Dhilebiwe na Joau 19:1-42
19 Venevo Pilato omuttukula Yezu vina oruma wi awasuliwe.
2 Anyakoddo aluwa kara* ya minga, amwabaliha mmusorhoni vina amwabaliha guwo yofila,
3 Awene annimususela, alogaga: “Munolejeliwa, Mwene wa Ayuda!” Vina annivada omaguguni.
4 Pilato obudduwa dila yanawili vina ohiloga na nlogo: “Kewani! Ddinomburutxela otakulu wi muziwe yawi kaddinfwanyilena muladdu womukonana.”
5 Yezu obudduwela otakulu banna kara* ya minga mmusorhoni vina babalile guwo yofila. Pilato ohawaddela: “Mmone, Mulobwana oddu!”
6 Mmonele anddimuwa a anamakutta na ang’aneli, akuwa: “Akomeliwe vapingirhizini! Akomeliwe vapingirhizini!”* Pilato ohawaddela: “Kamuttukuleni nyuwo mwanya vina mwamukomele,* sabwani miyo kaddinimonana muladdu wa omuttongana.”
7 Ayuda amwakula: “Iyo nikaana nlamulo, nlamulo ntto ttininfwanyeliha opiwa, sabwani iyene mwinya ddilogile wi ddili mwana Mulugu.”
8 Mwiwale Pilato mazu abo, ottiddiwa wova onddimuwa,
9 vina ovolowa wili mba, ohinvuza Yezu: “Weyo oli wa wuvi?” Mbwenyi Yezu kamwakulile elo-wene.
10 Nona, Pilato ohiloga: “Kunakula elo? Kunziwa wi ddikaana owodha wa oufurula vina ddikaana owodha wa oupiha?”*
11 Yezu omwakula: “Nyuwo txipo kamugakanile owodha wa oddittonga kohivahiwa na Mulugu. Nona muttu oddiperhekile mmadani mwenyu okaana yottega enddimuwa.”
12 Pilato wantamela marhe a onfurulana, vano Ayuda ankuwa: “Muganfurula mulobwana oddo, kamuli marho wa Sézari. Sabwani wotene ole onivikosiha mwene, onomusadduwela Sézari.”
13 Mmaleliye wiwa eso, Pilato omuttukulela Yezu otakulu, ogilati mburo wattongiwa miladdu, wakuweliwa Mburo Osasanyedhiwe na Malugu, na Ebrayiko onkuweliwa Gabatá.
14 Nàli siku na Osasanyedha Mattanga a Paskwa,* yela ottamagela wora tanu na bili.* Iyene ohiloga dhahi na Ayuda: “Mmone, mwene wenyu oddu!”
15 Venevo awene ankuwa: “Apiwe! Apiwe! Akomeliwe vapingirhizini!”* Pilato ohavuza: “Ddimpe mwene wenyu?” Anddimuwa a anamakutta ahakula: “Iyo kaninna mwene, ahili Sézari.”
16 Venevo Pilato ohaperhekela Yezu wi apiwe vapingirhizini.
Dhahene amuttukula Yezu adhowa.
17 Amuttukuliha mwinya pingirhizi,* adhowa mburo onkuweliwa mburo wa Nigalagadha, na Ebrayiko onkuweliwa Gólgota.
18 Wenewo amukomela Yezu vapingirhizini vari va alobwana eli, mmodha epaddi ya mono waye woja, mwina epaddi ya mono waye wemara.
19 Pilato ohilebiha vina mazu ekiliye vapingirhiziniva.* Mazuyá aloga: “Yezu Munazareti Mwene wa Ayuda.”
20 Ayuda enjene ahengesa yolebayá, sabwani mburo wakomeliwe Yezu vapingirhizini wali vakuvi na sidadi vina yalebiwe na Ebrayiko, Elatím vina na Egregu.
21 Venevo anddimuwa a anamakutta a Ayuda ahiloga dhahi na Pilato: “Kamulebe ‘Mwene wa Ayuda’ mbwenyi mulebe dhahi, iyene ologile, ‘Miyo ddili Mwene wa Ayuda.’”
22 Pilato ohakula: “Elebilemi, ddileba.”
23 Mmalelani omukomela Yezu vapingirhizini, anyakoddoyá attukula guwo dhaye vina agawa dhipaddi nayi; munyakoddo mmodha-mmodha ottukula epaddi yaye vina attukula yabalo yaye. Mbwenyi yabaloyá kiyasoniwe, yaluwiwe oromana odhulu ofiyedha mutxiddo.
24 Nona aloga muttu na mukwaye: “Kanitaye, mbwenyi nitamele omuziwa na gari bani onahalena.” Eji epadduweli wi dhakwanihedheye dhilebiwe mmaleboni: “Agawelana guwo dhaga, atamela oziwa na gari bani onahalena dhabalo dhaga.” Jijuwene-wene ekosile anyakoddoyá.
25 Vakuvi na pingirhizi* vakomeliwe Yezu, wahimelavo maye, mbale wa maye, Maria mwadhi wa Kléopa na Maria Madalena.
26 Yezu moneliye wi maye vamodha na namasunza wamukweletxa iyene àli vakuvi, ohiloga dhahi na maye: “Muyana wé! Oddu ddi mwanawo!”
27 Vina ohiloga na namasunzayá: “Oddu ddi mamayawo!” Oromana venevale namasunzayá omuttukulela vatakulu vaye.
28 Mmalele esidhá, aziwaga wi dhotedhene dhimala wireya vina wi dhakwanihedheye dhilebiwe mmaleboni, Yezu ohiloga: “Ddipiwa nttona.”
29 Venevo vahikala mukatte mwadhalile vinyu yonyunya. N’eji attukula esponja abwiniha mvinyunimwá yonyunya ahika omurereni wa hisopo* vina ahika omulomoni waye.
30 Yezu mvaheliwiye vinyu ejile yonyunya ohiloga: “Dhotedhene dhihakwanela!” Oworomiha musorho, ohikwa.*
31 Vowi nàli siku N’osasanyedhiwa wa Sabuddu, Ayuda kafuna wi maningo a alobwana abale akalevi vapingirhizini ofiyedha Sabuddu (sabwani Sabudduna nali ninddimuwa), venevo Ayuda amukumbirha Pilato wi myeddo dha alobwana abale dhindiwe vina maningoyá, aburutxiwevo.
32 Nona anyakoddo adhowa vina ahinda myeddo dha mulobwana woroma na dha mwina wakomeliwe epaddi yina ya Yezu.
33 Mbwenyi mfiyedhani vàli Yezu, ahona wi wamala okwa, nona kendile myeddo dhaye.
34 Mbwenyi munyakoddo mmodha omulata na mwalago, mudhidhene obo valatiwiye vabudduwa nikami vina manje.
35 Ole wonile esidhá onovaha onamoona, onamoona waye kwa ebaribari vina iyene onoziwa wi onloga ebaribari wi nyuwo vina murumele.
36 Txibarene, eji epadduwele wi dhakwanihedheye dhilebiwe mmaleboni: “Kaninendiwe nigogoddo naye nne nimodha.”*
37 Vina epaddi yina ya malebo enloga: “Anele omwang’ana ole omulatilani.”
38 Mmalele dhilobo esi, Jozé w’o Arimateya wali namasunza wa Yezu moviteyani mwaha wa wawova Ayuda, omukumbirha Pilato wi aburutxevo maningo a Yezu, Pilatoyá omurumeliha. Dhahene odhowa oburutxavo maningoyá.
39 Nikodemo, mulobwana wadhowilege ogumana na Yezu dila yoroma na mattiyu, odhana makura a mira na makura a alowe alemela waddamela kilu 33.*
40 Awene attukula maningo a Yezu vina apopottela na guwo dha linyu, akuttulela makura onukela afwaraga elemelelo ya Ayuda agasasanyedhaga maningo wi enteriwe.
41 Mburo wakomeliwiye,* wahikala jardim mwali ekutta eswa mwikuttanimwa* mwali muhinekiwaga muttu.
42 Vowi nàli siku nasasanyedha Ayuda Sabuddu vina ekuttayá yali vakuvi, ahika maningo a Yezu mwenemo.
Manota
^ Obe, “mwereko.”
^ Na egregu, “korowa.”
^ Obe, “mumpe vapingirhizini! mumpe vapingirhizini!”
^ Obe, “mwamukomele vapingirhizini.”
^ Obe, “oukomela vapingirhizini?”
^ Apa nzu ntti “Paskwa” ninaddiwana sumana ya Paskwa vamodha na mattanga a pawu dhotowa emela.
^ Na egregu, “wora yanotanu na modha, [nzuwa banimalile opattuwa].”
^ Obe, “mmukomele vapingirhizini.”
^ Kang’ana Mazu Atapuleliwe, anloga: “Pingirhizi ya goyi.”
^ Kang’ana Mazu Atapuleliwe, anloga: “Pingirhizi ya goyi.”
^ Kang’ana Mazu Atapuleliwe, anloga: “Pingirhizi ya goyi.”
^ Kang’ana Mazu Atapuleliwe.
^ Obe, “ottiya ovuma.”
^ Obe, “otwiwa.”
^ Obe, “libara 100.” Kuloga, libara ya akadda Roma.
^ Obe, “wakomeliwiye vapingirhizini.”
^ Obe, “masiye a aliba okwa anubuweliwa na Mulugu.”
