Dhilebiwe na Luka 21:1-38
21 Mwang’aneliye ohawona areli ekaga mivaho dhawa mukashani mwekiwa kobiri.
2 Omona vina mamukwela wa muyelegi ekagamo kobiri bili dha muttengo mung’onovi,*
3 venevo ohiloga: “Ddinouwaddelani ebaribari, mamukwela oddu wa muyelegi ohika mukashani opitta attu otene.
4 Sabwani otene ekamo mivaho dha dhohalavo dhawa, vano iyene muyelegani mwaye wikilemo dhotedhene dhaniyena dhomukalihanawo.”
5 Vasogorhova ena asibaga mparha mwaha wa mukoddelelo wakoddelani na malugu osasanyedheya vina na mivaho dhaperhekeliwa Mulugu,
6 Yezu ohiloga: “Mwaha wa dhilobo esi dhinona nyuwo ovanene, anele ofiya masiku nihinakalewo nlugu vadhulu va nlugu nina nihitolotxiwe.”
7 Ahinvuza dhahi: “Namasunziha, nsaka gani ninapadduwe dhilobo esi vina ezinddiyelo gani enonihe wi dhilobo eso dhinfuna opadduwa?”
8 Iyene ohawakula: “Mukale txenjewa wila munanyengettiwe, vowi enjene anele odha na nzina naga alogaga, ‘Ddi miyo,’ vina ‘Nsaka nipimeleliwe nifiya.’ Kamwafware.
9 Mugewa vina ologiwa mwaha wa koddo, owanawana,* kamuzuzume, vowi enofuneya wi vamaromo esodhá dhipadduwe, mbwenyi omagomo kunafiye nomaguva.”
10 Vina ohawaddela: “Nlogo ninele owana na nlogo nina, omwene na omwene mwina.
11 Onele okala ottekenyeya onddimuwa wa mattaka, vina mmimburoni dhottiyana-ttiyana munele okala orameya wa dhoja na viredda dhoraveya. Vina attu anele wona dhowopiha na vizinddiyelo dhinddimuwa wirimu.
12 “Vano eso dhotedhene dhihinapadduwa, nyuwo munele ofugeliwa, ofwara-fwariwa, munele operhekiwa mmasinagoga,* mmakambura vina munele ottukuleliwa vamentoni va amwene na va agovernador mwaha wa nzina naga.
13 Eji enele ouwodhihani ovaha onamoona.
14 Nona, mugane mmirimani mwenyu, ohubuwela na mutanene enfunenyu okosa wi muvivunena,
15 sabwani miyo ddinele ouvahani mazu na ononelamo dhihinawodhe amwiddani enyu otene wupambihani nne ousumelanina.
16 Ottiya ejo, nyuwo munele operhekiwa* na ababinyu, abalinyu, amudhenyu, akwenyu vina awene anele wapiha ena mwa nyuwo.
17 Nyuwo munele widdiwa na attu otene sabwa ya nzina naga.
18 Mbwenyi kamunarimeliwe nne ngafuna nttitti nimodha na mmusorhoni mwenyu.
19 Na ovilela wenyu, munele ovunana egumi yenyu.
20 “Vano mugamona Jeruzalemi barijiwe na anyakoddo muziwe wi otolotxiwa waye onowaddamela.
21 Venevo abale ali mu Judeya, attawele omyangoni, ali mu Jeruzalemi abudduwemo vina ali mmunddani keyele,
22 sabwani anakale masiku anadhe Mulugu wattonga attu wi dhakwanele dhotedhene dhilebiwe.
23 Goyi dhinele wattabwela ayana anakane yari vina anamwihege nsaka-nene ntto! Vowi elabo eji enele ogweliwa masoso manddimuwa na attuyá ankalamo.
24 Awene anele opiwa na supadda vina anele ottukuleliwa dhilabo dha malogo meena ninga atxedhiwe. Jeruzalemi onele onyigaliwa na malogo ofiyedha wakwanihedheya masaka apimeleliwe malogo.
25 “Onele okala vizinddiyelo va nzuwani, va mwerini, va vinenerini vina vati apano, attu a malogo anele ososeya ahiziwaga yokosa mwaha wa onyagula wa bara na manebe aye.
26 Attu anele ohileya na wova sabwa ya esile dhinapadduweliwe elabo ya vati, vowi guru dha wirimu dhinele ottekenyiwa.
27 Anele omona Mwana-muttu adhaga mmiraboni na owodha vina na nttittimiho ninddimuwa.
28 Vano dhotedhene esi dhigaroma opadduwa, mukale owimelene vina muvenyihe musorho wenyu sabwani ovuneya wenyu onowaddamela.”
29 Nowidhawo, ohawaddela yoladdaniha modha: “Kang’anani mfigera na miri dhina dhotedhene.
30 Dhigaroma osorha, nyuwo munowona vina munoziwa wi elimwe eli vakuvi.
31 Yakakene vina, mugona dhilobo esi dhipadduwaga, muziwe wi Omwene wa Mulugu oli vakuvi.
32 Ddinouwaddelani ebaribari, attu a nsaka nttino kanafiyedhe omala dhilobo dhotedhene dhihinatti opadduwa.
33 Erimu na elabo dhinele ovira, mbwenyi mazu aga txipo kanavire.
34 “Mukale txenjewa wila murima wenyu, onalemeliwetxe na ottabwihetxa oja na omwa vina na ozuzumeletxa dha egumi, wi siku ntto ninaufwanyeni morurumutxa,
35 ninga murega. Sabwani siku ntto ninele wafwanya otene ankala velaboni ya vati.
36 Nona mukale txenjewa, vina kadidelagani olobela wi muwodhe orabela dhotedhene esi dhinfuna opadduwa vina muwodhe okala owimelene vamentoni va Mwana-muttu.”
37 Vati vagaya wasunziha mumparhani, mbwenyi vagamala oriba wadhowa okala omattiyu wetene Vamwangoni wa Olivera.
38 Vina na membesi attu otene andhowa ogumana na iyene mumparhani wi amwiwe.
Manota
^ Na egregu, “leptoni bili.” Leptoni bili yali kobiri yapitxeliwa muttu agalaba mitala 10.
^ Obe, “opambihana; ohiwanana.”
^ Kang’ana Mazu Atapuleliwe.
^ Obe, “munele osadduweliwa.”
