Akadda Kolosi 1:1-29
1 Miyo Paulo, murumiwi wa Kristu Yezu na ofuna wa Mulugu vamodha na Timóteo mbalihu.
2 Ddinalebela akoddeli vamodha na abali ororomeleya ali mumodhani na Kristu ankala o Kolosi:
Mukane mahala a Mulugu Babihu vina murenddele.
3 Mudhidhi wotene ninomutamalela Mulugu Babi wa Nabuya wehu Yezu Kristu, nigaulobelelagani nyuwo,
4 iyo nihiwa ologiwa mwaha wa omuroromela wenyu Kristu Yezu vamodha na wakwela wenyu akoddeli otene
5 mwaha wa njedhelo nikoyeliwe nyuwo wirimu, muhiwa ologiwa mwaha wa njedhelo na miselu dhapama dha ebaribari,
6 dhilaleyeliwe nyuwo. Dhahene ninga miselu dhapama dhinobala milima vina dhinowinjiva mwilaboni mwetemwene, yakakene jimpadduwa na nyuwo ovenyana siku newalenyu vina niziwilenyu mowakwana-mwene ebaribari ya mahala a Mulugu.
7 Jijene esunzilenyu na mudhari mukwehu vina wokweleya Epafra, oli murumiwi wororomeleya wa Kristu onlaba vamburoni vehu.
8 Iyene vina onaddela okwela onna nyuwo ondha na muya wokoddela wa Mulugu.
9 Nona sabwa ya ejuwene, ovenyana siku newalihu eso, kanittiyile wulobelelani vina okumbirha wi mukane eziwelo yowakwana ya efunelo yaye na ononelamo vina zelu dhindha wa Mulugu,*
10 wila mwedde n’ekalelo enfuniwana attu a Yehova, dhahene munele omwagalalihavi pama oku mubalagavi milima dha mabasa apama vina munuwihaga eziwelo yowakwana ya Mulugu;
11 ninokumbirha vina wi nyuwo mulibihiwe na owodha wotene wottittimiheya wi muwodhe ovilela noliba murima vina na ohagalala,
12 oku mmutamalelaga Baba ousakulelini wakela dhohalana dhinavahiwe akoddeli ali mutxezani.
13 Iyene onifurula muwodhani mwa eddima, onimwalihedha mumweneni mwa Mwanaye onimukweliye,
14 mwana oddu onifurula na yobolo ya oleveleliwana dhottega dhehu.
15 Iyene ddi nladdaniho na Mulugu ohinoneya vina ddi muttaji wa dhottanddiwa dhotene;
16 vowi mwa iyene dhittanddiwa dhilobo dhotene dha wirimu na dha vati, dhilobo dhowoneya na dhohoneya; omwene, owodha, olamulela na onddimuwa. Dhilobo dhina dhotene dhittanddiwe mwa iyene vina dhittanddeliwe iyene.
17 Iyene wahikalawo dhilobo dhina dhotene dhihinatti ottanddiwa vina dhotene dhittanddiwe mwa iyene,
18 Iyene ddi musogorheli* wa maningo, oli mulogo. Iyene ddi woroma vina muttaji wa abale akwile wi akale ole oli woroma mwa dhilobo dhotedhene;
19 sabwani Mulugu ohiziveliwana nona akosiha wi dhilobo dhotene dhikale mwa iyene,
20 mwaha wa iyene Mulugu ohiziveliwa wiwananiha dhotedhene, dha vati na dha wirimu, akalihaga mmurenddeleni mwaha wa nikami na Yezu, nikuttuliwe vapingirhizini.*
21 Wale, nyuwo mwali wolapelana na Mulugu vina mwali amwiddani aye, sabwani mobuwela dhilobo dhabure,
22 ovano Mulugu ohuwandanihani nyuwo mwaha wa okwa wa mwanaye, wi mukale otxena, ohittega vina muhikanaga muladdu vamentoni vaye—
23 bari mugeddaganavi nroromelo nenyu, mukalagavi olibene, vina ovikoma, muhittihiwaga njedhelo nakelilenyu na miselu dhapama dhiwalenyu vina dhilaleyeliwe attu otene a velaboni ya vati. Miyo Paulo ddihittomeliwa olaleya miselu eso dhapama.
24 Ovano ddinohagalala sabwa ya wutabuwelani nyuwo, na masoso aba ddinowakwaniha mmaningoni mwaga goyi dhahaleli Kristu otabuwa mwaha wa mulogo, oli maningo aye.
25 Miyo ddikala murumiwi wa mulogo obo mowiwanana na mabasa addivahile Mulugu a olaleya mowakwana-mwene nzu naye wi nyuwo mupurelemo,
26 eji yoviteya ya Mulugu yahaziwiwe masaka a wale vamodha na attuya a nsaka nene-nttile. Mbwenyi ovano yoviteya eji eziwihiwa akoddeli aye,
27 Mulugu ohiziveliwa waziwiha akoddeli ali vari va malogo dhorela dhinddimuwa dha yoviteya yaye; yoviteyayá jiji: Wandana wenyu na Kristu na njedhelo na okala munttittimihoni mwaye.
28 Ddi iyene onimulaleyihu nakokomezaga attu otene vina nasunzihaga na ononelamo wotene wi muttu ddi muttu akale wowakwana mumodhani na Kristu.
29 Nona miyo ddigalaba na guru dhotedhene, ddilibaga na owodha onddivahiye okuwene onddeddiha.
Manota
^ Obe, “dhindha na guru ya Mulugu.”
^ Na egregu, “musorho.”
^ Obe, “pingirhizi ya goyi.” Kang’ana Mazu Atapuleliwe.
