Dhilebiwe na Luka 11:1-54
11 Siku nimodha Yezu wali mburo dhahi alobelaga, mmaleliye mmodhavo wa anamasunza aye, ohiloga: “Nabuya, nisunziheni olobela, dhahene ninga mwasunzihile Joau anamasunza aye.”
2 Iyene ohawaddela: “Mugalobelaga, mulogege dhahi: ‘Babani, nzina nenyu nikoddelihiwe.* Omwene wenyu odhe.
3 Munivahe yoja ya siku na siku mowiwanana na dhinnijombela siku-siku.
4 Munilevelele dhottega dhehu, vowi iyo vina ninowalevelela abale annittegela* vina kamunittiye ogwela munyengetteyani.’”
5 Venevo, Yezu ohawaddela: “Akala mmodhavo wa nyuwo onokana mukwaye adhowa omutamela vari va mattiyu alogaga, ‘Mukwaga kaddiboleye pawu ttaru,
6 sabwani mukwaga dhahi onofiya-wene muleddoni mwaye, miyo kaddinna elo-wene yonvaha.’
7 Vano iyene wakula mwenemo mba: ‘Kuddinyonye. Musuwo omala ofugiwa vina anaga na miyo nili vakamani, kaddinawodhe ovenya dduvaha elobo.’
8 Ddinouwaddelani, iyene onele ovenya amvahe dhotedhene dhikumbirhiliye, kahiyo sabwa ya okala marho waye, mbwenyi sabwa ya odidela waye okumbirha.
9 Nona ddinouwaddelani, kadidelani okumbirha munele ovahiwa, kadidelani otamela munele ofwanya, kadidelani okopela munele ofuguleliwa.
10 Vowi ole onkumbirha onovahiwa, ole ontamela onofwanya, ole onkopela onofuguleliwa.
11 Txibarene, babi gani mwa nyuwo, mwanaye agamukumbirha oba, amvaha nowa, ottiya oba?
12 Obe agamukumbirha nzayi, amvaha wenye?
13 Nona, akala nyuwo attu abure,* munowodha wavaha dhapama aninyu, kito Babi oli wirimu kanavahe muya wokoddela abale animukumbirha?”
14 Mudhidhi dhahi iyene ohittamagiha muya wabure mwa mulobwana dhahi wahawodha ologa. Mmalele ottamagihiwa muyayá mulobwanayá ohiloga vina muttitti otikina.
15 Vano enaya anloga: “Iyene onttamagiha muya dhabure na guru ya Satana,* oli mulamuleli wa adomonyo.”
16 Vano ena afunaga omweha, aroma omukumbirha ezinddiyelo ya wirimu.
17 Aziwaga dhobuwelani, iyene ohiloga: “Omwene wotene ongaweya, onogwa bukala dhibuwa, nyumba ji nyumba engaweya enogwa.
18 N’ekalelo yakakene, akala vina Satana ogaweya mwinyene, kito omwene waye onemele dhavi? Vowi nyuwo munologa, ddinttamagiha muya dhabure na owodha wa Satana.*
19 Akala miyo ddinttamagiha muya dhabure na guru dha Satana,* kito anenyu anttamagiha na guru dha ani? Nona awene banauttongeni.
20 Mbwenyi akala miyo ddinttamagiha muya dhabure na guru ya Mulugu,* txibarene Omwene wa Mulugu ohufiyedhani.
21 Akala mulobwana onna guru vina onna dhipano dha koddo, onowang’anela nyumbaye, kawo onwodha wiya dhorela dhaye.
22 Vano agakalawo muttu mwina woliba opitta iyene awanana vina ampemberha, onomwakiha dhipano dhaye dhakuluveliye vina onogawa dhimwakiliye.
23 Ole ohili mpaddi waga kali na miyo, vina ohintaganyiha na miyo onomwalamwadha.
24 “Muya wabure ogavenyamo mmaningoni mwa muttu, onovira mimburo dhihinkaliwa otamelaga vofwasa, ogahifwanye, onologa dhahi, ‘Ddinowiyelela nyumba yaga emwalilemi.’
25 Ogeyela onofwanya nyumbayá jimalile osasanyedhiwa, okuputtiwa vina okoddelihiwa.
26 Venevo, onodhowa ottukula muya dhina mitanu na minli dhottabwa wopiha opitta iyene, dhinodha ovolowa, okalaga mwenemo. Omagomelo wa muttu oddo onottabwa otakala opitta omaromelo waye.”
27 Oku Yezu alogagavi eso, muyana dhahi okuwa vari va muttitti na lizu noliba: “Wohagalala ddi muyana wubalileni vina ouwamwihileni!”
28 Vano iyene ohiloga: “Nne, ottiya ejo, ohagalala babale aniwa nzu na Mulugu vina anvirihamo!”
29 Muttitti wa attu winjivagavi, iyene oroma ologa: “Nlogo ntti, nlogo nabure, nintamela ezinddiyelo, mbwenyi kanonihiwe ezinddiyelo, ehili ejile ya Jona.
30 Dhahene ninga Jona wali ezinddiyelo ya akadda Nínive, Mwana-muttu ezinddiyelo ya nlogo ntti.
31 Musano w’ogusuni* onele ovenya vamodha n’attu a nsaka nttino, wi àkone; vowi iyene odha wolapela-wene wi ewe zelu dha Salomau. Vano ziwaní wi apano okalavo muttu munddimuwa onimpitta Salomau.
32 Siku N’ottonga, attu o Nínive anele ovenya vamodha na attu a nsaka nttino, àkone; vowi awene ahitxinuwa mwiwalani esile dhalaleyile Jona. Vano ziwaní wi apano okalavo muttu munddimuwa onimpitta Jonayá.
33 Attu kanttiddiha panti battiya mburo woviteya obe bakunela na nyangaserha ottiya ejo, anttiya vadhulu wi yamoneye abale anvolowa mbamwa.
34 Ninto panti ya maningo. Ninto nawo nigamoneyaga, maningo awo otene anokana txeza.* Mbwenyi, akala ninto nawo ttabure,* maningo awo otene anokaana eddima.
35 Nona okale txenjewa wi txeza enna weyo, ehikale eddima.
36 Akala maningo awo otene anokaana txeza, ahikanaga epaddi ya eddima, maningoyá otene anele omoneya pama ninga panti emmoneya na txeza yaye.”
37 Mmalele iyene ologa, Mfarizi dhahi omuloba wi adhowe aje vamodha na iyene. N’eji Yezu odhowa ogilati vameza.
38 Venevo Mfarizi ole otikina vaddiddi mmoneliye Yezu ajaga ahiromile onawa* mada.
39 Vano Nabuya Yezu ohiloga: “Nyuwo Afarizi, munosuwa kopo na parato otakuluvi oku mwarimwa pudhalile osirira vina obure.
40 Nyuwo attu ohikana malago! Ole osasanyile otakulu kahiyo wakakene osasanyile mwari?
41 Nona mwavahege ayelegi* dhili mmurimani mwenyu! Dhotene mwa nyuwo dhinokala dhapama.
42 Vano ntowa nugweleni nyuwo Afarizi, sabwani munomperheka ortela,* aruda* na mataba meena, oku mpwazaga oligana na okwela wa Mulugu! Sisene dhafwanyelinyu okosaga, mbwenyi muhipwazaga dhina.
43 Ntowa nugweleni nyuwo Afarizi, sabwani munoziveliwa ogilati mipaddo dhoroma* mugakala mmasinagoga* vina olejeliwa na nttittimiho vanamwinjini!
44 Ntowa nugweleni nyuwo, sabwani muli ninga masiye* abale ahinoneyetxa,* attu anoviravo ahiziwaga!”
45 Muziwitxi mmodha wa Nlamulo wali venevo ohiloga dhahi: “Namasunziha, nyuwo mugalogaga eso munoniruwana iyo vina.”
46 Yezu ohawaddela: “Ntowa nugweleni nyuwo aziwitxi a Nlamulo, sabwani munowavijeliha attu mittorho dhorutxa ottukulawa, vano nyuwo kamuntagiha nne ngafuna oddiginya mittorhodhá na ebuno yenyu!
47 “Ntowa nugweleni nyuwo, sabwani munowamagela dhikutta* anamavuhulela, abuwene apiwe na azamani enyu!
48 Txibarene nyuwo muli anamoona a merelo a azamani enyu, masiki dhawene nyuwo munowarumelana sabwani awene ahapa anamavuhulela, vano nyuwo munowamagela dhikuttadhá.
49 Nona, onona wa Mulugu ohiloga: ‘Ddinele warumela anamavuhulela na arumiwi, ena anele wapa vina ena anele wafwara-fwara,
50 wila nikami na anamavuhulela otene nikuttuliwe, oromana vapaddutxiwe elabo, nilogosiwe nlogo ntti,
51 ovenyana nikami na Abeli mpaka na Zakariya opiwe vari oku ebuwa oku nyumba.’* Txibarene, ddinouwaddelani attu a nsaka nttino, anele ologosiwa.
52 “Ntowa nugweleni nyuwo aziwitxi a Nlamulo, sabwani munowadela txavi dha eziwelo. Nyuwo kamunvolowa vina kamunattiya ovolowa abale anfuna ovolowawa!”
53 Mvenyeliye venevale anamasunziha magano na Afarizi aroma omudidela venjene vina annimukosa mavuzo ottiyana-ttiyana,
54 amwettekelaga mirega wi amuttidde na mazu aye.
Manota
^ Obe, “noniwege ninga n’otxena.”
^ Na egregu, “anna mangawu na iyo.”
^ Obe, “attu ottega.”
^ Na egregu, “Belzebú.” Nzina nina ninkuweliwana Satana, oli musogorheli obe mulamuleli wa muya dhabure.
^ Na egregu, “Belzebú.” Nzina nina ninkuweliwana Satana, oli musogorheli obe mulamuleli wa muya dhabure.
^ Na egregu, “Belzebú.” Nzina nina ninkuweliwana Satana, oli musogorheli obe mulamuleli wa muya dhabure.
^ Na egregu, “na ebuno ya Mulugu.”
^ Obe, “w’o sul.”
^ Na egregu, “ttotakala; ttanrima.”
^ Obe, “anodhala txeza.”
^ Afarizi na Ayuda annawa afwaraga dhilemelelo dhawa.
^ Obe, “mivaho dha ttagaraga.” Kang’ana Mazu Atapuleliwe.
^ Ortela, tempero enikiwa mujani wila yojaya ezive.
^ Muri onlabihedhiwa wi ovulumutxe oredda vina onukelihe dhoja.
^ Obe, “dhattima.”
^ Kang’ana Mazu Atapuleliwe.
^ Obe, “masiye a aliba okwa anubuweliwa na Mulugu.”
^ Obe, “ahinekiwa ezinddiyelo.”
^ Obe, “masiye a aliba okwa anubuweliwa na Mulugu.”
^ Obe, “mparha.”
