Dhilebiwe na Luka 24:1-53
24 Siku noroma na sumana, awene afiya membesene wikuttani,* attukula makura onukela asasanyedhilani
2 Vano ahona wi nlugu nafugiwena omavolowelo wa ekuttayá* nahimala opigiritxiwa.
3 Mvolowelani kafwanyilemo maningo a Nabuya Yezu.
4 Oku bali otikinene na esidhá afiya valani alobwana eli abalile guwo dhong’animela.
5 Ayanayá attiddiwa wova vina aworamela vati, vano alobwana abale ahavuza dhahi: “Munimutamelelani ole oliwo vari va abale akwile?
6 Iyene kali veneva, ovenyihiwa mukwani. Mubuwele esile dhuwaddeleni iyene bali o Galileya,
7 wi yanfuneya Mwana-Muttu aperhekiwe mmadani mwa attegi, apiwe vapingirhizini siku nanoraru avenyihiwe mukwani.”
8 Venevo awene ahubuwela mazu aye,
9 nowidhawo, ahiyelawo wikuttaniwa* ahawaddela dhotedhene esi arumiwi aye Kumi na Mmodha na anamasunza ena.
10 Aboya alí Maria Madalena, Joana, Maria mayi wa Tiago na ayana ena; awene ahawaddela arumiwi aye dhotedhene esi.
11 Mbwenyi dhalogiwadhá dhàkalela ninga kadhanna osogorhowa, nona kàrumela dhaloga ayanayá.
12 Vano Pedro ovenya ottamagela wikuttaniwa,* muworameliye wi ang’anemo wonilemo guwovi dha linyu. Dhahene odhowa avivuzaga txini yapadduwile.
13 Sikunene nttile anamasunza eli ela okosa oleddo adhowaga murudda onkuweliwa Emauz, walapelena na Jereuzalemi makilometuru 11,*
14 vina anloga dhotedhene esile dhapadduwile.
15 Oku alogaga vina apambihagana esidhá, Yezu ohawaddamela oroma wedda vamodha na awene,
16 vano awene kawodha omuzinddiyela.
17 Yezu ohavuza: “Makani gani anloga nyuwo oku mweddaga?” Vano awene ahimela oribiwene murima.
18 Mmodhavo wakuweliwa Kléyopa omwakula dhahi: “Muli mwana-wedda, munkala moka mu Jeruzalemi, kamunziwa* dhilobo dhipadduwilemo masiku abano?”
19 Iyene ohavuza: “Dhilobo gani?” Amwakula: “Dhilobo mwaha wa Yezu Munazareti, wali namavuhulela wowodha na merelo vina na mazu vamentoni va Mulugu vina va nlogo;
20 anddimuwa ehu a anamakutta na anddimuwayá a nlogo ahimperheka wi attongeliwe opiwa vina ahimukomela vapingirhizini.
21 Mbwenyi iyo najedhela wi mulobwana oddu ddule aganfurulile Izrayel. Ottiya ejo napano masiku mararu mupadduwele esidhá.
22 Ayana ena a nikuru nehu anitikiniha, vowi adhowa wikuttani* membesene,
23 vina muhifwanyelaniwo maningo aye, ahiyela alogaga wi ahawona anju awaddelile wi Yezu okalawo.
24 N’eji ena mwa iyo adhowa wikuttaniwa* afwanyawo dhahene ninga mwalogele ayanayá, mbwenyi kamonile Yezuyá.”
25 Dhahene iyene ohalogana: “Nyuwo mukalile dhavi attu otowa zelu vina angonela orumela esile dhilogiwe na anamavuhulela!
26 Kiyali yofuneya wi Kristu atabuwe dhilobo esi vina avolowe munttittimihoni mwaye?”
27 Venevo iyene ohatapulelamo dhotene dha Mmaleboni dhamuloga iyene; oromana Mizé ofiyedha Anamavuhulela otene.
28 Mmalelani ahaddamela murudda wadhowani, vano iyene okala ninga ondhowa wolapela-wene.
29 Venevo olobwanayá amudidela wi ahale na awene alogaga: “Kahala na iyo vowi vati vanfuna oriba vina eddima enoroma ovanene.” N’eji ovolowa wila akale na awene.
30 Iyene ajaga* na awene, ottukula pawu olobelela omwenya oroma wagawela.
31 N’eji mento awa afuguwa aziwa wi ddi Yezu; mbwenyi iyeneyá orimelavo.
32 Venevo ahiloga muttu na mukwaye: “Txibarene, mazu aye anddiginya mirima dhehu, valogiye mudila na iyo anitapulelagamo Malebo!”
33 Mudhidhene obule awene avenya ahiyelela o Jeruzalemi, vina ahafwanya arumiwi aye Kumi na Mmodha vamodha na ena atugumanilanina,
34 anloga: “Kavali waganyedha Nabuya ovenyihiwa mukwani vina omuttanyuwela Simoni!”
35 Venevo ahawaddela dhapadduwile mudila vina makalelo amuzinddiyelanina amenyaga pawu.
36 Oku alogagaví esidhá Yezu ofiya vari vawa vina ohiloga na awene: “Murenddele okale na nyuwo.”
37 Vano awene otikinene vina na wova obuwela wi anona muya.
38 Venevo iyene ohavuza: “Munkubanyelani, kito mmurimani mwenyu muniteyelani waganyedha?
39 Kang’anani mada aga vina na manyalo aga munoddona wi ddi miyene; kaddittiddeni vina konani, vowi muya kunkana nama nne magogoddo dhahene ninga munonelinyu wi miyo ddikaana.”
40 Alogagaví eso, ohatonyihedha mada na manyalo aye.
41 Mbwenyi awene karumelavi mwaha wa ottaba na otikina wanani, n’eji Yezu ohavuza: “Veneva mukanavo elobo yoja?”
42 Amenya oba yowotxa ahinvaha,
43 iyene ohakela, oja otene amonaga.
44 Iyene ohawaddela: “Aba ba mazu aga awaddeleni miyo baddili na nyuwo, wi enofuneya wakwanihedheya dhotedhene dhinddiloga miyo dhilebiwe Mmalamuloni a Mizé na Anamavuhulela vina Mmasalmuni.”
45 Venevo iyene ofugula yubuwelo yawa wi anonelemo dhatapulela Maleboyá,
46 vina ohawaddela: “Elebiwa wi Kristu agahitabuwa, siku nanoraru avenyihiwe mukwani,
47 vina na nzina naye malogo otene ovenyana o Jeruzalemi—agahilaleyeliwa otxinuwa wa dhotega dhawa.
48 Nyuwo munele okala anamoona a esidhá.
49 Ziwaní wi ddinele ourumelani epikirheli Babaga. Vano mukalevi mu sidadi ofiyedha wakela owodha onadhele wirimu.”
50 Vasogorhova iyene ohattukulela otakulu, adhowa o Betánia, ohatapulela mada oharuriha.
51 Arurihaga, ohattiya venevale vina iyene ohittukuleliwa wirimu.
52 Awene amukokorela* mmalelani ahiyelela o Jeruzalemi na ohagalala onddimuwa.
53 Vina masiku otene akala mumparhani amuttittimihaga Mulugu.
Manota
^ Obe, “masiye a aliba okwa anubuweliwa na Mulugu.”
^ Obe, “masiye a aliba okwa anubuweliwa na Mulugu.”
^ Obe, “masiye a aliba okwa anubuweliwa na Mulugu.”
^ Obe, “masiye a aliba okwa anubuweliwa na Mulugu.”
^ Na egregu, “Estadiyu 60.” Estadiyu modha yakwanela meturu 165.
^ Obe txino, “ddi nyuwo bahi muli muleddo mu Jeruzalemi muhinziwa?”
^ Obe, “masiye a aliba okwa anubuweliwa na Mulugu.”
^ Obe, “masiye a aliba okwa anubuweliwa na Mulugu.”
^ Obe, “ogilati vameza.”
^ Obe, “ahimuttittimiha.”
