale anfuna oupani obuwelege wi animukosela mabasa Mulugu.
3 Anakose dhotedhene eso sabwani kanimuziwa Baba vina kanddinziwa miyo.
4 Dduwaddelileni dhotedhene esi wi mudhidhi onfunani opadduwa ogafiya, mubuwele wi miyo ddahuwaddelani esidhá.
“Kadduwaddelileni omaromo, sabwani ddali na nyuwo.
5 Mbwenyi ovano ddindhowa wa Ole oddirumile, masiki dhawene kawo wa nyuwo onddivuza: ‘Mundhowa wuvi?’
6 Ottiya ejo muli wokubanyene mmurimani sabwani ddihuwaddelani esidhá.
7 Vano ddinouwaddelani ebaribari: Nyuwo munele ofwanya yopurelamo mwaha wa odhowa waga. Sabwani, ddigahidhowe kaddinaurumeleni mukamihedhi, mbwenyi ddigadhowa ddinele ourumelani.
8 Oddoya agadha, onele wawoniha attu otene, txini eli yottega, txini eli yoligana vina txini eli ottonga wa Mulugu:
9 Voroma mwaha wa yottega, vowi awene kaddiroromelile;
10 vasogorhova, mwaha wa oligana, sabwani ddindowa wa Baba vina nyuwo kamunaddone vina;
11 omamalelowa, mwaha wa ottongiwa, vowi mulamuleli wa elabo ejino omala ottongiwa.
12 “Ddikanavi dhinjidhene dha ouwaddelani, mbwenyi ovanene kamunwodha ononelamo.
13 Venevo, iyene* agadha, muya wokoddela onziwiha ebaribari, onele ouweddihani mwibaribarini mwetemwene, sabwani kanaloge dhaye yeka, vano onaloge dhiwaliye vina onele oulaleyani dhinapadduwe.
14 Oddoya onele oddittittimiha sabwani onele wakela eli yaga vina aulaleyeleni.
15 Dhotedhene dhinna Baba saga. Nona ddiloga wi mukamihedhi oddo onakele eli yaga vina aulaleyeleni.
16 Ovanene kamunaddone, vina mohigonela munele oddona.”
17 Nowidhawo anamasunza aye ena aroma ologa muttu na mukwaye: “Iyene onfuna aloge eni na mazu aba: ‘Mohigonela kamunaddone vina mohigonela munele oddona, sabwani ddindhowa wa Baba’?”
18 Awene anloga: “Onfuna aloge eni, na mazu aba ‘mohigonela’? Kaninziwa enlogiye na mazu aba.”
19 Yezu wanziwa wi awene afuna anvuze, nona ohawaddela: “Munvuzelana sabwa ya miyo ouwaddelani wi: ‘Mohigonela kamunaddone, vina mohigonela munele oddona’?
20 Ddinouwaddelani ebaribari, nyuwo munele wunla vina oribiwa murima, mbwenyi attu a mwilaboni anele ohagalala. Nyuwo munele okubanya, vano okubanya wenyu onele osadduwa okale ohagalala.
21 Muyana ofiyedhiwe mudhidhi waye wobala onotabuwa venjene sabwani mudhidhi waye ofiya. Mbwenyi agamala ombala mwana, onodduwala goyi yoniliye vina onohagalala sabwa ya odha muttu mwilaboni.
22 Yakakene vina, nyuwo ovanene muli òkubanyene, mbwenyi miyo ddinele wiyela dduwoneni, venevo murima wenyu onele ohagalala vina kavo onauwakiheni ohagalala wenyu.
23 Siku-nene-ntto, nyuwo kamunaddivuze nne elobo modha. Ddinouwaddelani ebaribari, mugamukumbirha Baba elobo-elobovi na nzina naga, iyene onele wuvahani.
24 Ofiyedha ddabuno nyuwo kamunakumbirha nne elobo modha na nzina naga. Kakumbirhani vina munele ovahiwa wi ohagalala wenyu wakwane.
25 “Ddihuwaddelani esidhá na dholaddaniha. Onofiya mudhidhi ohinalogegemi na nyuwo ddiladdanihaga, mbwenyi ddinele ouwaddelani mowakwana-mwene mwaha wa Baba.
26 Siku-nene-ntto, munele omukumbirha Baba na nzina naga, kaddinloga wi ddinele oukumbirhelani.
27 Mwebaribari Baba onoukwelani, vowi nyuwo munoddikwela vina munorumela wi ddidhile na nzina na Mulugu.
28 Ddidha mwilaboni ninga mwimeleli wa Baba. Ovano ddinottiya elabo ddindhowa wa Baba.”
29 Venevo anamasunza aye ahiloga: “Ovano mbwenyi, ninononelamo dhinloginyu vowi kamunloga na dholaddaniha.
30 Ovano ninononelamo wi munoziwa dhilobo dhotedhene vina kili yofuneya ouvuzani. Nona ninorumela wi mudhile wa Mulugu.”
31 Yezu ohawakula: “Ovano munorumela?
32 Kewani! Onodha mudhidhi, ofiya-wene, onabalaletxiwenyu muttu-muttu adhowe vatakulu vaye vina munele oddittiya meka. Vano miyo kaddili meka, sabwani Baba oli na miyo.
33 Dduwaddeleni esidhá wi mwa miyo mukane murenddele. Mwilaboni munele okaana masoso, mbwenyi mulibe murima! Miyo ddipemberha elabo.”
Manota
^ Kang’ana Mazu Atapuleliwe.
^ Nzu ntti “iyene” ninfwanyeya versikulu 13 na 14 ninaddiwana “mukamihedhi” odduwene ologiwe versu 7. Yezu olabihedha nzu ntti “mukamihedhi” (na Egregu nzu ntti ninimutonya mulobwana) addagana muya wokoddela, eli guru ehinoneya akala mulobwana obe muyana na Egregu.
