Dhilebiwe na Luka 14:1-35
14 Mudhidhi mwina na Sabuddu iyene odhowa oja vatakulu va munddimuwa dhahi wa Afarizi, n’eji awene afwaseyela omwang’ana.
2 Osogorho waye wahikala mulobwana watabuwa na eredda ya oviba maningo.*
3 N’eji Yezu ohavuza aziwitxi a Nlamulo na Afarizi: “Enorumelihiwa obe kinrumelihiwa onvulumutxa muttu siku na Sabuddu?”
4 Mbwenyi awene kaana yowakula. Venevo Yezu omuddiginya mulobwanayá, onvulumutxa vina omuruma wi adhowe.
5 Nowidhawo ohavuza; “Bani mwa nyuwo ohinimburutxa momaguva mwanaye obe ng’ombe yaye mutxelani egagwelamo siku na Sabuddu?”
6 Vano awene kaana yowakula.
7 Vasogorhova mwawoneliye abale akuweliwe asakulaga mimburho dhapama, iyene ohawaddela yoladdaniha. Ohiloga dhahi:
8 “Muttu agaukuwelela vamattangani a matelo, kugilati mburo wattima. Enodha opadduwa muttu onna ettomo opitta yawo okuweleliwavo vina.
9 Venevo ole oukuweleni moheli, onodha valiwe baloga dhahi, ‘Kanvahe mburo wawo mulobwana oddu.’ N’eji weyo onele ovenyavo na manyazo odhowe wagilati mburo wohittittimiheya.
10 Vano weyo ogakuweleliwa, ogilati mburo womariha wi ole oukuwelile agafiya aloge dhahi: ‘Mukwaga Kavirela mburo obule wattima.’ Venevo weyo onele ottittimihiwa vamentoni va otene akuweleliwevo.
11 Vowi wotene onvittukulela onele okurumutxiwa, vina onvikurumutxa onele ottukuwihiwa.”
12 Vasogorhova Yezu ohiloga dhahi na mulobwana wamukuwelile: “Ogafunaga wakuwelela attu yoja yamutana obe siyari, kuwakuwelele akwawo nne abalawo, nne amudhawo, nne anamwaddamani awo arelile, vowi awene agahukuwelela yoja yawa vina ejo egakalile ninga anouwiyihedha.
13 Vano ogakosihaga mattanga wakuwelelevo ayelegi, aragali, akwettenkwe na aliba ohona;
14 dhawene onele ohagalala, sabwani awene kanna youwiyihedha. Vano oneyihedhiwe nsaka ninavenyihiwe aligani mukwani.”
15 Mmodhavo wa abale akuweleliwevo, mwiwaliye esodhá ohiloga dhahi: “Wohagalala ddule onja* vamattangani Mumweneni mwa Mulugu.”
16 Yezu ohiloga dhahi: “Mulobwana dhahi wahakuwelela attu enjene vamattangani manddimuwa.
17 Mfiyedhe mudhidhiyá, iyene oharuma adhari aye wi awaddele akuweleliwevoyá: ‘Kadhaunoni, vowi dhotedhene dhili dhomala-nawale.’
18 Vano otene aroma okodda. Woroma ohiloga dhahi, ‘Ddigula nddabo ddinfuna ddidhowe ddone, ddinoukumbirha oddilevelele.’
19 Vina mwina ohiloga, ‘Ddigula ng’ombe kumi ddindhowa ddone, ddinoukumbirha oddilevelele.’
20 Oku mwinayá ohiloga, ‘Dditelile ovanenevi, nona kaddinawodhe odhowa.’
21 Dhahene mudhariyá ohiyela vina omwaddela nabuyaye dhotedhene. Mwinya wa vatakuluva osilidhiwa vaddiddi vina omwaddela mudhari waye: ‘Kadhowa momaguva mmarampani na dila dha musidadi wàdhena ayelegi, aragali, aliba ohona na akwettenkwe.’
22 Vasogorhova mudhari ole ohiloga: ‘Nabuya, dhirumilenyu dhihikosiwa, vano ohalavi mburo.’
23 Nowidhawo Nabuyayá omwaddela mudhariyá: ‘Kadhowa mmarampani, na mudila wakukuse wi avolowe wila vatakulu vaga vadhále attu.
24 Vowi miyo ddinouwaddelani wi mwa abale akuweleliwevo kavo nne mmodha onaje mattanga aga.’”
25 Muttitti mwinjene wankosa oleddo na Yezu, venevo iyene ozugunuwa ohawaddela:
26 “Akala muttu onofuna okala namafwara waga, ahimwidda* babe, maye, mwadhiye, anaye, abalaye, arogoriye vina ahifiyedha okodda egumi yaye, kanfwanyela okala namafwara waga.
27 Ole ohinttukula pingirhizi* yaye ya goyi, addifwaragavi kanfwanyela okala namafwara waga.
28 Motagiha, bani mwa nyuwo oni agafunaga omaga nyumba yaye yolapela odhulu, ahiroma ogilati apimá dhinfuneya ona akala dhinniyena dhinowakwanela opulihana?
29 Sabwani onodha omuroma alsersi, vano ahiwodhe opuliha, venevo otene animona anoroma omuteya,
30 alogaga: ‘Mulobwana oddu oroma omaga, vano kawodhile opuliha.’
31 Obe mwene gani oni agafunaga odhowa okoddoni, ahiroma ogilati, apimá, ona wi akala na anyakoddo 10.000 aniyena onele owodha owana na mwene mwina onna anyakoddo 20.000?
32 Txibarene, agona wi kanawodhe, onoruma nikuru na anamukatti wi adhowe ewananele murenddele, oku mukwayeya bali wolapela.
33 Yakakene vina, ziwaní wi mwa nyuwo, ole ohinattiye* dhokana dhaye kanawodhe okala namafwara waga.
34 “Txibarene, mwinyu onoziva. Kito akala mwinyuyá onokumuwa, munakosena eni wi mwiyihedhe ozivawa?
35 Kunlabela elobwene, nne vamattakani nne wi okale estrumi, vano attu anottukula barahilela otakulu. Onna maru owiwana, ewe.”
Manota
^ Obe, “nsiba,” winjiva manje mmaningoni.
^ Na egregu, “onja pawu.”
^ Obe, “ohinimukwela vang’onovi.”
^ Kang’ana Mazu Atapuleliwe.
^ Obe, “ohinanyanyale.”
