Dhilebiwe na Joau 6:1-71
6 Mmalele esodhá Yezu ovenya odhowa kobela yina ya nyaza y’o Galileya, obe y’o Tiberiade.
2 Vina muttitti mwinjene ohinfwara, sabwani annona vizinddiyelo dha matikiniho akosiye, àvulumutxaga aredda.
3 Nowidhawo, Yezu owela vamwangoni vina ogilati venevo na anamasunza aye.
4 Wela waddamela Paskwa, mattanga a Ayuda.
5 Yezu mwang’aneliye, ona wi muttitti mwinjene wa attu wela omwaddamela, ohinvuza Filipi: “Nagule wuvi pawu dhinawakwanele attu aba otene?”
6 Mbwenyi walogela ejoyá wi amwehe, sabwani wanziwa yafuniye okosa.
7 Filipi omwakula: “Pawu dha muttengo wowakwana adenáriyu* 200 kadhinakwana wi ngafuna muttu-muttu aje vang’onovi.”
8 Namasunza waye mmodha, André, mbali wa Simoni Pedro, ohilogana dhahi:
9 “Apa vakala muzombwe dhahi mmodha, onna pawu tanu na oba bili dhing’ono, mbwenyi esidhá dhinowawakwanela attu aba otene?”
10 Yezu ohiloga: “Kàrumeni attu abo agilati.” Mburo obule wahikana mani menjene, venevo agilati attu 5.000.
11 Yezu ottukula pawu esile, mmaleliye olobelela, ohagawela otene agilatile venevo, okosana yakakene oba esile bili dhing’ono. Awene aja ninga mwafunelani.
12 Vano mmalelani wakwanana, Yezu ohawaddela anamasunza aye: “Kaguddelani pedaso dhihalilevo, wi vananongeye elo.”
13 Venevo addoddela pedaso dhahalilevo dha pawu esile tanu, dhatxelelile attu abale, adhaliha middanga* 12.
14 Attu abale monelani ezinddiyelo yakosiliye, aroma ologa: “Oddu txibarene ddi namavuhulela wafwanyela odha mwilaboni.”
15 Venevo Yezu muziweliye wi attuyá afuna amuttomele omwene, ovenyavo ohiyelela yeka omwangoni.
16 Muribele vati, anamasunza aye adhowa onyaza,
17 awela mmwanddiyani adhowaga kobela y’o Kafarnau. Vati vahiriba vina Yezu wali ahinatti wafwara.
18 Nyazayá yahitagala sabwa ya pevo yoba na guru enddimuwa.
19 Mmalelani otxapa makilometuru matanu obe matanu na nimodha,* amona Yezu eddaga vadhulu va nyaza, asuselaga mwanddiya, mmonelani ahova.
20 Venevo iyene ohawaddela: “Ddi miyo, kamove!”
21 N’eji awene anfuna omwakela mmwanddiyani mwawa, momaguva-mwene mwanddiyayá ofiya okobela yina, mburo wadhowani.
22 Mmangwananimwá muttitti mwina wa attu wali kobela yina ya nyaza ahona wi kavali mwanddiya. Walivo mwanddiya mmodha mung’ono, mbwenyi Yezu kawelile mwanddiya obo na anamasunza aye, sabwani anamasunzayá adhowile oka.
23 Venevo myanddiya dhina dhadhana o Tiberiade, dhafiya mburo obule wajile attu pawu dhalobeleli Nabuya.
24 Monele attu a muttitti wi nne Yezu nne anamasunza aye kali wenewale, awela mmwanddiyani mwawa vina adhowa o Kafarnau amutamelagawo Yezu.
25 Munfwanyelani Yezu kobela yina ya nyaza, ahinvuza: “Rabi, okuno mufiyilewo mudhidhi gani?”
26 Yezu ohawakula: “Ddinouwaddelani ebaribari, nyuwo kamundditamelela mwaha wa vizinddiyelo dhonilenyu, mbwenyi mundditamelela mwaha wa pawu dhijilenyu mwakwanana.
27 Kamulabele oja onnongeya, mulabele oja onkalawo, omvaha egumi yohimala, onauvaheni Mwana-muttu. Sabwani Baba, mwinyene Mulugu ohinvaha ezinddiyelo enoniha wi onomurumela.”
28 Venevo ahinvuza: “Nirege eni wila nikose mabasa a Mulugu?”
29 Yezu ohawakula: “Aba ba mabasayá a Mulugu, mmuroromele ole omurumiliye.”
30 Ahinvuza: “Ezinddiyelo gani enakosinyu wila none, nurumeleni? Munakose mabasa gani?
31 Azamani ehu aja maná mwiddeddereni dhahene ninga mulebeliwani: ‘Iyene ohuvahani pawu ya wirimu wi muje.’”
32 Venevo Yezu ohalogana: “Ddinouwaddelani ebaribari, Mizé kauvahileni pawu ya wirimu, Babaga ddinuvahani pawu yebaribari ya wirimu.
33 Sabwani pawu ya Mulugu jijile entita wirimu vina envaha egumi.”
34 Awene aloga: “Nabuya, kanivahegenivi pawu ejo.”
35 Yezu ohawakula: “Miyo ddili pawu ya egumi. Ondha wa miyo kanakane vina dala, onddiroromela kanakane vina nttona.
36 Vano ninga muwaddeleleni miyo, nyuwo muddona mbwenyi kamunddiroromela.
37 Otene abale anddivaha Babaga anele odha wa miyo, vina miyo txipo kaddinamukodde ole ondha wa miyo,
38 sabwani miyo ddititile wirimu, kaddidhele okosa ofuna waga, vano ddidhele okosa ofuna wa ole oddirumile.
39 Ofuna wa ole oddirumile kuku: Wi ddihimuyelele nne mmodha wa abale otene addivahiliye, mbwenyi ddavenyihe mukwani siku nomariha.
40 Vowi ofuna wa Babaga kuku: Wotene ole onimuziwa Mwana vina onimuroromela akaane egumi yohimala; miyo ddinele onvenyiha mukwani siku nomariha.”
41 Venevo Ayuda aroma omuloga bure, sabwa ya iyene ologa: “Miyo ddili pawu etitile wirimu.”
42 Vina aroma ologa: “Oddu kahiyo Yezu mwana Jozé, iyo kannimuziwa babe na maye? Onloga dhavi wi, ‘Miyo ddititile wirimu’?”
43 Yezu ohawakula: “Muttiye waba mukalelenyu.
44 Kawo onwodha odha wa miyo, ahili Baba oddirumile, omukukusa, miyo ddinele onvenyiha siku nomariha.
45 Anamavuhulela ahileba: ‘Otene anele osunzihiwa na Yehova.’ Muttu ddi muttu onimwiwa Baba vina onsunza, onodha wa miyo.
46 Kawo muttu omonile Baba, ahili bahi oddule odhile wa Mulugu, oddo ddimonile Baba.
47 Ddinouwaddelani ebaribari, onroromela onofwanya egumi yohimala.
48 “Miyo ddili pawu ya egumi.
49 Azamani enyu aja maná mwiddeddereni vano ahikwa.
50 Eji pawu entita wirimu, wi otene abale anja, ahikwe.
51 Miyo ddili pawu ya egumi etitile wirimu. Akala muttu onoja pawu eji, onokalawo namukalakala; txibarene pawu envahimi ba maningo aga wila attu a velaboni ya vati afwanye egumi.”
52 Venevo, Ayuda aroma opambihana mukalelani, alogaga: “Enwodheya dhavi muttu oddu onivaha maningo aye wila nije?”
53 Yezu ohawakula: “Ddinouwaddelani ebaribari, mugahije maningo a Mwana-muttu vina mugahimwe nikami naye kamunafwanye egumi.
54 Onja maningo aga vina ommwa nikami naga, onele ofwanya egumi yohimala vina miyo ddinele onvenyiha mukwani siku nomariha.
55 Sabwani maningo aga, oja webaribari vina nikami naga, yomwa yebaribari.
56 Onja maningo aga vina ommwa nikami naga onokala mumodhani na miyo, vina miyo ddinokala mumodhani na iyene.
57 Dhahene ninga miyo onkalawo sabwa ya Babaga oliwo vina oddirumile, ole onja maningo aga onele okalawo mwaha waga.
58 Eji pawu etitile wirimu, mbwenyi kinligana na ejile yajile azamani enyu, masiki dhawene akwa. Onja pawu eji onele okalawo namukalakala.”
59 Yezu ologile dhotedhene esi asunzihaga musinagoga* o Kafarnau.
60 Mwiwalani eso, enji mwa anamasunza aye ahiloga: “Eso dhilogiliye s’orutxa, bani onwodha ovuruwana?”
61 Yezu aziwaga wi anamasunza aye anonong’ona sabwa ya ejuwene, ohavuza: “Ejiya enoukwakwattutxani?
62 Txini egapadduwile, nyuwo komona Mwana-muttu awelaga okule waliye wale?
63 Bu muya wokoddela omvaha egumi, maningo kanna ttima. Dhinulaleyani miyo sa muya wokoddela vina dhinovaha egumi.
64 Vano akalavo ena mwa nyuwo ahinrumela.” Sabwani Yezu wannaziwa ovenyana omaromo abale ahamuroromela vina wannimuziwa ole ogamugulihile.
65 Iyene ohenjedhedha: “Nona miyo ddigauwaddelagani wi kawo onwodha odha vali miyo, ahili Baba ofunile wi addifware.”
66 Mwaha wa ejuwene, anamasunza aye enjene ahiyelela dhilobo dhattiyilani mundduni, kedda vina na iyene.
67 Venevo Yezu ohavuza dhahi arumiwi aye Kumi na Eli: “Nyuwo vina munfuna mudhowe?”
68 Simoni Pedro omwakula: “Nabuya, ninanfware ani? Onna mazu amvaha egumi yohimala ddi nyuwo.
69 Iyo ninororomela vina ninoziwa wi nyuwo muli Mukoddeli wa Mulugu.”
70 Yezu ohawakula: “Kahiyo miyo wusakulileni nyuwo kumi na eli? Vano mmodhavo wa nyuwo muttambi.”*
71 Mwebaribari, Yezu wamulogana Juda mwana Simoni Iskariote, sabwani mulobwana oddu, agamuguliha masiki valiyevi mmodha wa Kumi na Eli.
Manota
^ Kobiri ya parata y’o Roma. Kang’ana Mazu Atapuleliwe.
^ Obe, “sesto.”
^ Na egregu, “estadiyu 25 obe 30.” Estadiyu modha yakwanela meturu 185.
^ Kang’ana Mazu Atapuleliwe, anloga: “Sinagoga.” Obe txino, “mburo watugumana attu enjene.”
^ Obe, “Ddiabo.”
