Dhilebiwe na Luka 5:1-39
5 Mudhidhi dhahi Yezu wali nikome na nttadda n’o Jenezareti,* venevo muttitti wamurugunuwele wanfunyana wi ewe mazu a Mulugu.
2 Iyene ohona mwanddiya minli dhali nikome na nttadda, vano anamattaddayá àhimala obudduwamo mmwanddiyanimwa, asuwa milaba dhawa.
3 Muweleliye mwanddiya mmodha wali wa Simoni omukumbirha wila asusihedhe vang’ono munyaza, ogilati mwenemo oroma wasunziha attuyá.
4 Mmaleliye ologa, omwaddela Simoni: “Kadhowa epaddi yoririmela vina mutuputxedhe milaba dhenyu wila musape.”
5 Simoni omwakula: “Namasunziha, nihilaba vaddiddi omattiyu wotene, kanipile elo; vano vowi onkumbirha ddi nyuwo, ninele otuputxedha milabadhá.”
6 Mutuputxedhani apa oba dhinjene, ofiyedha milabadhá oroma otayeya.
7 Ahakuwela akwawa akosanina mabasa vamodha, àli mwanddiya mwina wi adhe akamihedhe, mfiyedhani adhaliha mwanddiya dhominli ofiyedha mwanddiyadhá oroma oririma.
8 Simoni Pedro moneliye eso, okokora osogorho wa Yezu, alogaga: “Kasusanivo Nabuya, vowi miyo ddili muttu wottega.”
9 Vowi Simoni vamodha na otene àli na iyene atikina mwaha wa winjiva wa oba dhapilani.
10 Yakene jipadduwile na Tiago vina Joau ana a Zebedeu akosa mabasa vamodha na Simoni. Mbwenyi Yezu ohiloga na Simoni: “Kuwove. Oromana ovanene onakale namattadda wa attu.”
11 Dhahene awene atxapela mwanddiyayá nikome, attiya dhotedhene ahinfwara.
12 Siku nina iyene wali sidadi dhahi, wenewo omona mulobwana dhahi wali maranyavi! Mulobwanayá mmoneliye Yezu, okokora, okunamela vati amulobaga dhahi: “Nabuya, mugafuna kaddivulumutxeni.”
13 Dhahene iyene otapula nlada naye, omuddiginya mulobwana ole, alogaga: “Miyo ddinofuna! Kavulumuwa.” Mudhidhene obo, maranyayá amuttiya.
14 Venevo omwaddela mulobwanayá wi ahimwaddele muttu vina ohenjedhedhavo eraga: “Mbwenyi kadhowa wavyonihe wa namakutta vina waperheke mukutto ninga munrumela Nlamulo na Mizé, wi awene aziwe ovulumutxiwa wawo.”
15 Mbwenyi miselu dhalogiwa mwaha waye dhammwadheyavi vina muttitti wa attu wantugumana vàliye wi avuruwane masunziho aye vina avulumutxiwe viredda dhawa.
16 Vano dila dhinjene Yezu wandhowa mimburo dhahakaliwetxa wi alobele.
17 Siku nimodha iyene asunzihaga, Afarizi na anamasunziha magano abudduwa dhipaddi dhotene dha o Galileya, dha o Judeya na o Jeruzalemi àli venevo ogilatene, guru dha Yehova dha wavulumutxana attu dhali na Yezu.
18 Venevo adha alobwana dhahi amuttebile mulobwana woragala vamakani, awene antamela ovolowa wi anfiyena vàli Yezu.
19 Nona sabwa yawi kawodha omuttukulela mba mwaha wa muttitti, ahiwela vadhulu va nyumba, ahititihedha makayá mutxiddo mpaka ofiya vari va abale àli waddamana na Yezu.
20 Moneliye nroromelo nawa, omwaddela dhahi: “Mulobwana wé, dhottega dhawo dhileveleliwa.”
21 Vano anamasunziha magano na Afarizi aroma wubuwela alogaga: “Odduya bani onloga dhonyimula? Onwodha olevelela dhottega bani, ahili Mulugu bahi?”
22 Vano Yezu aziwaga dhobuwelani ohawakula dhahi: “Txini dhinubuwelinyu mmirimani mwenyu?
23 Enrutxa ologa jivi, ‘Dhottega dhawo dhileveleliwa’ obe ‘Kavenya vina kedda’?
24 Vano wi muziwe yawi Mwana-muttu ovahiwa owodha wolevelela dhottega velaboni ya vati—” iyene omwaddela mulobwana ole woragala: “Miyo ddinouwaddela, Kavenya ottukule maka awo odhowe vatakulu.”
25 Venevo iyene ovenya otene amonaga, ottukula maka aye odhowa vatakulu amuttittimihaga Mulugu.
26 N’eji otene atikina vaddiddi, aroma omuttittimiha Mulugu, vina na wova anloga dhahi: “Ddabuno nihona dhowumiha milomo.”
27 Mmaleliye obudduwa omona namapitxiha musoko wakuweliwa Levi, bagilatile vapitxiwa musoko, venevo omwaddela: “Kakala namafwara waga.”
28 Levi ottiya dhotedhene venevale, ovenya vina oroma omfwara.
29 Venevo, Levi okosiha mattanga manddimuwa wi amwakelena vatakulu vaye, wahikalavo vina muttitti mwinjene wa anamapitxiha musoko na ena aja* vamodha na awene.
30 N’eji Afarizi na anamasunziha magano awa, aroma onong’ona alogaga na anamasunza aye: “Nyuwo munjelani vina mumwelani na anamapitxiha musoko vina na attegi?”
31 Yezu mwiwaliye ohiloga: “Attu ali agumi kanimutamela mediku, mbwenyi animutamela babale ali aredda.
32 Miyo kaddidhele wakuwela aligani, ddidhele wakuwela attegi wi atxinuwe.”
33 Awene ahiloga: “Anamasunza a Joau anottuga dila dhinjene vina anolobela na ntidi, yakakene jinkosa anamasunza a Afarizi, mbwenyi enyu anoja vina anomwa.”
34 Yezu ohavuza: “Enowodheya nyuwo wattugiha amarho a muteli* oku muteliyá bali na awene?
35 Mbwenyi, anele ofiya masiku ahinakale muteliyá* na awene, malabo abo panattugani.”
36 Iyene ohawaddela yoladdaniha eji: “Kawo ongwadda epaddi ya guwo eswa, batxaparina guwo yawale. Agakosa dhawene, onononga guwoyá eswa, venevo etxapareliwewoya kinvahana na guwo yawale.
37 N’ekalelo yakakene, kawo onika vinyu eswa, mmabudduni awale asasanyiwe na ttebe. Akala muttu onokosa dhawene, vinyu eswa enotaya mabudduyá jikuttuwa, vina mabudduyá banyongeya.
38 Nona vinyu eswa enikiwa mmabudduni maswa.
39 Kawo muttu ontamela vinyu eswa bamalile omwa vinyu yawale vowi onologa, ‘Vinyu yawale jinziva.’”
