Dhilebiwe na Joau 9:1-41
9 Yezu aviraga, omona mulobwana wabaliwe wohonene.
2 Venevo anamasunza aye ahinvuza: “Rabi, mulobwana oddu obaliwe wohonene, ottegile ddi iyene obe ba amambali aye?”
3 Yezu ohakula: “Nne mulobwana oddu kattegile nne amambali aye kattegile, mbwenyi ejiya epadduweli wi attu one mabasa a Mulugu.
4 Enofuneya wi nikose mabasa a Ole oddirumile bili mutana, vowi omattiyu onofiya ohinawodhe muttu olaba.
5 Oku miyo baddilivi mwilaboni, ddili txeza ya elabo.”
6 Mmalele Yezu ologa eso, oturela mara vati, na marayá omunyana mattaka ohika mmentoni mwa muliba ohonayá
7 omwaddela dhahi: “Kadhowa wasusule ottaddani n’o Silowe” (Silowe entapulela “Orumiwe”). Iyene odhowa vina osusula, ohiyela onaga.
8 Venevo anamwanddamani aye vamodha na abale amona akumbirhaga esmola, anvuzana: “Mulobwana oddu kahiyo ole wakala wogilatene akumbirhaga esmola?”
9 Ena anloga: “Ddi iyene.” Oku ena ampambiha: “Kahiyo, mbwenyi onladdana na iyene.” Iyene mwinya waloga: “Ddi miyo-wene.”
10 Ahinvuza: “Mento awo afuguwile dhavi?”
11 Iyene ohakula: “Mulobwana dhahi onkuweliwa Yezu, omunya mattaka ohika mmentoni mwaga, oddaddela, ‘Kadhowa o Silowe, wasusule.’ Miyo ddidhowa, ddisusula vina ddiroma wona.”
12 Venevo awene ahinvuza: “Mulobwanayá oddo oli wuvi?” Iyene ohawakula: “Kaddinziwa.”
13 Amuttukulela wa Afarizi mulobwana ole, wahona wale.
14 Siku ntto namunyile Yezu mattaka afugulana mento aye, nàli Sabuddu.
15 Vano Afarizi vina aroma omvuza mulobwanayá wi mento aye afuguliwe dhavi. Mulobwanayá ohawakula: “Iyene olomunya mattaka beka mmentoni mwaga, miyo baddisusula, ovano ddinowona.”
16 Afarizi ena ahiloga: “Mulobwana oddo kahiyo wa Mulugu, sabwani kankoya siku na Sabuddu.” Oku ena anloga: “Enwodheya dhavi muttu oli muttegi okosa matikiniho ninga aba?” Venevo vahiteya ogawana.
17 Ahinvuza wili muliba ohonayá: “Weyo onila wi iyene bani, vowi ofugula mento awo?” Mulobwanayá ohakula: “Iyene namavuhulela.”
18 Ayuda karumela wi mulobwanayá ole wali muliba ohona vina ovulumutxiwa, venevo ahifiyedha wakuweliha amambali aye.
19 Ahavuza: “Oddu ddi mwaninyu onlogiwa wi obaliwe wohonene? Kito ovano onwodha wona dhavi?”
20 Amambali aye ahakula: “Ninoziwa wi oddu ddi mwanihu vina obaliwe wohonene.
21 Vano kaninziwa emuwodhihile wona vina kannimuziwa ofugule mento aye. Munvuze mwinya. Iyeneyá ohunuwa. Onowodha ouwakulani.”
22 Amambali aye alogele ejuwene sabwani annawova Ayuda. Vowi Ayuda ahimala olaganela wi ole onimurumela Yezu ninga Kristu attamagihiwe mu sinagoga.*
23 Jijene yattukuleli amambali aye ologa: “Munvuze mwinya, iyeneyá ohunuwa.”
24 Nowidhawo, amukuwela dila yanawili mulobwanayá ole wavulumutxiwe vina alogana: “Omuttittimihe Mulugu,* ninoziwa wi mulobwana oddo muttegi.”
25 Mulobwanayá ohiloga: “Akala iyene muttegi, miyo kaddinziwa. Enziwemi jawi miyo kaddona ovano ddinowona.”
26 Ahinvuza: “Iyene wukosele eni? Ofugulile dhavi mento awo?”
27 Iyene ohawakula: “Miyo ddihuwaddelani, mbwenyi nyuwo kamuddivuruwanile, muntamelela nni wiwa eso wili-wili? Nyuwo vina munfuna-to mukale anamasunza aye?”
28 N’eji amwakula dhahi na nipwazo: “Weyo oli namasunza wa mulobwana oddo, mbwenyi iyo nili anamasunza a Mizé.
29 Ninoziwa wi Mulugu ologile na Mizé, vano mulobwana oddo kaninziwa ondheliye.”
30 Mulobwanayá ohawakula: “Eji txibarene jotikiniha, nyuwo kamunziwa ondheliye, vano iyene ofugula mento aga.
31 Ninoziwa wi Mulugu kanavuruwana attegi, mbwenyi akala muttu onomova Mulugu vina onokosa ofuna waye, iyene ononvuruwana muttu oddo.
32 Ovenyana masaka awale kineweyaga wi okalawo ofugulile mento a muttu obaliwe wohonene.
33 Mulobwana oddo kohirumiwa na Mulugu, kagawodhile okosa elo.”
34 Awene amwakula: “Weyo obaliwe na dhottega gwé, ovano onfuna onisunzihe iyo?” Nowidhawo amuttamagiha!
35 Yezu ohiwa wi awene amuttamagiha vina munfwanyeliye ohinvuza: “Onomuroromela Mwana-muttu?”
36 Mulobwanayá ohakula: “Nabuya, oddoya bani wi miyo ddimuroromele?”
37 Yezu omwakula: “Weyo omona, dduddwene onloga na weyo.”
38 Mulobwanayá ohiloga: “Nabuya, miyo ddinomuroromela.” Venevo okokora* osogorho waye.
39 Yezu ohiloga: “Miyo ddidha mwilaboni wi elaboyá ettongiwe; abale ahinona, onege oku abale anona, ahonege.”
40 Afarizi ena àli na iyene ahiwa esidhá vina ahiloga: “Kuloga iyo vina nili attu ohona?”
41 Yezu ohawakula: “Nyuwo kokala aliba ohona, kamugavahiwe muladdu wa yottega. Vano, vowi munloga: ‘Ninowona.’ Yottega yenyu kinaleveleliwe.”
Manota
^ Kang’ana Mazu Atapuleliwe.
^ Aba ali mazu alogiwa wi onihe wila muttuyá onofuniwana ologa ebaribari.
^ Obe, “ahimuttittimiha.”
