Dhilebiwe na Luka 13:1-35
13 Mudhidhene obule ena àlivo amwaddela Yezu mwaha wa Agalileu apiwe na Pilato aperhekaga mukutto.
2 Venevo Yezu ohiloga dhahi, awakulaga: “Nyuwo munubuwela wi Agalileu aba apadduweliwe esene al’ottabwa ottega wapitta Agalileu ena?
3 Nne, ddinouwaddelani wi mugahirugunutxe murima, motene munele otolotxiwa ninga awene.
4 Obe abale 18 amotteliwe murhingotti wa Siloé akwa, munona ninga awene banetxa muladdu wapitta attu otene ankala mu Jeruzalemi?
5 Nne, vano miyo ddinouwaddelani, mugahitxinuwe motene munele otolotxiwa dhahene ninga epadduwile na awene.”
6 Mmaleliye ohawaddela yoladdaniha eji: “Mulobwana dhahi wahitxeya mfigera mmunddani mwaye mwa uva, venevo odhowa otamela milimadhá, mbwenyi kafwanyilemo elo.
7 Iyene ohiloga dhahi na mulobwana wang’anela munddayá: ‘N’eji vyaka ttaru dhindha miyo otamela milima munfigerani mpu, vano kaddinfwanyamo elo. Kagwadda! Onkalelani venevo onyongelaga mburo yovene?’
8 Mulobwana oddule omwakula dhahi, ‘Nabuya, kattiyani yaka-ejino bahi, miyo ddinele ottiba makomeya, ddekemo estrumi.
9 Akala musogorho onobala milima, ekala; vano ogahibale, mugwadde.’”
10 Siku na Sabuddu, Yezu wel’osunziha musinagoga dhahi.
11 Mwenemo mwahikala muyana wavolowiwe muya wabure, wamobaniha * mwa vyaka 18. Muyanayá oddo kawodha-wene winuwa, wedda woworomene.
12 Yezu mmoneliye omukuwela, omwaddela dhahi: “Muyana wé eredda yawo evira.”
13 Yezu omutapulela nlada, momaguva-mwene muyanayá ohinuwa vina oroma omuttittimiha Mulugu.
14 Onaga eso, munddimuwa wa musinagoga otikina mwaha wa Yezu onvulumutxa na Sabuddu vina ohiloga na muttitti: “Akalawo malabo matanu na nimodha anfwanyela attu olaba, mudhege masiku-ene abo wi mvulumutxiwe, vano kamudhege na Sabuddu.”
15 Nabuya omwakula: “Agwarhagwambi! muttu ddi muttu wa nyuwo na Sabuddu, kanttapula ng’ombe yaye obe buru yaye wi adhowe amwihe?
16 Muyana oddu, oli mwana Abrahamu wamagiwe na Satana mwari mwa vyaka 18, kafwanyela ovulumutxiwa oredda waye siku na Sabuddu?”
17 Mulogele Yezu esodhá, amwiddani aye otene atoteya manyazo, vano muttitti wotene wanttaba na dhilobo dhotene dhapama dhakosiye.
18 N’eji iyene ohenjedhedhavo dhahi: “Omwene wa Mulugu onligana na eni, vina ddinaladdanihe na eni?
19 Onladdana na ttaga ya mostarda yalile muttu mmunddani mwaye, ttagayá ehunuwa bukala muri vina balame dhodhulu dhimagamo vinddara muvirasinimwa.”
20 Iyene ohiloga wili: “Ddinaladdanihe na eni Omwene wa Mulugu?
21 Onladdana na emela ettukulile muyana ataganyiha na mpimo miraru dha ottu,* ofiyedha odhakuwa.”
22 Yezu adhowaga o Jeruzalemi, wanedda sidadi na sidadi, murudda na murudda asunzihaga.
23 Venevo mulobwana dhahi ohiloga: “Nabuya, anvuniwa ali ang’onovi?” Vano Yezu ohawaddela:
24 “Mvilibihedhe venjene ovolowa musuwo woyeva, vowi miyo ddinouwaddelani, enjene anele otamela ovolowa vano kanawodhe.
25 Mwinya wa ntakulu agavenya, afuga musuwo waye, nyuwo munele ohala otakulu mvadaga musuwoyá vina mulogaga: ‘Nabuya, kanifuguleleni musuwo.’ Vano iyene onele ouwakulani dhahi: ‘Miyo kaddinziwa ondhelinyu.’
26 Venevo nyuwo munele oroma ologa dhahi: ‘Iyo nihija vina nihimwa nyuwo munang’anaga vina nyuwo munisunziha mmarampani mwehu.’
27 Mbwenyi iyene onele ouwaddelani: ‘Kaddinziwa ondhelinyu. Kaddivenyelenivo, nyuwo motene munira dhotakala!’
28 Wenewo munele wunla na okubanya onddimuwa vaddiddi* mugamona Abrahamu, Izaki na Jakob vamodha na anamavuhulela otene Mumweneni mwa Mulugu, oku nyuwo bamuponyedhiwe otakulu.
29 Ottiya ejo, anele odha attu omadhelo wa nzuwa na omaddowelo, omadhulu* na ogusuni* vina anele ogilati vameza Mumweneni mwa Mulugu.
30 Kavuruwanani! Akalawo omariha anakale oroma, oroma anakale omariha.”
31 Mudhidhene obule afiyavo Afarizi ena, amwaddela dhahi: “Kavenyanivo mudhowe sabwani Herodi onfuna aupeni.”
32 Iyene ohawaddela: “Kadhowani mwamwaddele munyinga oddo. ‘Koona, ddinottamagiha muya dhabure vina ddinowavulumutxa attu, ddabuno na mangwana mbwenyi siku nanoraru ddinele omala.’
33 Vano enofuneya okosa ddabuno, mangwana na siku nina vowi kinrumelihiwa namavuhulela okwa epaddi yina ehili o Jeruzalemi.
34 Jeruzalemi wé, Jeruzalemi wé, onapa anamavuhulela vina onaponyedha malugu abale anrumeliwa weyo—dila ngasi dhifunile miyo watugumaniha anawo, dhahene ninga mwanaku onakubatta anaye mmakapwani mwaye! Vano nyuwo kamufunile.
35 Ovano, nyumba yenyu* enele omwaliwa.* Miyo ddinouwaddelani, oromana ddabuno kamunaddone vina ofiyedha siku ninaloginyu: ‘Worurihiwa ddule ondha na nzina na Yehova!’”
Manota
^ Obe, “muya wahamuwodhiha okosa elo.”
^ Na egregu, “mpimo miraru dha seya.” Seya modha yakwanela malituru 7.33.
^ Na egregu, “mutakunaga meno.”
^ Obe, “norti.”
^ Obe, “sul.”
^ Obe, “mparha.”
^ Obe txino, “nyumba yenyu enokala nddebe.”
