Dhilebiwe na Joau 8:12-59
8 12 Venevo Yezu ohiloga wili na attu abale, eraga: “Miyo ddili txeza ya mwilaboni. Ole onddifwara miyo, kanedde mwiddimani mbwenyi onele okaana txeza ya egumi.”
13 Afarizi amwakula dhahi: “Nyuwo munovaha onamoona wenyu-wene, onamoonawa kahiyo webaribari.”
14 Yezu ohawakula: “Masiki miyo ddivahe onamoona waga-wene, onamoonawa kwebaribari, sabwani miyo ddiziwa ondhemi vina ondhowimi. Vano nyuwo kamunziwa ondhemi nne ondhowimi.
15 Nyuwo munttonga mufwaraga dhubuwelo dha attu,* miyo kaddinimuttonga muttu.
16 Vano masiki miyo ddittonge, ottonga waga kwebaribari sabwani kaddili meka, mbwenyi Baba oddirumile oli na miyo.
17 Mmalamuloni mwenyu vina mulebiwa wi: ‘Onamoona wa attu eli kwebaribari.’
18 Miyo ddinovaha onamoona waga, vina Babani oddirumile onovaha onamoona waga.”
19 N’eji awene ahinvuza: “Babinyu oli wuvi?” Yezu ohawakula: “Nyuwo kamunddiziwa nne vina kamunimuziwa Babaga, koddiziwa miyo, mugamuziwa vina Babaga.”
20 Yezu ologile mazu aba asunzihaga mumparhani, bali mburo wa kasha dha mvaho. Vano kawo wawodha omuttidda sabwani mudhidhi waye wali ohinatti ofiya.
21 Yezu ohawaddela wili: “Miyo ddinodhowa, nyuwo munele odditamela vano munele okwa muttegani mwenyu. Ondhowimi nyuwo kamunwodha odhowawo.”
22 Venevo Ayuda aroma ologa dhahi: “Iyeneyá onfuna avipe? Onlogelani wi ‘ondhowimi, nyuwo kamunwodha odhowawo.’”
23 Iyene ohenjedhedha: “Nyuwo muli attu a vatapano, vano miyo ddili wa wirimu. Nyuwo muli a mwilaboni, miyo kaddili wa mwilaboni mpuno.
24 Nona ddigauwaddelagani wi nyuwo munele okwa na dhottega dhenyu, sabwani akala kamunddiroromela miyo munele okwa na dhottega dhenyu.”
25 Ahinvuza: “Weyo ol’ani?” Yezu ohawakula: “Miyo ddinlogela nni na nyuwo?
26 Miyo ddikaana dhilobo dhinjene dh’ologa mwaha wenyu vina ddikaana mwaha dhinjene dha ottonga. Txibarene, Ole oddirumile onloga ebaribari nona miyo ddinlaleya mwilaboni dhiddaddele Ole oddirumile.”
27 Awene kanonelemo wi Yezu wamulogana Babi wa wirimu.
28 Venevo Yezu ohawaddela: “Mugamala omutomeya Mwana-muttu munele oziwa wi miyo ddili iyene, vina kaddinkosa elo na ofuna waga ddamwinya, vano ddinloga esile dhiddisunzihile Babani.
29 Ole oddirumile, oli na miyo. Iyene kaddittiyile meka, sabwani ddinokosavi dhotene dhinimuzivela.”
30 Mmalele Yezu ologa esene, attu enjene amuroromela.
31 Venevo Yezu ohawaddela dhahi Ayuda amuroromela iyene: “Mwavirihamo mazu aga, muli-wene anamasunza aga,
32 vina munele oziwa ebaribari, ebaribariyá enele oufurulani.”
33 Awene amwakula: “Iyo nili ana Abrahamu, txipo kaninakalaga adhari a muttu. Munloga dhavi, ‘Nyuwo munele ofuruleya’?”
34 Yezu ohawakula: “Ddinouwaddelani ebaribari, ole ondidela okosa yottega onkala mudhari wa yottega.
35 Ottiya ejo, mudhari kankala vatakulu malabo otene, vano mwana ddinkala vatakulu malabo otene.
36 Vano akala mwana onoufurulani, txibarene munele ofuruleya.
37 Miyo ddiziwa wi muli ana Abrahamu. Vano munotamela oddipa, sabwani kamunrumela mazu aga.
38 Miyo ddinkosa esile dhonilemi baddili na Babaga, vano nyuwo munkosa esile dhiwalenyu na babinyu.”
39 Awene amwakula alogaga dhahi: “Babihu ddi Abrahamu.” Yezu ohawiyihedha: “Kowiliwa Abrahamu wali babinyu, mugankosa esile dhikosile Abrahamu.
40 Vano nyuwo muntamela oddipa miyo, ouwaddeleni ebaribari yiwalemi na Mulugu. Abrahamu kerile dhawene.
41 Nyuwo munkosa mabasa a babinyu.” Awene amwakula: “Iyo kanili ana abaliwe muraruwani,* ninna Babi mmodha bahi, Mulugu.”
42 Yezu ohawaddela: “Mulugu kokala Babinyu, mugaddikwela, sabwani miyo oli veneva, ddidhile wa Mulugu. Miyo kaddidhile na ofuna waga, mbwenyi iyene ddiddirumile.
43 Munkoddelani ononelamo dhinlogimi? Sabwani kamunwodha wiwa mazu aga.
44 Nyuwo muli ana a babinyu Ddiabo, vina munfuna mukose ofuna wa babinyu. Iyene wali panga ovenyana omaromo, vina kemelile mwibaribarini sabwani kanna ebaribari. Agalogaga dhozivala, onloga dha mmurimani mwaye, sabwani namazivala vina babi wozivala.
45 Vano miyo ddihuwaddelani ebaribari, nyuwo kamunddirumela.
46 Bani wa nyuwo onloga wi miyo ddamuttegi? Akala dhinlogimi s’ebaribari munkoddela nni oddiroromela?
47 Ole oli wa Mulugu onovuruwana mazu a Mulugu. Nona nyuwo muhivuruwanaga sabwani kamundhela wa Mulugu.”
48 Ayuda amwakula alogaga: “Iyo kanilogile ebaribari wi ‘Nyuwo muli mu Samariya vina muvolowiwa domonyo’?”
49 Yezu ohawakula: “Miyo kaddivolowiwe domonyo, mbwenyi ddinimuttittimiha Babaga, vano nyuwo munoddiveyiha.
50 Miyo kaddintamela nttittimiho naga, Okalawo ontamela vina oddo ddinttonga.
51 Ddinouwaddelani ebaribari, akala muttu onowiwelela mazu aga, kanakwe vina.”
52 Ayuda aloga dhahi: “Ovano niziwa wi nyuwo muvolowiwa domonyo. Abrahamu okwa, anamavuhulela akwa vina, vano munloga wi ‘Akala muttu onowiwelela mazu aga, kanakwe vina.’
53 Koddi nyuwo muli munddimuwa ompitta babihu Abrahamu okwile? Anamavuhulela vina akwa. Nyuwo munubuwela wi muli ani?”
54 Yezu ohakula: “Miyo ddigavittittimiha ddamwinya, nttittimiho naga ttebewene. Onddittittimiha ddi Babaga, ole onloginyu wi ddi Mulugu wenyu.
55 Nyuwo kamunimuziwa, mbwenyi miyo ddinomuziwa. Miyo kologa wi kaddinimuziwa, ddigali muttambi ninga nyuwo. Vano miyo ddinomuziwa vina ddinowiwelela nzu naye.
56 Babinyu Abrahamu ohagalala ajedhelaga wona siku naga, iyene ohona vina ohagalala.”
57 Venevo Ayuda aloga dhahi: “Nyuwo kamunatti okaana vyaka 50, munloga dhavi wi mumona Abrahamu?”
58 Yezu ohawakula: “Ddinouwaddelani ebaribari, Abrahamu ahinatti okalawo, miyo ddahikalawovi.”
59 Venevo addodda malugu wi anponyedhe, vano Yezu ovitala vina obudduwamo mumparhani.
Manota
^ Obe, “magano a attu.”
^ Obe, “ogonihana wonyakuwa.” Na egregu, porneya. Kang’ana Mazu Atapuleliwe.
