Dhilebiwe na Luka 12:1-59
-
Emela ya Afarizi (1-3)
-
Omova Mulugu ottiya attu (4-7)
-
Orumela okala mumodhani na Kristu (8-12)
-
Yoladdaniha ya mureli wotuwa zelu (13-21)
-
Kamuzuzumeletxe egumi yenyu (22-34)
-
Nikuru ning’ono na mabila (32)
-
-
Okala ovyang’anela (35-40)
-
Mwimeleli wororomeleya na mwimeleli wohiroromeleya (41-48)
-
Kaddidhilena murenddele, mbwenyi ohiwanana (49-53)
-
Ofuneya wa opima mudhidhiyá (54-56)
-
Ologela makani (57-59)
12 Venevo vahitugumana muttitti mwinjene wa attu, wafunyana muttu na mukwaye. Mmalelani Yezu oroma ologa na anamasunza aye: “Mukale txenjewa na emela ya Afarizi, oli ogwarhagwambi wawa.
2 Vano kayiwo elobo evitiwe pama ehinoneye, vina kayiwo yoviteya ehinaziweye.
3 Nona dhotedhene dhinloginyu mwiddimani dhinele wiweya mutxezani, vina esile dhinong’oninyu mmakwartu dhinele olaleyiwa vadhulu va nyumba.
4 Ottiya ejo, ddinouwaddelani nyuwo akwaga, kamwawove abale ampa maningovi bahi agamala ahiwodha okosa elobo yina.
5 Ovano miyo ddinoutonyihedhani bani onfwanyela nyuwo omova: Mmove Ole onna ewodhelo yopa agamala avokela mu Jehena.* Ndde ddinouwaddelani mmove Odduwene.
6 Kadhingulihiwa balame* tanu dhing’ono na kobiri bili dha muttengo mung’onovi?* Masiki dhawenevi, Mulugu kandduwala nne ngafuna modhayavo.
7 Mbwenyi nttitti nenyu notene na mmusorhoni, ninoziweya muttengoyá. Kamove, nyuwo mukaana ttima enddimuwa opitta balame esi dhing’ono, masiki dhinjivilevi.
8 “Miyo ddinouwaddelani eji, ole onarumele vamentoni va attu wi oli mumodhani na miyo, Mwana-muttu vina onele orumela vamentoni va anju a Mulugu wi oli mumodhani na iyene.
9 Mbwenyi, ole onaddikodde vamentoni va attu, onele okoddiwa vamentoni va anju a Mulugu.
10 Wotene ole oninveyiha Mwana-muttu onele oleveleliwa. Mbwenyi ole onveyiha muya wokoddela kanaleveleliwe.
11 Mugattukuleliwa mburo ontugumaniwa na attu enjene,* wa anamalaba a guverno na alamuleli, kamuzuzume na enfunenyu ologa vina mulogeloya wa ovivunana.
12 Sabwani muya wokoddela, onele ousunzihani mudhidhene obo enfwanyelinyu ologa.”
13 Vasogorhova muttu dhahi wali vari va muttitti ohiloga na Yezu: “Namasunziha, kamwaddeleni mbalaga nigawelane dhohalana dhehu.”
14 Iyene omwakula: “Mulobwana, bani oddittomele ottonga obe ougawelani dhittiyedhiwenyu?”
15 Nowidhawo Yezu ohawaddela: “Mukale txenjewa vina murabele omukumbela vaye* sabwani masiki muttu akaane dhawinjiva, kahiyo esuwene dhinimukaniha egumi.”
16 Venevo ohawaddela yoladdaniha alogaga: “Mundda wa mureli dhahi obala milima gwé.
17 N’eji oroma wubuwela mmurimani mwaye: ‘Ovano ddinakose dhavi, vowi kaddinna mburo wokoya dhisinangilemi?’
18 Mmaleliye ohiloga, ‘Ddinfuna ddikose dhahi: Ddigujule manddara aga, ddimage manddimuwa mwenemo ddinele okoyamo dhisinangilemi na dhokana dhaga dhotene,
19 ddinele ovilogela ddamwinya* dhahi: “Weyo* okaana dhilobo dhinjene dhapama dhikoyiwe, dhinafiyedhe vyaka dhinjene, kafwasa, oje, omwe, kajavo elabo.”’
20 Vano, Mulugu ohilogana dhahi: ‘Taduwa-wé, mattiyabano weyo onele okwa. Kito, bani onfuna ohalana dhotedhene esi dhiguddeli weyo?’
21 Eji jinimpadduwela muttu onvyugelela dhorela, mbwenyi ohirelile vamentoni va Mulugu.”
22 Mmaleliye ohiloga dhahi na anamasunza aye: “Nona miyo ddigauwaddelagani, kamuzuzumeletxe egumi* yenyu mulogaga, ninaje nni? Vina na maningo enyu mulogaga, ninabale nni?
23 Sabwani egumi ja ttima opitta oja, vina maningo ba ttima opitta dhabalo.
24 Kawang’aneni anyakungu, awene kanala, kansinanga vina kanna nddara munkoyani, vano Mulugu onowasapela. Koddi nyuwo kamunna ttima opitta balame?
25 Bani mwa nyuwo onzuzumela egumi yaye, bafiyedha wenjedha ngafuna-wene vang’onovi okalawo waye?
26 Kito akala kamunwodha okosa elobo eng’ono, munzuzumeletxani na dhilobo dhina?
27 Kang’anani monuwelo wa folori dha mutakwani: Olaba, kadhinlaba, osona, kadhinsona; vano, nne Salomau munttittimihoni mwaye wabalaví dhokoddela, kafiyedhile ofwanya okoddela wa foloridhá.
28 Akala Mulugu onokoddeliha dhahene folori dha mutakwani dhinunuwa ddabuno, mangwana dhiponyedhiwa vamottoni, kanauwabaliheni vopitta nyuwo, attu oyeva nroromelo?
29 Nona, kamuzuzumeletxe otamela yoja na yomwa vina kamuttabwihetxe ovizuzumela,
30 vowi dhotedhene esi sinzuzumela attu a malogo otene a mwilaboni, vano Babinyu onoziwa wi nyuwo munofuna dhilobo esi.
31 Ottiya ejo, kadidelani otamela Omwene wa Mulugu, vina dhilobo eso munele wenjedhedhiwa.
32 “Nyuwo nikuru ning’ono na mabila, kamove, vowi Babinyu oziveliwa wuvahani Omwene.
33 Kagulihani dhilobo dhenyu, kobiridhá mwavahe ayelegi.* Mukose mabuddu a kobiri ahinnongeya, nifumo nihimmala wirimu, wenewo ohinfiya ambava vina ohili mukwiti onnyonga.
34 Sabwani vankala nifumo nawo, pankala murima wawo.
35 Mukale owabalene, omala nawale vina muttiddihe panti dhenyu,
36 mukale ninga alobwana animujedha nabuya wawa wiyela omateloni, wi agafiya akopela munfugulele momaguva.
37 Ohagalala ba adhari abo anafwanyiwe na nabuyawa ang’anelaga! Ddinouwaddelani ebaribari, iyene onele wabala guwo dhaye, àgilatihe vameza vina awimelele.
38 Vano akala nabuyawa onodha mattiyu* obe onfiya vari va mattiyu* ahagalale agafwanyiwa omala nawale!
39 Vano muziwe eji, kowiliwa mwinya wa vatakulu wela oziwa mudhidhi ondha mbava, kagattiyile wi mba mwaye mvolowiwe.
40 Nona nyuwo vina mukale womala nawale, sabwani Mwana-muttu onadhe mudhidhi ohinubuwelinyu.”
41 Venevo Pedro ohinvuza: “Nabuya, yoladdaniha eji munnaddela iyo bahi obe munawaddela attu otene?”
42 Nabuya ohiloga dhahi: “Bani oli mwimeleli wororomeleya wamalago* onattomeliwe na nabuya waye mabasa a wawang’anela anamalaba aye wi avahegevi dhoja dhinawakwanela vansakanivá?
43 Wohagalala ddi mwimeleli oddo onafwanyiwe na nabuya waye akosaga dhawene!
44 Ddinouwaddelani ebaribari: Iyene onele omwira nameddiha wa dhotedhene dhiniye.
45 Mbwenyi akala mwimeleli oddo onowubuwela dhahi mmurimani mwaye, ‘Nabuya waga onogonela odha,’ venevo aroma wabubudda emeleli akwaye, a alobwana na a ayana, ajaga, amwaga vina alezelaga,
46 nabuya wa mwimeleli oddo onadhe siku nahamujedheliye vina mudhidhi ohinziwiye. Iyene onele omutabutxa venjene vina onele omuttiya mburo wa attu ohiroromeleya.
47 Mbwenyi mwimeleli ole ononelimo yanfunana nabuya waye, vano ahivisasanyedha nne ahikosa ekumbirhiwiye* onele obubuddiwa venjene.
48 Vano ole ohinonelimo akosa dhilobo dhinimuttukulela obubuddiwa, onavadiwe vang’onovi. Txibarene ole ovahiwe dhinjidhene onologosiwa dhinjidhene, ole ottomeliwe dhinji onele ologosiwa vopitta.
49 “Miyo ddidhele ottiddiha motto mwilaboni, kito ddinakose eni oku mottoya bumalile ottiddihiwa?
50 Txibarene, ddikaana obatizo onfuna miyo obatiziwana, ovano ddili wokubanyene ofiyedha vanamalani!
51 Munubuwela wi ddidhilena murenddele vatapano? Miyo kaddidhilena murenddele, ottiya ejo, ddidhilena ogawana.
52 Oromana ovanene ofiyedha musogorho, vanele okala ogawana vatakulu, vali anamudhi atanu, araru kanewananege na eli, eli kanewananege na araru.
53 Vanele okala ogawana: Babi na mwanaye, mwana na babe, mayi na mwanaye wamuyana, mwana-muyana na maye, nyezeli na muwenyaye, muwenya na nyezele.”
54 Venevo Yezu ohiloga na muttitti: “Mugona murabo odhaga omadhelo wa nzuwa munologa, ‘Moone ddabuno onokala muzogwe na pevo,’ vina enopadduwa.
55 Vina nyuwo mugona pevo enoba edhaga ogusuni* munologa: ‘Moone ddabuno onokala oviha onddimuwa,’ ejo enopadduwa.
56 Agwarhagwambi! Nyuwo munoziwa otapulela dhimpadduwa mwilaboni na odhulu, vano munkodda dhavi ozinddiyela dhimpadduwa nsaka nttino?
57 Nyuwo munkodda dhavi oziwa mwanya, dhilobo dhapama dhinfwanyelinyu okosa?
58 Motagiha weyo na mwiddani wawo, mugadhowaga wa namattonga ozuzumele ologela makaniyá na iyene mudila, enadhe opadduwa iyene wuperheka wa namattonga, namattongayá wuperheka wa musupayi, agamala musupayiyá wufugela mukambura.
59 Ddinouwaddela, weyo kunabudduwemo ohinatti opitxa kobiri* yawo yotene.”
Manota
^ Kang’ana Mazu Atapuleliwe.
^ Obe, “pardal.”
^ Na egregu, “kobiri bili dha asariyu.”
^ Obe txino, “mmasinagoga.”
^ Obe, “osilila.”
^ Obe, “egumi yaga.”
^ Obe, “Egumi, weyo.”
^ Obe, “maningo.”
^ Obe, “mivaho dha ttagaraga.” Kang’ana Mazu Atapuleliwe.
^ Obe, “wora 9 dha mattiyu mpaka vari va mattiyu.”
^ Obe, “oromana vari va mattiyu ofiyedha wora 3 dha membesi.”
^ Obe, “wa zelu.”
^ Obe, “ofuna wa nabuya waye.”
^ Obe, “o sul.”
^ Na egregu, “leptoni womariha.”
