Dhilebiwe na Luka 17:1-37
17 Mmaleliye ohiloga dhahi na anamasunza aye: “Kinwodheya ohikalawo mwaha wokwakwattutxa. Vano, wantowa ddule ontota!
2 Egamukalela komageleliwa mukotti nlugu ninddimuwa n’otxilana avokeliwa munyaza, ehili omukwakwattutxa mmodha wa aba ang’onoyá.
3 Mukale txenjewa. Akala mbalawo onowira yottega, omusumulele vina agatxinuwa kamulevelele.
4 Masiki akala onouttegela dila tanu na bili vasikuni, vano adha dila tanu na bili, alogaga: ‘Miyo dditxinuwa,’ kamulevelele.”
5 Arumiwi ahiloga dhahi na Nabuya: “Nivahenivi nroromelo.”
6 Venevo Nabuya ohiloga: “Nyuwo kokana nroromelo n’oligana na ttaga ya mostarda mugahiloga na muri* obu. ‘Kadduwa, odhowe wavitxeye munyaza!’ Muriya ogahuwiwelelani.
7 “Bani mwa nyuwo onkaana mudhari waye onlaba mmunddani obe onsapiha mabila aye, oni ageyela omunddawa amwaddela dhahi: ‘Kadhawuno momaguva ogilati vameza oje?’
8 Ehili ologa dhahi: ‘Kaddisasanyedhe siyari yaga, kamwabale aventali oddigawele ofiyedha miyo omala oja na omwa. Ogamala weyo onele oja vina onele omwa’.
9 Koddi iyene onele omutamalela mudhariyá mwaha wa okosa dhittomeliwiye?
10 Na mukalelo wakakene, mugamala opuliha dhotedhene dhittomeliwenyu, muloge dhahi: ‘Nili adhari bahi, kaninfwanyelela elo. Nikosile yafwanyelihu okosa.’”
11 Yezu adhowaga o Jeruzalemi ovira o Samariya na o Galileya.
12 Afiyaga murudda dhahi, alobwana kumi anna maranya, ahinfwarela mbwenyi emelile wolapela-wene.
13 Awene akuwa na lizu noliba: “Yezu, Namasunziha, muneddele ttagaraga!”
14 Mwawoneliye, ohiloga: “Kadhowani mwavyonihe wa anamakutta.” Venevo adhowaga avulumutxiwa.
15 Mmodhayavo moneliye wi wamala ovulumutxiwa, ohiyela amuttittimihaga Mulugu na lizu noliba.
16 Okokora osogorho wa Yezu, okunamela vati amutamalelaga. Odduya wali mukadda Samariya.
17 Yezu ohiloga dhahi: “Otene kumi avulumutxiwa, kahiyo mwenemo? Kito ena atanu na anayi ali wuvi?
18 Kawo mwina wiyelile wi amuttittimihe Mulugu, ahili mulobwana oddu wa nlogo nina?”
19 Mmalelani Yezu omwaddela: “Kavenya, odhowe; nroromelo nawo niuvulumutxa.”
20 Afarizi ahinvuza mudhidhi ogadhile Omwene wa Mulugu, vano iyene ohawakula: “Omwene wa Mulugu kunadhe n’ekalelo enoniwe na otene;
21 nne attu kanaloge: ‘Moone oli apa!’ obe ‘Oli apale!’ Ziwaní wi Omwene wa Mulugu oli vari venyu.”
22 Venevo Yezu ohiloga dhahi na anamasunza aye: “Ninele ofiya nsaka ninafune nyuwo wona ngafuna siku nimodha na Mwana-muttu, mbwenyi kamunone.
23 Vina attu anele ouwaddelani: ‘Moone oli apale!’ obe ‘Moone oli apa!’ Kamubudduwe nne vina kamwafware.
24 Dhahene ninga jayi emmoneya wirimu oku-n’oku, yakene jinapadduwe siku na Mwana-muttu.
25 Voroma, enofuneya iyene otabuwa dhinjidhene vina akoddiwe na attu a nsaka nttino.
26 Ottiya ejo, dhahene ninga mpadduweli masiku a Nowé, yakakene jinapadduwe masiku a Mwana-muttu:
27 attu anja, ammwa, alobwana antela, ayana antelihiwa, ofiyedha siku nivolowile Nowé mpangayani, vina odha Mpulo Munddimuwa watolotxile otene.
28 Enakale vina ninga ejile epadduwile nsaka na Loti, attu anja, ammwa, angula, anguliha, annala vina ammaga.
29 Vano, siku nibudduwile Loti mu Sodoma, wirimu orubwa motto na enxofre dhatolotxile otene.
30 Yakakene jinapadduwe siku ninonihiwe Mwana-muttu.
31 “Siku-nene ntto ole onakale vadhulu va nyumba* oku dhaye badhili mba, katitele ottukula; n’ekalelo yakakene ole onakale omundda, keyelele dhilobo dhihalile mundduni.
32 Mmubuwele mwadhi Loti.
33 Onatamele ovuna egumi yaye onele oyelela; vano ole onayelele onele ovuna.
34 Ddinouwaddelani, omattiyu-wene obo, attu eli anele ofwanyiwa kama modhene; mmodha onele ottukuliwa mbwenyi mwina onele ottiyiwa.
35 Ayana eli anele ofwanyiwa atxilaga va nlugu ninddimuwa n’otxilana nakakene; mmodha onele ottukuliwa mbwenyi mwina onele ottiyiwa.”
36 * ——
37 Nowidhawo awene ahinvuza: “Wuvi, Nabuya?” Yezu ohawakula: “Vanakale maningo, pavenevo vanagumane dhipungu.”
Manota
^ Wali muri wakuweliwa amoreira.
^ Nyumba dhinjene vadhuluva vanttiddiwa mabasa ottiyana-ttiyana.
^ Versikulu eji enofwanyeya mmaBibiliani meena, mbwenyi mmapapini awale okuluveleya kinfwanyeyamo.
