Dhilebiwe na Luka 15:1-32
15 Anamapitxiha musoko otene na attegiya, antugumana vàliye wi anvuruwane.
2 Afarizi vamodha na anamasunziha maganoyá anong’ona dhahi: “Mulobwana oddu onowawakela vina onoja na attegi.”
3 Venevo iyene ohawaddela yoladdaniha eji,
4 “Bani mwa nyuwo onkaana mabila 100, vano nirimelavo nimodha akodda ottiya 99 mwiddeddereni, adhowa otamela nirimelile ofiyedha ofwanya?
5 Agafwanya onowika vetturini vina onottaba.
6 Agafiya vatakulu onowakuwela akwaye, anamwanddamani aye vina onologa, ‘Ttabaní vamodha na miyo, vowi ddihifwanya nibila naga narimelile.’
7 Ddinouwaddelani ebaribari, n’ekalelo yakakene onele okala ottaba onddimuwa wirimu mwaha wa muttegi mmodha ontxinuwa, opitta attu oligana murima 99 ahinna mwaha wa otxinuwa.
8 “Obe muyana gani onkaana drakima kumi, egarimelavo modha akodda ottiddiha panti, asela mba, afwaseyela otamela, ofiyedha ofwanya?
9 Agafwanya onowakuwela akwaye* na anamwanddamani aye vina onologa: ‘Ttabaní vamodha na miyo, sabwani ddihifwanya drakimaga* yaddirimelile.’
10 Ddinouwaddelani n’ekalelo yakakene anju a Mulugu anottaba mwaha wa muttegi mmodha, ontxinuwa.”
11 Vasogorhova Yezu ohiloga: “Mulobwana dhahi wanna aima eli.
12 Mimaya ohiloga na babe: ‘Babani muddivahe epaddi ya dhorela dhinfunenyu oddittiyedha.’ Venevo babiwayá ohagawela dhoreladhá.
13 Mvirele malabo mang’onovi, mwanaye wa mimaya ottukula dhaye dhotedhene, okosa oleddo adhowaga elabo yolapela. Wenewo ononga dhorela dhaye dhotedhene, akosaga dhilobo dhabure.*
14 Mmaleliye ononga dhotedhene, mwilaboni mpule mwadhowiliye mutatamuwa dala enddimuwa. Venevo iyene oroma otabuwa na dala.
15 Ofiyedha odhowa otamela mabasa wa muttu dhahi wa elaboyá ejo. Oddoyá omuruma omundda wi ang’anelege guluwe dhaye.
16 Iyene wanfuna vaddiddi oja, dhoja dha guluwe, mbwenyi kaaliwo wanvaha elobo.
17 “Mugilateliye apimá, ohiloga: ‘Anamalaba angasi ali va babaga anna oja gwé, oku miyo ddikwaga dala veneva!
18 Ddinovenya ddidhowe wa babani ddamwaddele dhahi: “Babani, ddimuttegela Mulugu wirimu vina ddiuttegelani nyuwo.
19 Ovano kaddinfwanyela okala mwaninyu. Muddonege ninga namalabinyu.”’
20 N’eji ovenya odhowa ogumana na babe. Bali wolapela-wene, babe omona, oheddiwa ttagaraga venevo omuttamagela, omukubatta vina ombejar venjene.
21 Mwanayá ohiloga dhahi: ‘Babani ddimuttegela Mulugu wirimu vina ddiuttegelani nyuwo. Kaddinfwanyelela vina okala mwaninyu.’
22 Nowidhawo, babeya ohawaddela adhari aye: ‘Kamaguvani! Mudhowele dhabalo dholapa, dhattimadhá, mmwabalihe, mmwabalihe vina aneli na sandáliya.
23 Mmudhena vina mwana-ng’ombe wokumayá, mumpe, nije vina nikose mattanga,
24 sabwani mwanaga oddu wahikwa vano ohiyelela okalawo, wahirimela vano ofwanyiwa.’ Venevo aroma oja mattanga.
25 “Mwanaye munddimuwayá wali omundda, eyelagawo addamelaga vatakulu, ohawiwa attu ebaga vina atxettaga.
26 Venevo omukuwela namalaba modha wa vatakuluva ohinvuza txini yapadduwa.
27 Oddoya omwakula: ‘Mbalawo ohiyela, babinyu ohimpela mwana-ng’ombe wokumayá vowi omwakelile wamugumene.’
28 N’eji iyene osilidhiwa vina okodda ovolowa. Venevo babe oroma omuttidda myeddo wi avolowe.
29 Iyene omwakula babe dhahi: ‘Ddiulabelani vyaka dhinjene ninga mudhari vina nne kaddinalupaga dhoruma dhenyu, masiki dhawene nyuwo kamuddivahile mbuzi nne ngafuna dila mmodha wi ddije vamodha na akwaga.
30 Vano mfiyedhe mwaninyu oddo, onongile* dhorela dhenyu na ajeberuwa, nyuwo mumpela mwana-ng’ombe wokumayá.’
31 Babeyá omwakula: ‘Mwanaga, weyo olivi na miyo mudhidhi wotene vina dhotene dhinna miyo sawo.
32 Mbwenyi iyo ninja mattanga, nimuttabelaga mbalawo oddu bahi. Sabwani iyene wahikwa vano ohiyelela okalawo, wahirimela vano ofwanyiwa.’”
Manota
^ Obe, “ayana akwaye.”
^ Drakima yali kobiri ya parata, ya agregu yattambirha muttu agalaba siku nimodha.
^ Obe, “dhohikana malago.”
^ Na egregu, “ojile.”
