Dhilebiwe na Joau 7:1-52
7 Mmalelani, Yezu oroma oleddo wa odhowa o Galileya sabwani kafuna odhowa o Judeya, vowi Ayuda afuna ampe.
2 Vano Mattanga a Misasa a Ayuda ela waddamela.
3 Abalaye amwaddela dhahi: “Kabudduwanimo mpuno mudhowe o Judeya wi anamasunza enyu one mabasa ankosenyu.
4 Sabwani kawo ontamela oziwiwa vanamwinjini oku akosaga dhilobo moviteyani. Akala nyuwo munokosa esidhá, mukose attu otene auwonagani.”
5 Mwebaribari, abalaye kamuroromela.
6 Venevo, Yezu ohawaddela: “Mudhidhi waga kunatti ofiya, mbwenyi mwa nyuwo mudhidhi-mudhidhivi bwa pama.
7 Nyuwo kamunna mwaha wa widdiwa na attu a mwilaboni, mbwenyi anddidda miyo, sabwani ddinolaleya merelo otakala ankosani.
8 Kadhowani omattangani. Miyo kaddinadhowewo ovanene omattangani oko, sabwani mudhidhi waga kunatti ofiya.”
9 Mmaleliye wawaddela eso, iyene ohala o Galileya.
10 Mbwenyi mudhowele abalaye omattanganiwá, iyene vina odhowawo moviteyani, ahoniwaga.
11 Nona Ayuda aroma omutamela vamattanganiva, alogaga: “Mulobwana oddule oli wuvi?”
12 Muttitti wa attu walivo, wannimwaba. Ena anloga: “Iyene mulobwana wapama.” Oku ena aloga: “Nne kahiyo, iyene onowanyengetta attu.”
13 Mwebaribari kawo wamuloga vanamwinjini, sabwani annawova Ayuda.
14 Mattangayá bali vari, Yezu odhowa mumparhani vina oroma osunziha.
15 Ayuda atikina vina anloga: “Muttu oddu owodhile dhavi okaana eziwelo dhahene ya Malebo, oku iyeneyá ahidhowile oskola?”*
16 Yezu ohawakula: “Dhinsunziha miyo kahiyo dhaga, sa ole oddirumile.
17 Akala muttu onofuna okosa efunelo ya Mulugu, onele oziwa akala dhinsunzihemi sa Mulugu, obe akala dhinlogimi dhimbudduwa mmurimani mwaga.
18 Onloga dha mmirimani mwaye ontamela ovittittimiha mwinya. Vano ontamela nttittimiho na ole omurumile, onologa dhebaribari vina kanna yovirigana.
19 Mizé ohuvahani Nlamulo, kauvahileni? Mbwenyi kavo mmodha mwa nyuwo oniwelela. Muntamelelani oddipa?”
20 Muttittiyá ohakula: “Weyo ovolowiwa domonyo, bani ontamela oupa?”
21 Yezu ohakula dhahi: “Miyo ddikosile ntikiniho nimodha, mbwenyi nyuwo motene muli otikinene.
22 Karomani otanalela eji: Mizé ouvahani nlamulo na otxetteliwa—nlamulona kahiyo iyene odhilena mbwenyi ba azamani enyu—vina nyuwo munomutxettela muttu siku na sabuddu.
23 Akala muttu onotxetteliwa siku na sabuddu wi Nlamulo na Mizé nihilupiwe, kito musilidheliwe nni vaddiddi na miyo, mwaha wa miyo onvulumutxa muttu siku na sabuddu?
24 Muttiye omuttonga muttu mufwaraga dhinonenyu, mbwenyi muttongege mufwaraga oligana.”
25 Venevo attu ena a mu Jeruzalemi aroma ologa: “Mulobwana ole ontameliwa wi apiwe kahiyo oddu?
26 Kamoneni! iyene onosunziha vanamwinjini, vano attuyá kanimukosana elo. Koddi anddimuwa ehu anubuwela wi ddi Kristu?
27 Iyo ninoziwa odhile mulobwana oddu, vano Kristu agadha kavo onaziwe onadheliye”
28 Yezu asunzihaga mumparhani, ohiloga na lizu noliba: “Nyuwo munoddiziwa vina munoziwa ondhelemi. Miyo kaddidhile n’ofuna waga, mbwenyi Ole oddirumile ddwebaribari, vano nyuwo kamunimuziwa.
29 Miyo ddinomuziwa sabwani ddidhile na nzina naye, vina ddi Iyene oddirumile.”
30 Vano antamela omuttidda, mbwenyi kawo owodhile omuttiddawa, sabwani mudhidhi waye wali ohinatti ofiya.
31 Attu enjene a muttitti obule amuroromela vina anloga: “Kristu agadha onele okosa matikiniho menjene opitta aba ankosa mulobwana oddu?”
32 Afarizi ahiwa muttitti wa attu onong’onaga esidhá mwaha waye, venevo anddimuwa a anamakutta na Afarizi aharuma ang’aneli* wi amuttidde.*
33 Yezu ohawaddela: “Ddinele okala na nyuwo mudhidhi mung’onovi ddihinatti odhowa wa Ole oddirumile.”
34 Nyuwo munele odditamela, mbwenyi kamunaddifwanye, vina ondhowemi nyuwo kamunwodha ofiyawo.
35 Venevo, Ayuda aroma ologa oka-oka: “Mulobwanayá oddu onfuna adhowe wuvi oko ohinawodhe iyo onfwanya? Koddi onubuwela odhowa wa Ayuda ankala na Agregu, àsunzihege Agregu?
36 Iyene onfuna aloge eni na mazu aba: ‘Nyuwo munele odditamela, mbwenyi kamunaddifwanye, vina ondhowemi nyuwo kamunwodha ofiyawo’?”
37 Siku nomariha, siku ninddimuwa na mattangaya, Yezu ovenya, ohiloga na lizu noliba: “Ole onna nttona, adhe wa miyo, amwe.
38 Dhahene ninga munlogela malebo: ‘Ole onddiroromela vamurimani vaye vanele obudduwa manje amvaha egumi.’”
39 Vano alogaga esodhá, walogana muya wokoddela wafuna wakela abale amuroromela; ofiyedha venevale kavo wavahiwe muya wokoddela, sabwani iyene wali ahinatti ottittimihiwa.
40 Vari va muttitti, attu ena ewale mazu aba aroma ologa dhahi: “Txibarene oddu Namavuhulela.”
41 Ena anloga: “Oddu ddi Kristu.” Oku enayá aloga: “Koddi Kristu onadhe o Galileya?
42 Koddi malebo kanloga wi Kristu onadhe mu nihimoni na Davidi, o Belemi murudda odhile Davidi?”
43 Venevo muttitti ogaweya mwaha waye.
44 Enagu afuna ammage, mbwenyi kawo wawodha omuttidda.
45 Mudhidhene obo ang’aneliyá ahiyelela wa anddimuwa a anamakutta na wa Afarizi, abayá ahavuza eraga: “Mukoddele nni omudhana?”
46 Ang’aneli abale ahakula dhahi: “Kawo mulobwana onwodha ologa ninga iyene.”
47 N’eji Afariziyá ahiloga: “Nyuwo vina mul’onyengettiwa?
48 Okalawo mmodha wa anddimuwa ehu obe wa Afarizi onimuroromela iyene?
49 Vano, attu abo a muttitti ahinziwa Nlamulo amala ogwihedhiwa ntowa.”
50 Nikodemo wadhowilege ologa na Yezu, wali mmodha wawa, ohawaddela:
51 “Koddi Nlamulo nehu ninomuttonga muttu ahinatti ovuruwaniwa vina eziweya enkosiye?”
52 Awene amwakula dhahi: “Weyo vina oli w’o Galileya? Kapepesa, onowona wi kawo namavuhulela onadhe o Galileya.”*
Manota
^ Kuloga, eskola ya arabinu.
^ Obe, “ang’aneli a mumparhani.”
^ Obe, “ammage.”
^ Mapapi menjene a Bibilia awale vina okuluveleya kanna mazu anromana versu 53 ofiyedha kapitulu 8 versu 11.
