Akadda Kolosi 2:1-23
2 Ddinofuna wi muziwe goyi dhinddimuwa dhinuwanelani miyo, dhinawanelimi akadda Laudiseya vina otene abale ahinaddonaga.*
2 Efunelo yaga jawi mirima dha attu otene dhipangarhaziwe, awene akale mumodhani, ewananihiwe na okwela vina akaane dhorela dhotene dhindha mwa ebaribari ya ononelamo wawa wi afwanye eziwelo yebaribari ya dhoviteya dha Mulugu, kuloga Kristu.
3 Mwa iyene dhivitiwa pama dhorela dhotedhene dha eziwelo na ononelamo.
4 Ddinouwaddelani esidhá wila ahikalewo muttu onupelani malago na mazu onyengetta.
5 Masiki valimi wolapela, murima waga oli na nyuwo, ddinohagalala mwaha wa oziwa wi nyuwo munowiravi dhapama vina munodhowavi mmuroromelaga Kristu.
6 Nona, dhahene ninga mmurumelelinyu Kristu Yezu Nabuya, mweddegevi mumodhani na iyene,
7 dhahene ninga mutxeyiwenyu, mulibihiwegevi mwa iyene vina mulibihiwegevi munroromeloni ninga musunziheliwenyu, mwinjivihaga omutamalela wenyu Mulugu.
8 Mukale txenjewa wi ahikalewo muttu onukosani adhari na masunziho a filozofiya vina na dhonyengetta dhohipurela elo dhindha mu dhilemeleloni dha attu na dhubuwelo dha elabo ejino, ottiya dhubuwelo dha Kristu;
9 Kristu oddo, odhaala wawakwana wa mikalelo dhotedhene dha Mulugu.
10 Nyuwo kamunjombeliwa elo sabwani iyene ddili musogorheli* wa olamulela vina onddimuwa wotene.
11 Mwaha wa wandana wenyu na iyene, nyuwo vina mutxetteliwa; kahiyo otxetteliwa okule oniriwa na mada, ku orula maningo enyu omuttu, kuloga otxetteliwa ondha mwa Kristu.
12 Vowi nyuwo muhinteriwa na iyene na obatizo onligana na waye, vina mwaha wa wandana wenyu na iyene, muhivenyihiwa mukwani vamodha na iyene sabwa ya ororomela owodha wa Mulugu, onvenyihiliyena mukwani.
13 Ottiya ejo, masiki valinyu okwene mwaha wa dhovonya dhenyu vina mwaha wa ohitxetteliwa wa maningo enyu, Mulugu ohuvahani egumi vamodha na Kristu. Mulugu olevelela dhottega dhehu dhotedhene na murima wotene,
14 ottimiha* dokumento ya magano elebiwe na mada, ejuwene yanisumela. Mulugu ottimiha dokumentoyá ejo akomelaga vapingirhizini ya goyi.*
15 Mwaha wa pingirhizi ejo, oharula guwo agovernu na anddimuwa a mwilaboni, ohattukula ninga adhari, ohawoniha attu otene wi ohapemberha.
16 Nona, kakalewo onuttongani mwaha wa esile dhinjenyu vina dhimmwenyu obe mwaha wa mattanga ankosiwa vayakani, woneya wa mweri muswa obe mwaha wa okoya siku na sabuddu.
17 Dhilobo esi dhali ezinddiyelo dha esile dháfuna odha, mbwenyi Kristu ddili ebaribariya.
18 Attu ena anolagiha oviyeviha vina anowawebedha anju, “mbwenyi kamwattiye attu ninga abo oubarelani” wakela nlivo nenyu. Awene anovittittimiha mwaha wa esile dhonilani vina anovittukulelana dhilobo dhihina ttima sabwani anubuwela mowiwanana na maningo awa.
19 Awene kanimurumela ole oli musogorheli,* odduwene onkosiha wi vyano dhotedhene dha manigo dhittiddane mmagumanihedhomwa vina dhunuwe ninga munfunela Mulugu.
20 Akala mukwa vamodha na Kristu mwaha wa dhilobo dha elabo ejino, kito muneddelani ninga attu a mwilaboni mpuno, mwiwelelaga magano awa:
21 “Eji kuttidde, eji kuje, eji kuddiginye,”
22 dhaddiwagana dhilobo dhinnongeya na ovira wa mudhidhi mowiwanana na magano na dhinsunziha attu.
23 Eso dhinkala ninga dhapama mbwenyi kadhinakamihedha attu okodda dhifunelo dhawa dha maningo; ejo empadduwela sabwani animwebedha Mulugu ninga munfunelani vina anotamela oviyeviha na otabutxa maningo awa.
Manota
^ Obe, “ahinonaga kove yaga.”
^ Na egregu, “musorho.”
^ Obe, “ofudha.”
^ Kang’ana Mazu Atapuleliwe.
^ Obe, “musorho.”