Dhilebiwe na Joau 5:1-47
5 Mmalele dhotedhene eso, akosiwa mattanga a Ayuda vina Yezu wahidhowa o Jeruzalemi.
2 O Jeruzalemi, waddamana na Musuwo wa Mabila, okala nttadda ninna makodde matanu, ninkuweliwa na Ebrayiko Betzatá.
3 Mburo obule vanginanti aredda enjene, aliba ohona, aragali, vina attu akwile myono na myeddo.
4 * ——
5 Venevale vahikala mulobwana wali muredda mwa vyaka 38.
6 Yezu mmoneliye mulobwana ole woginantene venevale vina aziwaga wi wali muredda mwa vyaka dhinjidhene, ohinvuza: “Weyo onofuna ovulumuwa?”
7 Mureddayá ohakula: “Nabuya, kaddinna muttu woddika muttaddanimwá manjeyá agaddiginyeyaga, nona ddigafunaga oviburulelamo, mwinagu onodhowa osogorho waga.”
8 Yezu omwaddela: “Kavenya! Ottukule bondde* nawo vina wedde.”
9 Momaguva-mwene mulobwanayá ovulumuwa, ottukula bondde* naye vina oroma wedda.
Sikuna nttile nàli Sabuddu.
10 Nona Ayuda aroma ologana mulobwanayá w’avulumutxiwe, eraga: “Ddabuno Sabuddu, kinrumelihiwa ottukula bondde* nawo.”
11 Iyene ohawakula: “Mulobwana oddivulumutxile oddaddela, ‘Ottukule bondde* nawo wedde.’”
12 Awene ahinvuza: “Mulobwana oddo bani owaddele, ‘Ottukule bondde* nawo vina wedde’?”
13 Mulobwanayá wavulumutxiwe kamuziwile bani wanvulumutxile, vowi Yezu wahirimela vari va muttitti wali venevo.
14 Osogorhowa Yezu ohinfwanya mumparhani vina omwaddela: “Kang’ana, ddabuno ovulumuwa. Onattege wili, enadhe yupadduwele yottabwayá.”
15 Mulobwanayá odhowa vina ohawaddela Ayuda wi wanvulumutxile ddi Yezu.
16 Nona Ayuda aninfwara-fwara Yezu, sabwani iyene wakosa esidhá siku na Sabuddu.
17 Venevo ohawaddela: “Babaga, onolabavi ofiyedha ovanene, nona miyo vina ddinolaba.”
18 Nona Ayuda antamela venjivene ompa, sabwani ottiya olupavi Nlamulo na Sabuddu, wanloga vina wi Mulugu ddi Babe, aviladdanihaga na Muluguyá.
19 Venevo Yezu ohawaddela: “Ddinouwaddelani ebaribari, Mwana kankosa nne elobo modha na ofuna waye, mbwenyi onkosa esile dhinimoniye Babe akosaga. Sabwani esile Dhinkosiye, Mwanaye vina onkosa dhawene.
20 Vowi Babi onomukwela Mwanaye, onomutonyihedha dhotedhene dhinkosiye vina onele omutonyihedha mabasa manddimuwa opitta aba, wi nyuwo mutikine.
21 Moligana na Baba, onavenyiha attu mukwani vina avaha egumi, Mwana vina onowavaha egumi abale anafuniyena.
22 Baba kanimuttonga muttu, vano ottongawa omukuluvelina Mwanaye,
23 wi otene amuttittimihe Mwana dhahene ninga munimuttittimihelani Baba. Ohinimuttittimiha Mwana, kanimuttittimiha Baba omurumile.
24 Ddinouwaddelani ebaribari, oniwa mazu aga vina amurumela Ole oddirumile, okaana egumi vina kanattongiwe sabwani ovira mukwani bafwanya egumi.
25 “Ddinouwaddelani ebaribari, onodha mudhidhi, vina ofiya, onewe abale akwile lizu na Mwana Mulugu vina anafwaseyele ovuruwana anele okalawo.
26 Mwebaribari, Baba nipara na egumi,* nona iyene vina ohinvaha mwanaye owodha wa okala nipara na egumi.
27 Nona Mulugu ohinvaha mwana owodha wa ottonga sabwani iyene ddi Mwana-muttu.
28 Kamutikine esidhá, onofiya mudhidhi onewe attu otene ali mmasiye* lizu naye
29 abudduwe mmasiye, abale akosile dhilobo dhapama, avenyihedhiwe egumi yohimala; abale akosile dhilobo dhabure, avenyihedhiwe ottongiwa.
30 Miyo kaddinwodha okosa nne elobo modha na ofuna waga. Ddinttonga na esile dhiniwemi vina ottonga waga koligana, sabwani kaddintamela okosa ofuna waga, mbwenyi ofuna wa ole oddirumile.
31 “Akala miyo meka ddinovaha onamoona waga, onamoonawa onvahemi kahiyo webaribari.
32 Okalawo mwina omvaha onamoona waga, vina miyo ddinoziwa wi onamoonawa onvahiye mwaha waga bwebaribari.
33 Nyuwo muharuma attu wa Joau, iyene ohavaha onamoona wa ebaribari.
34 Vano miyo kaddinrumela onamoona wa muttu, mbwenyi ddinlogela esidhá wi nyuwo muvuneye.
35 Mulobwana ole wali panti y’attidda vina yang’animela, mwa mudhidhi mung’onovi nyuwo mwafuna ottaba venjene na txeza yaye.
36 Vano onamoona waga onddimuwa opitta wa Joau, sabwani mabasa addirumile Babaga okosa, mabasa aba anttiddemi, anowoniha wi Baba ddiddirumile.
37 Mwinyene Baba oddirumile, ovaha onamoona waga. Nyuwo txipo kamunewaga lizu naye nne kamunonaga ekalelo yaye,
38 vina nzu naye kanili mwa nyuwo, sabwani kamunimurumela ole omurumiliye.
39 “Nyuwo munogilatela opepesa Malebo mubuwelaga wi munele ofwanyamo egumi yohimala, mbwenyi ba malebo akakene amvaha onamoona waga.
40 Vano, nyuwo kamunfuna odha wa miyo wila mufwanye egumi.
41 Miyo kaddintamela ottittimihiwa na attu,
42 mbwenyi miyo ddiziwa wi nyuwo kamunimukwela Mulugu.
43 Miyo ddidha na nzina na Babaga, nyuwo kamuddakelile. Kodha muttu mwina na nzina naye, nyuwo mugamwakela.
44 Munaddirumele dhavi, oku muttittimihagana muttu na mukwaye, muhitamelaga ottittimihiwa na Mulugu mmodha?
45 Kamubuwele wi miyo ddinele ousumelani vamentoni va Baba. Okalawo onausumeleni, Mizé, vowi ddi iyene omuroromelinyu.
46 Txibarene nyuwo komurumela Mizé, mugahiddirumela miyo vina, sabwani iyene oleba mwaha waga.
47 Mbwenyi akala kamunrumela dhilebiliye, munawodhe dhavi orumela dhinlogimi?”
Manota
^ Versikulu eji enofwanyeya mmaBibiliani meena, mbwenyi mmapapini awale okuluveleya kinfwanyeyamo.
^ Obe, “kama.”
^ Obe, “kama.”
^ Obe, “kama.”
^ Obe, “kama.”
^ Obe, “kama.”
^ Obe, “okaana mvaho wa egumi.”
^ Kuloga, masiye a aliba okwa anubuweliwa na Mulugu.
