Dhilebiwe na Joau 21:1-25
21 Mvirele esi, Yezu odha* dila yanawili vari va anamasunza aye bali o nyaza y’o Tiberiade. Iyene woneyile dhahi:
2 Simoni Pedro wali vamodha na Tomé (wakuweliwa Munakono), Nataniyel wo Kaná elabo y’o Galileya, ana a Zebedeu na anamasunza aye ena eli.
3 Simoni Pedro ohawaddela: “Ddindhowa ddattadde.” Awene amwakula: “Iyo ninoufwara.” Dhahene adhowa, awela mmwanddiyani, mbwenyi omattiyuyá obule kapile elo.
4 Vati vayaga, Yezu wali nikome na nyaza, mbwenyi anamasunza aye kazinddiyelile wi ddi Yezu.
5 Venevo, Yezu ohavuza: “Anaga, mukaana elobo* eng’onovi yoja?” Awene ahimwakula: “Kaninna.”
6 Iyene ohawaddela: “Kavokelani mulabayá epaddi ya mono woja wa mwamddiyá, munele opa oba.” Dhahene awene atuputxedha, vano kawodha oweta mulabayá mwaha wa winjiva wa oba.
7 Nowidhawo, namasunza wakweliwetxa na Yezu ohiloga na Pedro: “Ddi Nabuya!” Mwiwale Simoni Pedro wi ddi Nabuya, ohabala* guwodhaye vowi wali yovi,* olupela munyaza.
8 Mbwenyi anamasunza ena ahiyela na mwanddiya mung’ono, awetaga mulabayá mwadhalile oba, sabwani kali wolapelana na otakulu, wahalile ottamagela meturu 90.*
9 Mutitelani mmwanddiyanimwa, ahona motto na oba vadhuluva vina pawu.
10 Yezu ohalogana: “Kadhanina oba dhing’onovi dhipilenyu ovanene.”
11 N’eji Simoni Pedro owela mmwanddiyani, owetela otakulu mulaba mwadhalile oba, oba 153 dhinddimuwa, masiki dhenjivilevi mulabayá kuwatayeyile.
12 Yezu ohawaddela: “Kadhaunoni muje.” Vano kavo nne namafwara mmodha owodhile olibiha murima wi anvuze wila: “Muli ani?” Sabwani anziwa wi wali Nabuya.
13 Yezu ohawaddamela, ottukula pawu ohavaha vina okosa yakakene na oba.
14 Eji yali dila yanoraru yattwanyuweli Yezu anamasunza aye, mmaleliye ovenyihiwa mukwani.
15 Mmalelani oja, Yezu ohinvuza Simoni Pedro: “Simoni mwana Joau, weyo onoddikwela opitta esi?” Iyene omwakula: “Ndde Nabuya, nyuwo munoziwa wi miyo ddinoukwelani.” Yezu omwiyihedha: “Kasapihaga mabilaga.”
16 Ohinvuza vina dila yanawili: “Simoni mwana Joau, weyo onoddikwela?” Iyene omwakula: “Ndde Nabuya, nyuwo munoziwa wi miyo ddinoukwelani.” Yezu ohimwiyihedha: “Kakumbuza ana-mabilaga.”
17 Iyene ohinvuzavi dila yanoraru: “Simoni mwana Joau, weyo onoddikwela-wene?” Pedro ohikubanya mwaha wa Yezu onvuza dila yanoraru: “Weyo onoddikwela-wene?” Nona iyene ohiloga: “Nabuya nyuwo munoziwa dhilobo dhotene, munoziwa wi miyo ddinoukwelani.” Yezu ohimwiyihedha: “Kajiha ana-mabilaga.
18 Ddinouwaddela ebaribari, buli muzombwe wannabala wamwinya vina wandhowa wafuniwe, vano ogoluvala ogantapula myono dhawo wi muttu mwina auwabalihe vina auttukulele ohinfuniwe.”
19 Yezu ologeli ejo wi onihe mukwelo wa Pedro, obuwene ogamuttittimihiliyena Mulugu, mmaleliye ologa eso, omwaddela: “Kaddifwaregevi.”
20 Muzugunuwele Pedro, ohona wi namasunza ole wakweliwetxa na Yezu wela wafwara, oddoya ddule wamusamelile Yezu vamurimani mudhidhi wajani vina anvuza: “Oddoyá bani onfuna ougulihani?”
21 Muzugunuwele Pedro amona, ohinvuza Yezu: “Nabuya txini enampadduwele mulobwana oddu?”
22 Yezu omwakula dhahi: “Miyo ddigafuna wi iyene akalewovi ofiyedha nsaka nineyelemi, enupatta txini? Weyo oddifwaregevi.”
23 Dhahene ehivuwa vari va abali wi namafwarayá oddo kagakwile. Vano, Yezu kalogile wi iyene kagakwile, mbwenyi walogile: “Miyo ddigafuna wi iyene akalewovi ofiyedha nsaka nineyelemi enupatta txini?”
24 Namasunza oddo ddule wonile esodhá vina aleba, vina iyo ninoziwa wi onamoona waye kwebaribari.
25 Txibarene, dhikalawo dhina dhinjene dhikosile Yezu, kowiliwa dhotene dhahilebiwa, ddinona wi mwilaboni kamugakalile mburo ogakwaneli rolu dhigalebiwe.
Manota
^ Obe, “ohoneya.”
^ Obe, “oba.”
^ Obe, “wahimaga.”
^ Obe, “wabalile guwo dha mwari.”
^ Na egregu, “waddamela kovadu 200.”
