Dhilebiwe na Joau 3:1-36
3 Munikuruni mwa Afarizi mwahikala mulobwana wakuweliwa Nikodemo, wali munddimuwa wa Ayuda.
2 Iyene odha ogumana na Yezu na mattiyu vina ohiloga: “Rabi, ninoziwa wi mudhile ninga namasunziha wa Mulugu, vowi kawo onwodha okosa vizinddiyelo dhinkosinyu, Mulugu ahili na iyene.”
3 Yezu omwakula dhahi: “Ddinouwaddelani ebaribari: Muttu agahibaliwe wili,* kanawodhe wona Omwene wa Mulugu.”
4 Nikodemo ohinvuza: “Enwodheya dhavi muttu wowuluvala obaliwa wili? Koddi enowodheya wiyelela mbani mwa maye, babaliwa wili?”
5 Yezu omwakula: “Ddinouwaddelani ebaribari, akala muttu kambaliwa na manje vina na muya wokoddela, kanawodhe ovolowa Mumweneni mwa Mulugu.
6 Ole obaliwe na muttu, mwana-muttu, ole obaliwe na muya wokoddela, mwana Mulugu.
7 Kamutikine mwaha wa miyo ouwaddelani wi: Enofuneya nyuwo obaliwa wili.
8 Pevo enobela onfunani vina enowiweya orumawa, vano kunziweya ondhani nne ondhowani. Yakakene jinpadduwa na ole ombaliwa na muya wokoddela.”
9 Nowidhawo Nikodemo ohinvuza: “Dhilobo esi dhinwodheya dhavi?”
10 Yezu omwakula: “Nyuwo muli namasunziha wa mw’Izrayel, masiki dhawene kamunziwa esidhá?
11 Ddinouwaddelani ebaribari, ninloga dhinziwehu vina ninovaha onamoona wa dhonilehu, vano nyuwo kamunrumela onamoona omvaha iyo.
12 Akala miyo ddihuwaddelani dhilobo dha vati vano kamunrumela, munarumele dhavi ddigauwaddelani dhilobo dha wirimu?
13 Ottiya ejo, kawo muttu owelile wirimu ahili ole otitile wirimuwa, Mwana-Muttu.
14 Vina dhahene ninga mutomeyile Mizé nowa mwiddeddereni, Mwana-muttu vina onele otomeyiwa,
15 wi wotene ole onamuroromele, akaane egumi yohimala.
16 “Mulugu okwela vaddiddi elabo* ofiyedha omperheka nammodha waye wi otene animuroromela ahitolotxiwe, mbwenyi akaane egumi yohimala.
17 Sabwani, Mulugu kamurumile Mwanaye vatapano wila attonge elabo, mbwenyi omurumele wila elaboya evuneye mwaha waye.
18 Ole onimuroromela kanattongiwe. Ole ohinimuroromela omala ottongiwa, sabwani karoromelile nzina na Mwana, nammodha wa Mulugu.
19 Ntti tti nipara n’ottongiwa: Txeza edha mwilaboni vano attu akweletxe eddima ottiya txeza, vowi merelo awa àli abure.
20 Sabwani wotene ole onira dhabure, onowidda txeza vina kanfiyedha txezayá wi merelo aye anadhe oneye.*
21 Vano ole onkosa ejile eli ebaribari, onowaddamela txeza wi oneye-wene wi merelo aye anowiwanana na efunelo ya Mulugu.”
22 Mmalelani, Yezu vamodha na anamasunza aye adhowa murudda w’o Judeya, okala wenewo mudhidhi mwinjene na awene vina wannabatiza attu.
23 Mbwenyi Joau wannabatiza attu o Enón vakuvi va Salím sabwani wahikala manje menjene. Attu andhowa vàliye vina ambatiziwa.
24 Nsaka-nene ntto, Joau wali ahinatti ofugeliwa mukambura.
25 Venevo anamasunza a Joau àpambihana na Muyuda mmodha mwaha wa okoddelihiwa.
26 Awene adhowa omwaddela Joau: “Rabi, mulobwana oddule wali na nyuwo epaddi yina y’o Jordau, ovahilenyu onamoona waye onobatiza; vina attu otene anodhowa oliye.”
27 Joau ohawakula dhahi: “Kayiwo elobo nne modha enakela muttu ahivahiwe wirimu.
28 Nyuwo mwanya muli anamoona a esile dhilogilemi, dderaga: ‘Miyo kaddili Kristu, vano ddirumiwe osogorho waye.’
29 Muteliwi,* ddwa muteli.* Marho wa muteli, agakala vakukuvi amwiwaga mukwayeya otelile onoziveliwa vaddiddi sabwa ya lizu na ole otelileyá. Nona ohagalala waga ohakwana.
30 Mabasa a Kristu anelege winjiva, aga anelege ovuguwa.”
31 Ole ondha odhulu munddimuwa, opitta attu otene. Wa vati, ddwa vati vina onloga dha vati. Ole ondha wirimu munddimuwa opitta attu otene.
32 Iyene onovaha onamoona wa esile dhoniliye vina dhiwaliye vano kavo onrumela onamoona waye.
33 Ole onrumela onamoona waye, onokuluvela wi Mulugu ddwebaribari.
34 Ole orumiwe na Mulugu, onovuwiha miselu dha Mulugu, sabwani Iyene onovaha muya wokoddela ahipimaga.
35 Baba onomukwela Mwana vina ohimperhekela dhilobo dhotene mmadani mwaye.
36 Onimuroromela Mwana okaana egumi yohimala, vano ohinimwiwelela kanakane egumi. Owali wa Mulugu onele okalavi na iyene.
Manota
^ Obe txino, “agahibaliwe modhela wirimu.”
^ Obe, “attu a mwilaboni.”
^ Obe, “okoddiwa.”
^ Obe, “noiva.”
^ Obe, “noivu.”
