Dhilebiwe na Luka 6:1-49
-
Yezu “Nabuya wa Sabuddu” (1-5)
-
Mulobwana woragala nlada onovulumutxiwa (6-11)
-
Arumiwi 12 (12-16)
-
Yezu onosunziha vina onovulumutxa (17-19)
-
Ohagalala vina ntowa (20-26)
-
Wakwela amwiddani (27-36)
-
Muttiye wattonga attu (37-42)
-
Waziwa elani monaga merelo awa (43-45)
-
Nyumba emagiwe pama; nyumba ehinna alsersi woliba (46-49)
6 Siku dhahi na sabuddu, Yezu wela ovira mminddani dha tirigu, anamasunza aye aroma onvula tiriguyá, amuttikittaga mmadani bagamutakuna.
2 Afarizi ena aloga dhahi: “Munkoselani dhilobo dhihinrumelihiwa siku na Sabuddu?”
3 Yezu ohawakula eraga: “Nyuwo kamunengesaga ekosile Davidi vamodha na alobwana aye, mwakanelani dala?
4 Iyene kavolowile mba mwa Mulugu, vamodha na alobwana àli na iyene baja pawu dhaperhekeliwa Mulugu, esuwene dhaharumelihiwa oja muttu-muttuvi ahili anamakutta bahi?”
5 Vina ohenjedhedha: “Mwana-muttu, Nabuya wa Sabuddu.”
6 Sabuddu nina iyene ovolowa musinagoga* oroma osunziha. Mwenemo mwahikala mulobwana dhahi waragalile nlada na mono woja.
7 Anamasunziha magano vamodha na Afarizi, andidela omwang’ana Yezu, ajedhaga wona akala agahinvulumutxa muttu siku na Sabuddu wi anfwanyena muladdu wommagedhana.
8 Vano, iyene wanziwa dhobuwelani, venevo ohiloga dhahi na mulobwana ole waragalile nladana: “Kavenya, wimele vari apa.” Iyene ovenya ohimela.
9 Yezu ohalogana dhahi: “Ddinouvuzani, Enrumelihiwa okosa na Sabuddu txini, yapama obe yabure, ovuna egumi* obe opa?”
10 Mmaleliye wawang’ana otene àlivo, iyene ohiloga na mulobwanayá: “Katapula nlada nawo.” Mutapuleliye, nladana niyamo.
11 Vano awene anyonyeya vina aroma olaganela yomukosana Yezu.
12 Siku nimodha iyene odhowa omwangoni wi alobele, wenewo omalawo omattiyu wotene amulobelelaga Mulugu.
13 Muyele vati, iyene ohakuwela anamasunza aye vina ohasakulavo 12, àvahiliye nzina na arumiwi.
14 Simoni onvahiliye nzina na Pedro, na mbalaye André, Tiago, Joau, Filipi, Bartolomeu,
15 Mateu, Tomé, Tiago mwana Alfeu na Simoni onkuweliwa “muliba ntidi,”
16 Juda mwana Tiago na Juda Iskariote odhile omuguliha.
17 Yezu otita vamwangoni vamodha na awene, ahimela vego vahali ttukuwa, venevo vahikala muttengo munddimuwa wa anamasunza aye na muttitti wa attu wadhana o Judeya, o Jeruzalemi na sidadi dha Tiro na Sidoni esuwene dhali waddamana na nyaza, adhele ovuruwana vina ovulumutxiwa viredda dhawa.
18 Masiki na abaleyá atabutxiwa na muya dhabure anvulumutxiwa.
19 Muttitti wotene wantamela omuddiginya, vowi mwa iyene mwambudduwa guru yavulumutxa otene amuddiginya.
20 Iyene ohawang’ana anamasunza aye, ohiloga:
“Ohagalala ddi nyuwo ayelegi, vowi Omwene wa Mulugu, bwenyu.
21 “Ohagalala ddi nyuwo, munna dala ovanene vowi munele orubalihiwa.
“Ohagalala ddi nyuwo, mununla ovanene vowi munele oteya.
22 Ohagalala ddi nyuwo mudhidhi wotene oniddiwenyu, ontxatxamiwenyu, onruwaniwenyu vina mugoniwa ninga attu abure mwaha wa Mwana-muttu.
23 Muhagalale esidhá dhigapadduwa, mulupe na ottaba, vowi ottuveliwa wenyu wirimu kunddimuwa-wene, ziwaní vina wi dhakakene sakosele azamani awa anamavuhulela.
24 “Ntowa nugweleni nyuwo murelile, vowi mumala wakela nipangarhazo nenyu.
25 “Ntowa nugweleni nyuwo, murubalile ovanene, vowi munele ofwanyiwa dala.
“Ntowa nugweleni nyuwo, munteya ovanene, vowi munele okubanya vina wunla.
26 “Ntowa nugweleni nyuwo mugasibiwaga na attu otene, vowi jijene ekosile azamani awa awirelaga anamavuhulela a ottambi.
27 “Mbwenyi miyo ddinouwaddelani nyuwo motene munddivuruwana: Mwakwelegevi anuwiddani, mwakoselege opama anutxigani,
28 mwarurihege abale anugwihedhani ntowa, mwalobelelege anuruwanani.
29 Ole onuvada nigugu nimodha onvahedhe nina vina, onuwakiha mukumi wawo, kumukoddihe vina ottukula dhabalo dhawo.
30 Onvahe wotene onukumbirha vina akala muttu onottukula eli yawo, omuttiye adhowena.
31 “Ottiya ejo, dhinfunenyu wi mukoseliwege na attu ena, nyuwo vina mwakoselege awene.
32 “Mugaakwelaga abale anukwelani bahi, mumpurelamo nni? Attegi vina anokosa yakakene, awene anakwela abale anakwela vina.
33 Mugaakoselaga dhapama abale anuwirelani dhapama, mumpurelamo eni? Attegi vina ankosa yakakene.
34 N’ekalelo yakakene mugàboleyaga abale anjedhelinyu wi awiyihedheni, mumpurelamo eni? Attegi vina anowaboleya attegi akwawa ajedhelaga wakela yakakene.*
35 Ottiya ejo, nyuwo mwakwelege amwiddani enyu, mukosege opama vina mboleyihege muhijedhelaga wakela yina, ottuveliwa wenyu onakale onddimuwa vina munele okuweliwa ana a Namadhulu-dhulu, vowi iyene ddwapama na abale ahintamalela vina na attu abure.
36 Mulagihegevi ttagaraga vowi Babinyu ddwa ttagaraga.
37 “Ottiya ejo, muttiye wattonga attu ena wi nyuwo vina munadhe muttongiwe; muttiye wakona ena, wi nyuwo vina munadhe mukoniwe, mulevelelegevi munele oleveleliwa.
38 Mukale anamavaha, munele ovahiwa. Munele okuttuleliwa vaguwoni venyu mpimo wowakwana, wodhala, wotxittiwa vina wotepuwa. Vowi na mpimo ompimana nyuwo, munele opimeliwana vina.”
39 Venevo ohawaddela yoladdaniha yina: “Koddi muliba ohona, onomweddiha muliba ohona mukwaye? Oheli kangwela muttoloni?
40 Namasunza kanimpitta namasunziha waye, vano agasunzihiwa pama onokala ninga namasunziha waye.
41 Weyo onang’anela nni nani nili munintoni mwa mbalawo, oku ohonaga muri oli munintoni mwawo?
42 Onwodha dhavi ologa na mbalawo, ‘Mbalaga, kaddittiye ddiburutxemo nani nili munintoni mwawo,’ oku ohonaga muri oli munintoni mwawo? Mugwarhagwambi wé! Karoma oburutxamo muri oli munintoni mwawo, dhawene onelege wona pama ogaburutxagamo nani nili munintoni mwa mbalawo.
43 “Muri wapama kumbala milima dhabure, nne muri wabure kumbala milima dhapama.
44 Muri bu muri onziweya na milima dhaye. Motagiha, enowodheya ohapa figu vamingani, obe ohapa uva vamakupuni a minga?
45 Muttu wapama omburutxa dhili dhapama mmafumoni apama a mmurimani mwaye, oku muttu wabure omburutxa dhili dhabure mmafumoni mwaye abure, vowi mulomo onloga esile dhidhalile mmurimani.
46 “Kito munddikuwelelani ‘Nabuya! Nabuya!’ Oku nyuwoyá muhivirihagamo dhinlogimi?
47 Wotene ole ondha wa miyo, ewa mazu aga, avirihamo, miyo ddinele wulagihani onliganiyena.
48 Oddo onoliganihiwa na mulobwana, amagaga nyumba yaye, otiba maleje ovaya vina amukosa alsersi vamaluguni. Vano murubwele muzogwe munddimuwa, mwinje otepuwela otakulu, ofwanya nyumbayá mbwenyi kimottile vowi yamagiwa pama.
49 Vano ole oniwa mazu aga, ahivirihamo onoligana na mulobwana omagile nyumba yaye vamutxesani ehinna alsersi. Mwinje otepuwela nyumba yaye, momaguva nyumbayá ebwanyuwa, emotta yotene.”
Manota
^ Kang’ana Mazu Atapuleliwe.
^ Obe, “onvuna muttu.”
^ Kuloga, ahijedhelaga wakela okwaranya ejile ebolihiwe.
