Dhilebiwe na Joau 20:1-31
20 Siku noroma na sumana, Maria Madalena ofiya membesene wikuttani,* vali vahinayetxa vina ohona wi nlugu nafugiwenawo niburutxiwawo.
2 Dhahene, iyene odhowa attamagaga wi agumane na Simoni Pedro vamodha na namasunza wakweliwetxa na Yezu vina ohawaddela: “Amuttukulamo Nabuya mwikuttani, kaninziwa omuttiyilani.”
3 Venevo, Pedro na namasunza mwina adhowa wikuttaniwá.
4 Oheli aroma ottamaga vamodha, vano namasunza ole mwina omukwaranya Pedro, okala woromaya ofiya wikuttaniwa.
5 Muworomeliye ang’anamo, wonile guwovi dha linyu dhattiyiwe mwenemo, vano kavolowilemo.
6 Vasogorhova Simoni Pedro wanfwara, ofiya vina; mvoloweliye mwikuttanimwa wonilemo guwovi dha linyu.
7 Guwo yamagiwena musorho waye kiyataganyihiwe na dhina, mbwenyi yattiyiwe vawa-vene yopottiwene.
8 Venevo namasunza mwina wafiyile wikuttani vamaromo ovolowamo, ohona vina ororomela.
9 Sabwani awene kanonelamo epaddi ya malebo yaloga wi yanfuneya wi iyene avenyihiwe mukwani.
10 Dhahene, anamasunzayá ahiyelela vatakulu.
11 Vano, Maria ohala onlaga otakulu waddamela ekuttayá. Oku onlagavi, oworoma ohang’ana mwikuttanimwa,
12 vina ohawona anju eli abalile dhotxena bagilatile vekiwe maningo a Yezu, mmodha omusorho mwina omyeddo.
13 Awene ahinvuza: “Muyana wé, onunlela nni?” Iyene ohawakula: “Amuttukula Nabuyaga vina kaddinziwa omuttiyilani.”
14 Mmaleliye ologa eso, iyene ozugunuwa vina omona Yezu venevale wowimelene, mbwenyi kazinddiyelile wi wali Yezu.
15 Yezu ohinvuza: “Muyana wé, onunlela nni? Onimutamela ani?” Maria obuwelaga wi wali namasasanyedha jardim, iyene omwakula: “Nabuya, akala ddi nyuwo omburutxilemo, kaddaddeleni omuttiyilenyu, miyo ddinele omudhowelawo.”
16 Venevo Yezu ohiloga: “Maria!” Mariyayá muzugunuweliye ohiloga na Ebrayiko: “Raboni!” (entapulela “Namasunziha!”)
17 Yezu omwaddela: “Kaddittiye, sabwani miyo kaddinadhowa wa Baba. Mbwenyi kadhowa wagumane na abalaga vina wawaddele: ‘Miyo ddindhowa wa Babaga oli Babinyu, vina wa Mulugu waga oli Mulugu wenyu vina.’”
18 Maria Madalena ohidhowana mpaganyoyá wa anamasunza aye, ohiloga: “Miyo ddimona Nabuya!” Vina ohawaddela dhaddeliwiye na Yezu.
19 Vati vahimala oriba, sikuna-nttile nàli siku noroma na sumana, misuwo dha mburo mwali anamasunza dhali dhofugiwadhene mwaha wa wawova Ayuda, venevo Yezu ottanyuwa valani vina ohawaddela: “Murenddele okale na nyuwo.”
20 Mmaleliye ologa eso, ohalagiha mada aye vina valatiwiye. Venevo anamasunzayá attaba mmonelani Nabuya.
21 Yezu ohalogana dila yanawili: “Murenddele okale na nyuwo. Dhahene ninga muddirumile Baba miyo vina ddinourumani.”
22 Mmaleliye ologa eso, ohavudhelela vina ohawaddela: “Kakelani muya wokoddela.
23 Nyuwo mugamulevelela muttu okosile yottega, Mulugu onomulevelela. Vano mugahimulevelele muttu okosile yottega, Mulugu vina kanimulevelela.”
24 Vano Tomé, mmodha wa Kumi na Eli, wakuweliwa vina Munakono, kàli na awene mudhidhi wattanyuwile Yezu.
25 Venevo anamasunza ena amwaddela: “Iyo nimona Nabuya!” Vano iyene ohawakula: “Ddigahone mmadani mwaye mwakomeliwiye na peregu, ddiddiginya makwadda aye a peregu vina ddittidda valatiwiye, txipo kaddinarumele.”
26 Mvirele masiku matanu na mararu, anamasunza aye àli otugumanene dila yanawili vina Tomé wali na awene. Masiki misuwodhá vàlani dhofugiwadhene, Yezu ottwanyuwa vina ohiloga: “Murenddele okale na nyuwo.”
27 Venevo Yezu ohiloga na Tomé: “Kéka ebuno yawo apa vina koona madaga; katapula nlada nawo, wike valatiwemi, kattiya waganyedha* vina ororomele.”
28 Tomé omwakula alogaga: “Nabuya waga vina Mulugu waga!”
29 Yezu omwiyihedha: “Onrumelela sabwa ya oddona? Ohagalala babale ahonile vano anrumela.”
30 Txibarene, Yezu okosa matikiniho meena menjene vamentoni va anamasunza aye ahilebiwe mu nivuru mpu.
31 Mbwenyi, esi dhilebeliwe wi nyuwo muroromele wila Yezu ddi Kristu, mwana wa Mulugu vina mwa ororomela mukaane egumi yohimala mwa nzina naye.
