Dhilebiwe na Luka 23:1-56
23 Muttitti wotene ovenya omuttukulela wa Pilato.
2 Venevo aroma ommagedha, alogaga: “Nihinfwanya mulobwana oddu apupurutxaga nlogo nehu, akoddihaga ompitxela musoko Sézari vina alogaga wi iyene ddi Kristu, mwene.”
3 Pilato ohinvuza: “Weyo oli Mwene wa Ayuda?” Iyene omwakula: “Ddi nyuwene mwanya munloga.”
4 Vasogorhova Pilato ohawaddela anddimuwa a anamakutta na muttitti: “Mulobwana oddu miyo kaddinfwanyilena muladdu womukonana.”
5 Awene andidela alogaga: “Mulobwana oddu onotujela nlogo, asunzihaga mu Judeya mwetemwene, oromilena o Galileya ofiyedha okuno.”
6 Ewaga esodhá Pilato otamela oziwa akala mulobwanayá wali mukadda Galileya.
7 Muziweliye wi Yezu odhile elabo yattongiwa na Herodi, omuruma wa Herodiyá, vowi masiku-ene abo wali o Jeruzalemi.
8 Herodi mmoneliye Yezu ohagalala vaddiddi sabwani wahivira mudhidhi mwinji atamelaga omona, vowi wahiwa dhinji dhalogiwa mwaha waye; wanjedha omona akosaga matikiniho.
9 Venevo oroma omukosa mavuzo menjene mbwenyi Yezu kamwakulile elo.
10 N’eji anddimuwa a anamakutta na anamasunziha magano avenya, aroma ommagedha osilidhiwene.
11 Herodi vamodha na anyakoddo aye, ahimpwaza, ahimbedda amwabalihaga guwo dhattima, mmalelani amuruma wili wa Pilato.
12 Siku-nene nttile Herodi na Pilato àli amwiddani, ahandana.
13 Venevo Pilato ohakuweliha anddimuwa a anamakutta, asogorheli vina nlogo
14 ohawaddela: “Muddidhelana mulobwana oddu ninga muttu ontujela nlogo wi nisadduwele, miyo ddihinvuza muttu oddu vamentoni venyu, vano kaddinfwanyilena muladdu mwa esile dhinimusumelana nyuwo.
15 Txibarene, Herodi vina kanfwanyilena muladdu nona amwiyihedha okuno, ninga munonelinyu iyene kakosile elobo eninfwanyeliha opiwa.
16 Nona ddinele ombubuddiha ddigamala ddinfurule.”
17 * ——
18 N’eji muttitti wotene okuwa: “Kampeni mulobwana oddo, munfurule Barabá!”
19 (Barabá oddu wafugeleliwe sabwa ya wakamihedha attu amusadduwela guverno vina sabwa ya ompa muttu.)
20 Pilato ohiloga na awene wili, sabwani wafuna anfurule Yezu.
21 Venevo, aroma okuwa: “Akomeliwe vapingirhizini, akomeliwe vapingirhizini!”*
22 Pilato ohavuzavi dila yanoraru: “Sabwaya jani? Obure gani okosile mulobwana oddu? Miyo kaddinfwanyilena muladdu oninfwanyeleliha opiwa, vano ddinele ombubuddiha ddigamala ddinfurule.”
23 Venevo aroma odidela, akokaga na okuwa wi apiwe* vina ankuwavi.
24 Venevo Pilato okosa yafunani.
25 Nomala iyene ohinfurula mulobwana òle wamukumbirhani wafugeleliwe sabwa ya wakamihedha attu amusadduwela guverno vina sabwa ya ompa muttu, ohaperhekela Yezu ninga mwafunelani.
26 Oku amuttukulaga, amuttidda muttu w’o Sirene wakuweliha Simoni wadhana omundda; ahinvijeliha pingirhiziyá* wi anfwarena Yezu.
27 Muttitti munddimuwa wa attu wanninfwara, mwa aboyá àhikalavo ayana avada vapetoni na oribiwa murima vina amunlela iyene.
28 Yezu ohazugunuwela ayanayá, ohiloga: “Ana o Jeruzalemi kamuddunlele, muvyunlele mwanya vina mwawunlele aninyu;
29 muziwe wi anele ofiya masiku analoge attu dhahi: ‘Ohagalala ba ayana ahimbala, ahinabala vina abale ahinamwihaga!’
30 Venevo anele ologa na myango, ‘Kanimotteleni!’ Vina na ttukuwa, ‘Kanikuneleni!’
31 Akala awene anokosa dhahene muriyá buli mwiti, kito txini enadhe opadduwa ogoma?”
32 Alobwana ena eli àli atimbwini ela ottukuliwa vamodha na Yezu wi adhowe apiwe.
33 Mfiyedhani mburo dhahi onkuweliwa Mburo wa Nigalagadha, amukomela vapingirhizini vamodha na atimbwiniyá, mmodha omononi waye woja, mwina omononi waye wemara.
34 Vano Yezu wanloga: “Babani, mwalevelele vowi kanziwa dhinkosani.” Ottiya ejo anyakoddoyá antamela na gari ogawelana dhabalo dhaye.
35 Muttitti wa attu wali wowimelene wang’anaga, vano asogorheli annimbedda alogaga: “Iyene ohavuna attu ena, avivune mwinya akala ddi Kristu wa Mulugu, Osakuliwe.”
36 Anyakoddo vina anniveyiha, nona amususela ahinvaha vinyu yonyunya
37 alogaga: “Akala weyo oli Mwene wa Ayuda kavivune wamwinya.”
38 Wahikala mazu alebiwe vadhulu va musorho waye aloga: “Oddu ddi Mwene wa Ayuda.”
39 Venevo, timbwini mmodha watomeyiwe vamodha na Yezu, oroma omuruwana alogaga: “Weyo kuli Kristu? Kavivune-to wamwinya vina onivune iyo!”
40 Mukwaye omwakula n’omusaddeya, alogaga dhahi: “Weyo kunimova-wene Mulugu, oku buttongeliwe yakakene?
41 Mwa iyo kanipujiwe, nintabutxeliwa dhirilehu, vano mulobwana oddu kerile-wene yabure.”
42 Venevo iyene ohiloga: “Yezu muddubuwele mugavolowa Mumweneni mwenyu.”
43 Yezu omwakula dhahi: “Mwebaribari miyo ddinouwaddela ddabuno: Onele okala na miyo Mparaizu.”
44 Wali mudhidhi wa wora 12,* n’eji elabo yotene yahikuneleya na eddima ofiyedha wora 15,*
45 txeza ya nzuwa yahittiya omoneya, venevo kurtina na mumparhani niharuwa vari.
46 Yezu okuwa na lizu noliba vina ohiloga: “Babani ddinoperheka mmadani mwenyu egumi yaga.”* Mulogeliye eso, ohikwa.*
47 Mwimeleli wa anyakoddo moneliye dhapadduwa, oroma omuttittimiha Mulugu alogaga: “Txibarene mulobwana oddu wali muligani.”
48 Muttitti wa attu watugumanele wona dhereya, monelani dhotedhene dhipadduwile ahiyelela vatakulu vawa avadaga vapetoni na okubanya onddimuwa.
49 Otene amuziwa, àli venevo owimelene wolapela-wene, ottiyá ejo vàkala ayana anvelelile ovenyana o Galileya, onile esidhá.
50 Wahikalawo mulobwana dhahi wakuweliwa Jozé, mmodha wa anamattonga makani a tribunali ya Ayuda, iyene wali muttu woligana murima vina wapama.
51 (Mulobwana oddu karumelile vina kakamihedhile yogana yawa ya ompa Yezu.) Odduya wali w’o Arimateya sidadi y’o Judeya, iyene wanjedhela Omwene wa Mulugu.
52 Mulobwana oddu odhowa wa Pilato vina okumbirha maningo a Yezu.
53 Mmaleliye, odhowa ottukula maningo a Yezu vapingirhizini, opopottela na guwo eswa ya linyu, ohika mwikuttani* yatibiwe vamalugumi mwali muhinekiwaga muttu.
54 Nàli siku na Osasanyedha, vina wahalile mudhidhi mung’onovi wila siku na Sabuddu nirome.
55 Venevo ayana adhile vamodha na iyene ovenyana o Galileya, adhowa wikuttaniwa* vina ahona mukalelo wekiwe maningo aye,
56 ahiyelela mmawani mwawa wi asasanyedhe makura onukela, vano siku na Sabuddu ahivuma ninga mwarumela malamuloyá.
Manota
^ Versikulu eji enofwanyeya mmaBibiliani meena, mbwenyi mmapapini awale okuluveleya kinfwanyeyamo.
^ Obe, “apiwe vapingirhizini, apiwe vapingirhizini.”
^ Obe, “apiwe vapingirhizini.”
^ Obe, “pingirhizi ya goyi.” Kang’ana Mazu Atapuleliwe.
^ Na egregu, “wora yanotanu na modha [nzuwa banimalile opattuwa].”
^ Na egregu, “wora yanotanu na nayi [nzuwa banimalile opattuwa].”
^ Obe, “guru ya egumi.” na egregu, “pneuma.”
^ Obe, “ohittiya ovuma.”
^ Obe, “masiye a aliba okwa anubuweliwa na Mulugu.”
^ Obe, “masiye a aliba okwa anubuweliwa na Mulugu.”
