Dhilebiwe na Joau 2:1-25
2 Siku nanoraru, akosiwa mattanga a matelo o Kaná w’o Galileya vina mayi wa Yezu wali wenewo.
2 Yezu na anamasunza aye vina akuweleliwa vamattanganiva a matelo.
3 Vinyu efunaga omala, mayi wa Yezu omwaddela: “Aweneya kanna vinyu.”
4 Vano Yezu omwakula: “Muyana wé, abo kahiyo makani ehu! Mudhidhi waga kunatti ofiya.”
5 Venevo maye ohawaddela abale agawayá: “Mukose esile dhinalogiye.”
6 Venevaleva dhahikalavo mikatte mitanu na mmodha dha malugu mwekiwa manje, dhahene ninga mwarumela magano a Ayuda a ovikoddelihana. Mukatte mmodha-mmodha wannakwanela malituru* 44 obe 66.
7 Venevo Yezu ohawaddela: “Karugelani manje mmikattenimwa.” Awene arugela, adhaliha tapwa-tapwa.
8 Yezu ohawaddela: “Karuganimo vang’onovi mwanvahe mwimeleli wa mattangayá.” Awene akosa dhawene.
9 Mwimeleli wa mattangayá mweheliye manjeya asadduliwe bakala vinyu, ahiziwaga vadhile vinyuyá (masiki emeleli arugile manjeya aziwaga), mwimeleliyá omukuwela muteliyá
10 omwaddela: “Otene anroma wagawela attu vinyu yoziva, attuyá agamala olezela, wagawela vinyu yodaba. Weyo okoya vinyu yozivayá mpaka ovanene.”
11 Yezu okosile ejiya o Kaná elabo y’o Galileya ninga omaromo wa vizinddiyelo dhaye vina ohoniha nttittimiho naye, nona anamasunza aye amuroromela.
12 Mmalelani, Yezu, mamayaye, abalaye, vamodha na anamasunza aye adhowa o Kafarnau, vano kagonelilewo masiku menjene.
13 Wela waddamela Paskwa wa Ayuda, nona Yezu odhowa o Jeruzalemi.
14 Iyene ohafwanya mumparhani abale aguliha ng’ombe, mabila, kangayiwa vina anamatxinja kobiri, bagilatile mmipaddoni mwawa.
15 Mmaleliye orinta muwasulo wa kabala, ohattamagiha otene àli mumparhani, na mabila awa, ng’ombe dhawa, orahila kobiri dha anamatxinja kobiri na meza awa.
16 Ohawaddela abale aguliha kangayiwa: “Kaburutxanimo esidhá! Kamusaddule nyumba ya Babaga jikala mburo wa marhondda!”*
17 Anamasunza aye ahubuwela mazu alebiwe, awi: “Okwela waga nyumba yenyu onele oligana na motto onttidda mmurimani mwaga.”
18 Venevo Ayuda ahinvuza: “Ezinddiyelo gani enanilagihe weyo, enoniha wi okaana owodha wa okosana esidhá?”
19 Yezu ohawakula: “Kagujulani mparha obu, mwari mwa masiku mararu miyo ddinele wimetxa.”
20 Vano Ayuda ahiloga: “Mparha obu omagiwe mwari mwa vyaka 46, weyo onfuna wimetxe mwari mwa masiku mararu?”
21 Mbwenyi mparha walogiye ba maningo aye.
22 Mvenyihedhiwiye mukwani, anamasunza aye ahubuwela wi iyene wanloga esodhá. Awene arumela mazu alebiwe mmaleboni vina dhalogile Yezu.
23 Iyene bali o Jeruzalemi, vamattangani a Paskwa, enjene aroromela nzina naye, onaga vizinddiyelo dhotedhene dhakosiye.
24 Vano Yezu kaakuluveletxa, sabwani wannaziwa otene,
25 vina katamela waddeliwa mikalelo dha attuyá, sabwani wanziwa.
Manota
^ Na egregu, “mpimo minli obe miraru.” Enkala ninga mpimo onaddiwana veneva wali wa batu, batu modha yakwanela malituru 22.
^ Obe, “musika.”
