Dhilebiwe na Joau 4:1-54
4 Mmalele Nabuya oziwa wi Afarizi ahiwa wi Yezu onowakosa anamasunza vina onowabatiza attu ejene opitta Joau—
2 masiki Yezu ahibatizaga, mbwenyi bali anamasunza aye abatizaga,—
3 iyene obudduwa o Judeya odhowa wili o Galileya.
4 Vano yanfuneya ovira o Samariya.
5 Dhahene ofiya sidadi modha y’o Samariya enkuweliwa Sikar, waddamana na mundda wa Jakob wanvahiliye mwanaye Jozé.
6 Vamunddaniva vahikala ntxela* na Jakob. Yezu wolemene na oleddo wakosiliye, ogilati nikome na ntxelana. Wali mudhidhi wa wora 12.*
7 Ofiyavo muyana mmodha wa Musamariya wi aruge manje. Yezu ohiloga: “Kaddivamo manje mang’onovi.”
8 (Anamasunza aye adhowile musidadi ogula dhoja.)
9 Vano muyana ole wa Musamariya ohiloga: “Nyuwo muli Muyuda, munddikumbirha dhavi manje, oku miyo baddili Musamariya?” (Sabwani Ayuda kewanana na akadda Samariya.)
10 Yezu omwakula: “Weyo koziwa mvaho wa Mulugu, vina komuziwa onuwaddela, ‘Kaddivamo manje mang’onovi,’ weyo ogahimukumbirha, iyene vina agahuvaha manje a egumi.”
11 Muyana ole ohinvuza dhahi Yezu: “Nabuya, nyuwo kamunna nne ngafuna baldi yorugana manje vina ntxelana ttovaya. Kito munadhena wuvi manje abo amvaha egumi?
12 Nyuwo muli munddimuwa ompitta muzamani wehu Jakob, onivahile ntxela nimwile iyene, anaye vamodha na dhinama dhaye?”
13 Yezu omwakula alogaga: “Wotene ole ommwa manje aba onele okaana wili nttona.
14 Onamwe manje ananvahemi kanakane vina nttona, mbwenyi manjeyá ananvahemi, anele okala mwa iyene ninga fukuwa ya manje amvaha egumi yohimala.”
15 Muyanayá ohiloga: “Nabuya, kaddivaheni manje abo wi ddihikane nttona, nne ddihidhe vina mburo obuno oruga manje.”
16 Yezu omwaddela: “Kadhowa wamukuwele mamuno odhena okuno.”
17 Muyana ole ohakula: “Kaddinna mamunaga.” Yezu omwiyihedha: “Ohakula pama mwa ologa wi ‘Kaddinna mamunaga.’
18 Sabwani wahiteliwa na alobwana atanu, vina mulobwana onna weyo ovanene, kahiyo mamunawo. Elogiliwe ebaribari.”
19 Muyanayá ohiloga: “Nabuya, ddinoona wi nyuwo muli namavuhulela.
20 Azamani ehu ebedha vamwangoni apa, vano nlogo nenyu ninloga wi mburo onfwanyela webedhiwaga ku o Jeruzalemi.”
21 Yezu omwakula: “Ddinouwaddela ebaribari, muyana wé, onofiya mudhidhi ohinamwebedhiginyu Baba nne vamwangoni apa nne vina o Jeruzalemi.
22 Nyuwo kamunimuziwa onimwebedhinyu, vano iyo ninomuziwa onimwebedhihu, sabwani ovuneya oniteya mwa Ayuda.*
23 Mbwenyi onodha mudhidhi vina ofiya, onfuna anamebedha ebaribari omwebedhaga Baba na muya vina na ebaribari, sabwani Baba onatamela abuwene wila amwebedhege.
24 Mulugu muya, nona abale animwebedha, anofuniwana omwebedhaga na muya vina na ebaribari.”
25 Muyanayá ohiloga: “Miyo ddinoziwa wi onodha Mesiya onkuweliwa Kristu. Iyene agafiya onele onaddela dhilobo dhotedhene.”
26 Venevo Yezu omwaddela: “Ddi miyo-wene, onloga na weyo.”
27 Mudhidhene obule anamasunza aye afiya vina atikina, vowi iyene waloga na muyana. Mbwenyi kavo omvuzile: “Txini enfunenyu na muyana oddu?” obe “Munlogelani na muyanayá oddu?”
28 N’eji muyana ole, ottiya mukatte waye wa manje, odhowa musidadi wawaddela attu, eraga:
29 “Ndhoweni mwamone mulobwana dhahi ologile dhotedhene dhikosilemi. Txino iyeneyá kahiyo Kristu?”
30 Attu abo abudduwa musidadi adhowa ogumana na Yezu.
31 Esodhá dhipadduwaga, anamasunza aye annimudidela iyene, alogaga: “Rabi, karomani oja.”
32 Venevo iyene ohawaddela: “Ddikaana yoja ehinziwenyu.”
33 Venevo anamasunzaye aroma ovuzana mukalelani: “Okalawo omudhelena yoja?”
34 Yezu ohawakula: “Oja waga ku okosa ofuna wa ole oddirumile vina opuliha mabasaye.
35 Nyuwo kamunloga wi dhihalile myeri minayi wi nsaka n’osinanga nirome? Kewani dhinuwaddelani miyo: Kattukulelani mento enyu odhulu, kang’anani mmunddani, mumala wittwa wi musinangiwe. Oromana ovanene
36 namasinanga onowakela enlabeliye vina onoddoddela milima. Milimadhá, babale anfuna wakela egumi yohimala; wila namaala na namasinanga ahagalale vamodha.
37 Mazu aba b’ebaribari, anloga wi: Mmodha namaala, mwinayá namasinanga.
38 Miyo ddihurumani wi mwasinange ehalilenyu. Ena alaba na guru, vano nyuwo munopurelamo na mabasa awa.”
39 Akadda Samariya enjene a sidadi ejile amuroromela mwaha wa onamoona wavahile muyana ole, walogile: “Iyene oddaddela dhotedhene dhikosilemi.”
40 Mfiyedhani vàli Yezu, amuloba wi akale na awene, Iyene okala wenewo masiku meli.
41 N’eji, enjene amuroromela mwaha wa esile dhilogiliye,
42 Amwaddela muyanayá: “Iyo kaninrumelela bahi mwaha wa esile dhilogiliwe, sabwani iyo nanya nimwiwa vina ninorumela wi mulobwana oddu mvuni wa elabo.”
43 Omamalelo wa masiku abo meli, iyene ovenya odhowa o Galileya.
44 Mwinyene Yezu wanloga* wi namavuhulela kanttittimihiwa mwilaboni mwaye.
45 Mfiyedhiye o Galileya, akadda Galileyayá amwakela pama vowi ahona dhotene dhakosiliye vamattangani o Jeruzalemi, sabwani awene vina ahidhowawo omattanganiwa.
46 Venevo iyene odhowa wili o Kaná, w’o Galileya wasadduliliye manje akala vinyu. Wenewowa wahikala mwimeleli wa mwene wanna mwana wa muredda wali o Kafarnau.
47 Mulobwana oddo mwiwaliye wi Yezu ovenya o Judeya, ondhowa o Galileya, ohinfwarela vina omukumbirha wi anvulumutxe mwanaye sabwani wali nena n’okwa.
48 Yezu ohiloga: “Nyuwo txipo kamunarumele mugahone vizinddiyelo nne matikiniho.”
49 Mwimeleli ole wa mwene ohiloga: “Nabuya, kadhaunoni mwanaga ahinatti okwa.”
50 Yezu omwaddela: “Kadhowa, mwanawoyá ovulumuwa.” Mulobwanayá ororomela mazu alogile Yezu, odhowa vyaye.
51 Iyene adhowaga, ohagumanana adhari aye adhowa omwaddela wi mwanayeyá mugumi.*
52 Venevo iyene ohavuza wora yavulumuwiliye. Awene amwakula: “Febiriyá emuttiyile nzilo mudhidhi wa wora 13.”*
53 Babe ozinddiyela wi yali wora yakakene yamwaddele Yezu wi: “Mwanawoyá ovulumuwa.” N’eji otene a vatakulu vaye amuroromela.
54 Eji dila yanawili ekosile Yezu ezinddiyelo mmaleliye obudduwa o Judeya adhowaga o Galileya.
Manota
^ Obe, “fukuwa.”
^ Na egregu, “wora yanotanu na modha [nzuwa banimalile opattuwa].”
^ Obe, “onroma na Ayuda.”
^ Obe, “wanvaha onamoona.”
^ Obe, “ela ovulumuwa.”
^ Na egregu, “wora yanotanu na bili [nzuwa banimalile opattuwa].”
