Dhilebiwe na Joau 18:1-40
-
Juda onomuguliha Yezu (1-9)
-
Pedro onogwadda niyaro na Malku na supadda (10, 11)
-
Yezu onottukuleliwa wa Anaz (12-14)
-
Pedro onomukodda Yezu dila yoroma (15-18)
-
Yezu vamentoni va Anaz (19-24)
-
Pedro onomukodda Yezu dila yanawili vina yanouraru (25-27)
-
Yezu vamentoni va Pilato (28-40)
-
“Omwene waga kunkosa epaddi ya elabo ejino” (36)
-
18 Mmalele Yezu ologa esidhá, ovenya na anamasunza aye adhowa epaddi yina ya muwulo wa Sedro,* wenewo wahikala jardim, iyene odhowa mwenemo na anamasunza aye
2 Juda, ole wamuguliha, wahiziwa mburoyá, sabwani Yezu wahitugumanavo dila dhinjidhene na anamasunza aye.
3 Dhahene Juda ohadhana anyakoddo, ang’aneli* arumiwe na anddimuwa a anamakutta na Afarizi, afiya venevale na sakari dha motto, panti vina na dhipano dhorabana koddo.
4 Vano Yezu aziwaga dhotedhene dháfuna ompadduwela, ohasusela vina ohavuza: “Munimutamela ani?”
5 Amwakula: “Yezu Munazareti.” Iyene ohawaddela: “Ddi miyo.” Juda, namaguliha, wali vamodha na awene.
6 Yezu mulogeliye, “Ddi miyo” awene ahiyelela mundduni vina agwela vati.
7 Vano ohavuzavi wili: “Munimutamela ani?” Amwakula: “Yezu Munazareti.”
8 Yezu ohawakula: “Ddihuwaddelani wi ddi miyo. Akala mundditamela miyo, mwattiye attu aba adhowe.”
9 Ejo epadduwele wila yakwanihedheye ejile yalogiliye: “Kaddimuyelelivo nne mmodha mwa abale addivahilenyu.”
10 Venevo Simoni Pedro ovula supadda naniyena, ogwaddana niyaru na mono woja na mudhari wa namakutta munddimuwa. Oddoyá wakuweliwa Malku.
11 Vano Yezu, ohiloga na Pedro: “Keyihedha supadda mwalani. Ddikodde omwa kalisi eddivahile Babaga?”
12 Vano anyakoddo, munddimuwa wa anyakoddo vina ang’aneli a Ayuda amuttidda Yezu ahimmaga.
13 Vamaromo awene amuttukulela wa Anaz, sabwa y’okala moye wa Kayifá wali namakutta munddimuwa yakene-ejile.
14 Txibarene, Kayifá oddu ddule wawaddele Ayuda wi yali yofuneya mulobwana mmodha okwela ovuneya wa attu.
15 Simoni Pedro na namafwara mwina annifwara Yezu. Namafwara oddo, wanziwiwa na namakutta munddimuwa, iyene ovolowa vamodha na Yezu mu kintalo mwa namakuttayá munddimuwa
16 mbwenyi Pedro wali otakulu wa musuwo, vano ole mwina waziwiwa na namakutta munddimuwa, odhowa ologa na mudhari wa muyana wang’anela vamusuwo* vina ohinvolotxiha Pedro.
17 Mudhariya wa Muyana wang’anela vamusuwo, ohinvuza Pedro: “Weyo kuli mmodha wa anamasunza a mulobwana ole?” Iyene ohakula: “Nne, kaddili.”
18 Adhari vina ang’aneli àli waddamana na motto wagasilani ottaga, sabwani elabo yanridha. Pedro vina wali na awene ottaga.
19 Venevo munddimuwa wa anamakutta ohinvuza Yezu sabwa ya anamasunza aye vina sabwa ya masunziho aye.
20 Yezu omwakula: “Miyo ddanlaleya vattaddo attu otene addonaga, mudhidhi wotene ddanloga mmasinagoga* vina mumparhani mwenemo mungumana Ayuda otene. Kaddilogile elo moviteyani.
21 Munddivuzela nni? Mwavuze abale ewale dhilogilemi; awene txibarene anoziwa dhilogilemi.”
22 Mmalele Yezu ologa esidha, mwang’aneli mmodha wali venevale ohinvada omaguguni vina ohiloga: “Onimwakula dhahene namakutta munddimuwa?”
23 Yezu omwakula: “Akala elogilemi jabure, kaddaddele yabureyá elogilemi, mbwenyi akala elogilemi japama, onddivadela eni?”
24 Venevo Anaz omuruma Yezu womagiwene wa namakutta munddimuwa Kayifá.
25 Simoni Pedro wali venevo ottaga, awene ahinvuza: “Weyo vina kuli mmodha wa anamasunza aye?” Iyene okodda alogaga: “Nne, kaddili.”
26 Mudhari mmodha wa namakutta munddimuwa, wali munammudhi wa mulobwana ole wagwaddiwe niyaru na Pedro, ohinvuza: “Miyo kadduwonile mu jardim na iyene?”
27 Venevo Pedro omukodda wili, momaguva mutubi ohunla.
28 Mmalelani amuttukula Yezu wa Kayifá amudhowana vatakulu va governador, yali membesi; mbwenyi awene kavolowile vatakuluva va governador sabwani annova okwarula, ahiwodhe omuja Paskwa.
29 Vano Pilato odhowa ogumana na awene vina ohavuza: “Muladdu gani onimmagedhana nyuwo mulobwana oddu?”
30 Amwakula: “Kowiliwa mulobwana oddu kàli timbwini iyo kanigauperhekeleni.”
31 N’eji Pilato ohawaddela: “Mmuttukule nyuwo mwanya vina mwamuttonge na nlamulo nenyu.” Ayuda amwakula dhahi: “Nne iyo kaninrumelihiwa ompa muttu.”
32 Ejiya epaduwele wi akwanihedheye mazu alogile Yezu onihaga mukwelelo ogakwiliye.
33 Venevo Pilato ovolowa wili mba, omukuwela Yezu vina ohinvuza: “Ddi weyo oli Mwene wa Ayuda?”
34 Yezu omwakula: “Munkosa nivuzo ntto mwaha wawi munfuna muziwe, obe mwawiwale attu ena alogaga mwaha waga?”
35 Pilato omwiyihedha: “Koddi miyo ddili Muyuda? Attu a nlogo nawo vamodha na anddimuwa a anamakutta bawuperekile mmaddani mwaga. Weya okosile eni?”
36 Yezu omwakula: “Omwene waga kunkosa epaddi ya elabo ejino. Kowiliwa Omwene waga wankosa epaddi ya elabo ejino, akamihedhi aga agahiwana wi miyo ddihiperhekiwe mmadani mwa Ayuda. Mbwenyi mwahayá bwawi Omwene waga kahiyo wa elabo ejino.”
37 Venevo Pilato ohinvuza: “Txibarene, weyo oli mwene?” Yezu omwakula: “Ddi nyuwo mwanya munloga wi ddili mwene. Ddibaliwa ddidha mwilaboni wi ddivahe onamoona wa ebaribari. Wotene ole oli mpaddi webaribari onovuruwana lizu naga.”
38 Pilato ohinvuza: “Ebaribari txini?” Mmaleliye ologa dhahene, odhowa wili wali Ayuda vina ohawaddela:
“Kaddinona muladdu womukonana.
39 Ottiya ejo, nyuwo mukaana elemelelo ya miyo onfurula muttu mmodha nsaka na Paskwa. Vano nyuwo munfuna wi miyo ddinfurule Mwene wa Ayuda?”
40 Awene akuwa dila yina: “Mulobwana oddo nne, nininfuna Barabá!” Barabá oddo wali panga.
Manota
^ Muwulo obu kamwali manje, mwakala manje bahi agarubwa muzogwe mwinji.
^ Obe, “ang’aneli a mumparhani.”
^ Obe, “vamavolowelo.”
^ Kang’ana Mazu Atapuleliwe.
