Karta ya Juda 1:1-25
1 Miyo Juda, mwimeleli wa Yezu Kristu, mbali wa Tiago, ddinowalebela abale akuweliwe vina ankweliwa na Mulugu Baba, anakale vamodha na Yezu Kristu:
2 Mulugu auwenjedhedheni ttagaraga, murenddele na okwela.
3 Abalaga okweleya, ddanfuna venjene oulebelani mwaha wa mukalelo onanivune Mulugu, mbwenyi ddihona wi jofuneya oukokomezani ovilibihedha owanela nroromelo nenyu, nttuwene nivahiwe akoddeli dila modha bahi.
4 Mwahaya bwawi ahikalawo attu avolowile mmulogoni, abuwene ahinimuttittimiha Mulugu, vina amfwara mweddelo wohifwanyelela ontota manyazo;* azivalelaga mahala a Mulugu vina anomukodda Nabuya wehu mmodha bahi onigulile, Yezu Kristu; Malebo ahiloga wale wi attu ninga abo anele ottongiwa.
5 Masiki nyuwo muziwaga dhotedhene esi, ddinfuna dduwubutxedheni wi Yehova ohivuna nlogo mwilaboni ya Ejipitu, mbwenyi vasogorhova ohatolotxa abale ahonihile nroromelo.
6 Vina anju ahikalilevi ororomeleya mbwenyi attiyile mburo wawa wakalani, Mulugu ohamaga na kurenti vina ohattiya mwiddimani enddimuwa, ajedhaga siku ninddimuwa ninfunani ottongiwa.
7 N’ekalelo yakakene Sodoma na Gomora vamodha na sidadi dhaddamananina, dhihira dhakakene, dhiviperhekelaga ogonihana wonyakuwa* wottabwa vina afwaraga dhifunelo dhabure dha maningo; attu abo ali ninga yotagiha ennitxenjerhiha mwaha wa ottongiwa na otolotxiwa na motto wa mukalakala.
8 Masiki dhawene, attu abo anoziveliwa dhilobo dhabure atakalihaga maningo awa, apwazaga onddimuwa vina àlogaga bure abale asakuliwe na Mulugu.
9 Vano Migeli, arkanju* vapambihiyena na Ddiabo awanelaga maningo a Mizé, karurumuweli omuttonga alogaga mazu oruwana mbwenyi ologile dhahi: “Yehova aukone.”
10 Vano, attu abo anologa bure esile dhihinziwani pama vina dhotedhene dhinziwani ankosa ninga dhinama dhihinubuwela, vina anodidelavi wira dhabure.
11 Agweliwe ntowa, sabwani afwara dila ya Kayini vina atagiha mweddelo wabure wa Balau watamela ottuviwa, vina àvitotela otolotxiwa mwaha wofwara makani osadduwela a Korá!
12 Attu abo anoligana na malugu aviteyile mmanjeni oku ajaga vamodha na nyuwo mattanga a okwelana; akumbuzi anvisapela anyene ahovaga; anligana na mirabo dhihinna manje, dhintukumeliwa oku-n’oku na pevo; miri dhihimbala milima nsakana nigafiya, dhikwile dila bilimo* vina dhitxikuwile na mitxitxidha;
13 anligana na manebe owali a mbara, amburutxa maporu vamodha na dhotakala dhawa; vineneri dhihina vowimela, dhikoyeliwe eddima enddimuwa yohimala.
14 Muttu wanotanu na wili odhilewo mmalele Adamu, Enoki, ohivuhulela vina mwaha wawa alogaga: “Moone! Yehova odha na anju aye okoddela, ohikontareya
15 wi àttonge attu otene vina àkone attu otene otakala murima, mwaha wa dhobure dhotene dhikosilani ahimwiwelelaga Mulugu, vina dhilobo dhohifwanyelela dhilogilani anveyihaga.”
16 Attu abo anamaba, kanagalala na esile dhinnani mwigumini mwawa, anokosa dhifunelo dhawa, anologa mazu ovittukulelana, anokala ninga anowattittimiha attu* oku atamelaga waranjula.
17 Vano nyuwo abali okweleya, mubuwelege mazu otene ewalenyu wale na arumiwi a Nabuya wehu Yezu Kristu,
18 auwaddelani dhahi: “Masaka omariha anele okalawo anamabedda anafwarege dhifunelo dha merelo awa abure.”
19 Abo attu anita ogawana, attu anubuwela ninga dhinama, ahina muya wa Mulugu.
20 Vano nyuwo abali okweleya, mulibihegevi nroromelo nenyu n’okoddeletxa vina mulobelege na guru ya muya wokoddela,
21 wi mukalevi na okwela wa Mulugu oku mujedhelaga ttagaraga ya Nabuya wehu Yezu Kristu, wila mufwanye egumi yohimala.
22 Vina mwaweddelegevi ttagaraga abale anaganyedha;
23 mwavune mwattawihaga wi anapiwe, * oku enaya mudhowevi mwaweddelaga ttagaraga na wova, mwiddaga dhabalo dhawa dhitakalihiwe na merelo awa abure.
24 Mulugu onwodha oubarelani wila muhikwakwattuwe vina mukale awimelene vamentoni vaye vottittimiheya, muhinna yovirigana na ohagalala onddimuwa,
25 Mulugu mmodha oddo Mvuni wehu mwa Yezu Kristu Nabuya wehu, avahiwe ovuwa, nttittimiho, owodha, vina onddimuwa ovenyana wale, ovanene vina mwa masaka otene. Amen.
Manota
^ Na egregu, aselgeya. Kang’ana Mazu Atapuleliwe anloga: “Mweddelo Wohifwanyelela Ontota Manyazo.”
^ Na egregu, porneya. Kang’ana Mazu Atapuleliwe.
^ Obe, “munddimuwa wa anju.”
^ Obe, “dhikwile-wene.”
^ Obe, “wasiba attu ovuwa.”
^ Na egregu, “vamottoni.”