Dhilebiwe na Luka 19:1-48
19 Yezu ofiya o Jerikó, aviraga musidadimwa.
2 Mwenemo mwahikala mulobwana wakuweliwa Zakewu, wali munddimuwa wa anamapitxiha musoko vina wali mureli.
3 Iyene wanfuna omona Yezu, mbwenyi kawodha vowi wali muttu wokiva.
4 Nona ottamagela osogorho, owela muri wa mfigera wi amone, vowi Yezu wafuna avire venevo.
5 Vano Yezu mfiyeliye mburo obule ohang’ana odhulu vina omwaddela: “Zakewu katita nomaguva sabwani ddabuno ddinfuna ddikale vatakulu vawo.”
6 Venevo iyene otita nomaguva vina omwakela vatakulu vaye n’ohagalala.
7 Monelani esodhá, otene aroma omwaba eraga: “Odhowile okala vatakulu va muttegi.”
8 Vano Zakewu ovenya ohiloga na Nabuya: “Nabuya, kewani ddinele ogawelana vari na ayelegi dhokana dhaga vina muttu ddi muttu omwiyelemi* ddinele omwiyihedha dila nayímo.”
9 Yezu omwaddela: “Ddabuno ovuneya ofiya vatakulu apano, vowi iyene vina mwana Abrahamu.
10 Sabwani Mwana-muttu odhele otamela vina ovuna yarimelile.”
11 Oku awene avuruwanaga dhilobo esi, Yezu ohawaddela yoladdaniha yina, vowi àli waddamela o Jeruzalemi vina obuwela wi Omwene wa Mulugu onadhe mohijedheleya-mwene.
12 Iyene ohiloga: “Mulobwana dhahi mmodha wa ziza na amwene oheddela elabo yolapela wi attomeliwe omwene agamala eyele.
13 Ohakuwela adhari aye kumi, ohavaha kobiri kumi dha parata* ohawaddela, ‘Kadhowani mwakose mpinddu na kobiri esi dha parata, ofiyedha miyo wiyela.’
14 Mbwenyi attu a elabo yaye annimwidda. Aharuma anamukatti mundduni mwaye wi àloge, ‘Kaninfuna wi mulobwana oddo akale mwene wehu.’
15 “Mmaleliye okala mwene ohiyela, ohakuweliha adhari aye àvahiliye kobiri,* wi atamele oziwa yapurile muttu-muttu na mpinddu wakosiye.
16 Venevo woroma ofiya vina ohiloga: ‘Nabuya, kobiri yenyu ya parata ddigumelana kobiri dhina kumi dha parata.’
17 Iyene ohiloga: ‘Ehikala mudhari wapama! Vowi ohoniha ororomeleya na dhilobo dhing’ono, ddinele ouvaha owodha wa ottonga sidadi kumi.’
18 Vano ofiya wanawili alogaga, ‘Nabuya kobiri yenyu ya parata ddigumelana dhina tanu.’
19 Nabuyaye ologana: ‘Weyo vina onele ottonga sidadi tanu.’
20 Vano ofiyavo mwina alogaga: ‘Nabuya, kobiri yenyu ya parata eji, ddakoyile vaguwoni.
21 Miyo ddela wuwovani, sabwani muli muttu worutxa, munottukula ehikoyilenyu vina munosinanga ehalilenyu.’
22 Nabuyaye omwakula: ‘Na mazu awo miyo ddinouttonga, mudhari wabure. Kuloga wanziwa wi ddili muttu worutxa, ddinottukula ehikoyilemi vina ddinosinanga ehalilemi?
23 Ki okoddileni okoyiha kobiragayá* obanko. Wi omeyelelo waga, ddifwanya biyenjedhedhiwe?’*
24 “Venevo Nabuyaye ohiloga na abale àlivo: ‘Kamwakiheni kobiriyá ya parata munvahe ole onna kobiri kumi dha parata.’
25 Vano awene amwaddela, ‘Nabuya, iyene okaana kobiri dhina kumi dha parata!’—
26 ‘Miyo ddinouwaddelani wi ole onna, onele ovahiwavi vina onele okaana dhinjene, vano ole ohinna, masiki eng’onovi eniyena onele wakiwa.
27 Ottiya ejo, kaddidhelenina amwiddanaga abo ahifunile wi miyo ddikale mwenawa, mwape miyo ddawang’anaga.’”
28 Mmaleliye ologa eso, ovenya oroma odhowa o Jeruzalemi.
29 Vina mwaddameliye o Betfajé vina o Betánia onkuweliwa Mwango wa Olivera, Yezu oharuma anamasunza aye eli,
30 awaddelaga: “Mudhowe murudda oli osogorho wenyu, mugafiyawo munonfwanya mwana-buru omageleliwe ohinaweliwaga. Mmutapule mudhena okuno.
31 Vano akala muttu onouvuzani, ‘Munimutapulela nni?’ Muloge, ‘Nabuya ddinimutamela.’”
32 Venevo abale arumiwe adhowa vina afwanya dhahene ninga mwaddeliwani.
33 Amutapulaga mwana-buruyá, anyaya ahavuza: “Munimutapulela nni mwana-buruyá?”
34 Ahakula: “Nabuya ddinimutamela.”
35 Mmalelani amudhowana vàli Yezu, attanika guwo dhawa vadhulu va mwana-buruyá vina attiya wi Yezu amugilatele.
36 Oku iyene adhowagavi muttitti wanttanika guwo dhawa mudila.
37 Dhahene, mwaddameliye dila endhowa o Mwangoni wa Olivera, muttitti wotene wa anamasunza oroma wagalala vina wannimuttittimiha Mulugu na lizu noliba, sabwa ya merelo otene owodha-wodha onilani.
38 “Worurihiwa ddule ondha ninga Mwene na nzina na Yehova! Murenddele okale wirimu vina Mulugu avuwihiwe!”
39 Venevo Afarizi ena àli vari va muttittiyá, amwaddela: “Namasunziha, kaamaliheni anamasunza enyu.”
40 Vano iyene ohawakula dhahi: “Miyo ddinouwaddelani wi kowiliwa awene ela omala, malugu agahikuwa.”
41 Mwaddameliye sidadiyá, ohang’ana vina ohunlela,
42 alogaga: “Ddanfuna wi muziwe dhilobo dhigauvahileni murenddele—vano nyuwo muviteliwa dhilobo eso.
43 Anele ofiya masiku anfuna amwiddani awo wurugunutxela miri dhinddimuwa dhotogolowa, aurije vina aurugunuwele* dhipaddi dhotene.
44 Awene anele ougwihedha vati weyo vamodha na anawoyá vina kanattiye nlugu vadhulu va nlugu nina, sabwani kuzinddiyeli wila ofiya mudhidhi wa ottongiwa wawo.”
45 Vasogorhova iyene ovolowa mumparhani oroma wattamagiha abale agulihamo,
46 awaddelaga: “Elebiwa, ‘Nyumba yaga, enakale nyumba ya malobelo;’ vano nyuwo musaddula jikala nyumba ya ambava.”
47 Iyene wansunziha masiku otene mumparhani. Mbwenyi anddimuwa a anamakutta, na anamasunziha magano vina anddimuwa a nlogo antamela ompa,
48 vano kafwanya marhe ompana, vowi nlogo notene nanfwaseyela onvuruwana.
Manota
^ Obe, “omwiyelimi na ommagedha.”
^ Kobiri ejo yakuweliwa mina. Mina modha ya egregu yalemela garama 340 vina yali kobiri yakwanela madrakima 100.
^ Na egregu, “parata.”
^ Na egregu, “parata yaga.”
^ Obe, “na juru.”
^ Obe, “ausegedhe.”
