Dhilebiwe na Luka 16:1-31
16 Venevo Yezu ahawaddela anamasunza aye: “Mulobwana dhahi worela wahikana nameddiha dhorela dhaye* omagedhiwe weddiha bure dhorela dha nabuyaye.
2 Iyene omukuwela vina ohinvuza dhahi: ‘Eso dhiniwemi mwaha wawo txini? Kalebela dhotedhene dha mmabasani mwawo, vowi oromana ddabuno kunakale vina nameddiha wa ntakulu naga.’
3 Venevo mwimeleli ole ohiloga dhahi: ‘Ddinakose eni, vowi nabuyaga onoddittiyiha mabasa a wimelela ntakulu naye? Miyo kaddinna guru y’olima vina ddinokana manyazo okumbirha.
4 Eyaa! Ddiziwa enfunemi okosa wi ddigattiyihiwa mabasaga a wimelela, attu addakele mmatakulu mwawa.’
5 Amukuwelaga mmodha-mmodha mwa abale anfiyarile nabuyaye ohinvuza woromayá: ‘Weyo oninfiyari muttengo gani nabuyaga?’
6 Iyene ohakula dhahi: ‘Ddininfiyari malituru a makura 2.200.’* Venevo nameddihayá ohiloga: ‘Kattukula njangarha nawo ogilati olebevo momaguva malituru 1.100* a makura.’
7 Venevo ohinvuza mwina: ‘Ki weyo oninfiyari dhavi?’ Iyene omwakula: ‘Saku* zana dha tirigu.’ Mwimeleliya ohiloga: ‘kattukula njangarha nawo, olebevo saku 80.’
8 Nabuyayeyá omusiba sabwani masiki vàliye wohiroromeleya, wahikosa dhilobo dhapama. Attu a nsaka nttino* anowodha wedda na ononelamo opitta emeleli a Mulugu.*
9 Ddinouwaddela vina: Mwakose amarho na dhorela dhabure* wila esodhá dhigamala, awene awakeleni mmimburoni mwawa mwa mukalakala.
10 Ole onroromeleya na dhilobo dhing’onovi, onororomeleyana vina dhinji, vano ole ohinroromeleyana dhilobo dhing’onovi kanroromeleyana dhilobo dhinji.
11 Akala nyuwo kamunoniha ororomeleya, mugeddihaga dhorela dhabure* bani onaukuluvelenina dhili dh’ebaribari?
12 Vina mugahonihege ororomeleya mugeddihaga dhakwenyu, bani onauvaheni dhikoyeliwenyu?
13 Kawo mudhari onwodha walabela anabuya eli; agamukwela mmodha, onomwidda mwina, obe agaziveliwa na mmodha, onompwaza mwina. Nona kinwodheya nyuwo omulabela Mulugu vina olabela Dhorela.”
14 Afarizi aziveliwetxa kobiri, anvuruwana dhotedhene dhalogiye, venevo aroma ombedda.
15 Nona iyene ohiloga dhahi: “Nyuwo munologa vamentoni va attu wi muli oligana murima, vano Mulugu onoziwa murima wenyu. Sabwani esile dhinonana attu ttima enddimuwa, s’otakala* vamentoni va Mulugu.
16 “Nlamulo na dholeba dha Anamavuhulela, dhanlaleyiwa mpaka odha wa Joau. Oromana venevo, Omwene wa Mulugu onolaleyiwa ninga muttaka wapama vina attu a malogo otene, anovilibihedha ofwanya.
17 Txibarene, masiki elabo na erimu dhigome, kinawodheye ogoma nne ngafuna letra nimodha ning’ono na Nlamulo, dhihinatti wakwanihedheya dhilebiwemo.
18 “Wotene ole ommwalana* na mwadhiye, amutela muyana mwina onolupa matelo. Vina onimutela muyana omwaliwe,* na mamune onolupa matelo.
19 “Wahikalawo mulobwana mmodha wa mureli wabala guwo dha linyu dha muttengo munddimuwa, vina wanjavo dhorela dhaye siku na siku.
20 Wahikalawo vina namakumbirha esmola dhahi wakuweliwa Lázaro, wattiyiwetxa vamusuwo vaye, oddoya wadhalile dhiloddavi.
21 Iyene wanfuna vaddiddi oja dhamotta vameza va mureli ole, vina anabwa andha olandda vilodda dhaye.
22 Movira wa mudhidhi namakumbirhayá ohikwa, ottukuliwa na anju odhowiwana vakuvi va Abrahamu.*
“Mureli vina ohikwa odhowa winteriwa.
23 Mmasiye* mwaliye wantabuwa venjene, n’eji ohang’ana odhulu, omona wolapela-wene Abrahamu vamodha na Lázaro.
24 Venevo iyene okuwa alogaga: ‘Babani Abrahamu, muddeddele ttagaraga, mmurume Lázaro anyettihe ebuno yaye mmanjeni, aridhihena nlumi naga, sabwani ddinotabuwa vaddiddi vamottoni obu munddimuwa.’
25 Mbwenyi Abrahamu omwakula dhahi: ‘Mwanaga, kobuwela pama, mwigumi mwawo wahakela dhapama dhinjene, mbwenyi Lázaro wakelile dhaburevi bahi. Nona iyene onopangarhaziwa okuno, mbwenyi weyo onotabuwa.
26 Ottiya ejo, vari vehu vahitiwa ovaya onddimuwa. Nona abale anfuna ovenya okuno wi avirele wenewo kanwodha, nne vina kinwodheya attu ovenya wenewo bavirela mpaddi wehu.’
27 Nowidhawo, mureliya ohiloga, ‘Akala eli dhawene, ddinoulobani babani wi mmurume vatakulu va babaga,
28 sabwani ddikaana abalaga atanu, ddinfuna iyene awaddele wila anadhe mburo obuno wotabuwa.’
29 Mbwenyi Abrahamu omwakula alogaga: ‘Awene akaana dholeba dha Mizé vina dha anamavuhulela, ewelelege esuwene.’
30 Iyene ohiloga: ‘Nne, babani Abrahamu. Akala muttu onovenyihiwa mukwani adhowa ogumana na awene, aweneyá anele orugunutxa murima.’
31 Venevo Abrahamu omwaddela: ‘Akala awene kanvuruwana dholeba dha Mizé na dha anamavuhulela, masiki muttu avenyihiwe mukwani awene kananvuruwane.’”
Manota
^ Obe, “mwimeleli wa ntakulu.”
^ Na egregu, “batu 100.” Batu modha yakwanela malituru 22.
^ Na egregu, “batu 50.” Batu modha yakwanela malituru 22.
^ Saku modha yalemela wakwanela kilu 170.
^ Kang’ana Mazu Atapuleliwe, anloga: “Nsaka nttino.”
^ Na egregu, “ana a txeza.”
^ Obe, “dhohiligana.”
^ Obe, “dhohiligana.”
^ Obe, “s’owugiha mara.”
^ Kuloga, mulobwana onimmwala mwadhiye ehili mwaha wa ogonihana wonyakuwa.
^ Kuloga, muyana omwaliwe ehili mwaha wa ogonihana wonyakuwa.
^ Na egregu, “vapetoni.”
^ Obe, “Hades,” mburo onikiwa attu otene. Kang’ana Mazu Atapuleliwe.
