Dhilebiwe na Luka 7:1-50
7 Mmaleliye wawaddela attu dhilobo esi, iyene ofiya o Kafarnau.
2 Mudhari mmodha wa mwimeleli wa anyakoddo warihiwetxa na Nabuyaye, wali muredda vaddiddi ofiyedha okala nenà n’okwa.
3 Munddimuwa ole wa anyakoddo mwiwaliye mwaha wa Yezu, oharumawo anddimuwa a nlogo na Ayuda wi amukumbirhe adhe anvulumutxe mudhari waye.
4 Awene adhowa ogumana na Yezu, aroma omuttidda myeddo amunlelaga: “Iyene onofwanyela nikamihedho nenyu,
5 sabwani iyene onokwela nlogo nehu vina ddi iyene omagile sinagoga* yehu.”
6 N’eji Yezu odhowa na awene. Vano bali vakuvi na vatakuluva, mwimeleli ole wa anyakoddo oharuma akwaye na mpaganyo obu: “Nabuya kamuzuzume, miyo kaddinfwanyela ouwakelani vatakulu vaga.
7 Nona miyo kaddiwodhile oufwarelani. Mbwenyi muloge bahi, mwimeleli waga onele ovulumuwa.
8 Vowi miyo vina ddili muttu onawiwelela abale anddittonga; ddikaana anyakoddo analamulemi. Ddigaloga na mmodha, ‘Kadhowa,’ iyene onodhowa; ddigamwaddela mwina, ‘Kadhawuno,’ iyene onodha; ddigaloga na mudhari waga, ‘Kakosa eji,’ iyene onokosa.”
9 Yezu mwiwaliye dhilobo eso, otikina venjene; ozugunuwela muttittiyá wanfwara vina ohiloga: “Ddinouwaddelani, mw’Izrayel kaddinfwanyilemo muttu wa nroromelo ninddimuwa ninga oddu.”
10 Abale arumiwe mwiyelelani vatakulu anfwanyile mudhariyá bali mugumi.
11 Mmalele dhotedhene eso iyene odhowa sidadi dhahi enkuweliwa Naim, anamasunza aye vamodha na muttitti wa attu aninfwara.
12 Addamelaga musuwo wa sidadiyá, ohawona attu amuttukulelaga otakulu muttu wokwa, oddoya wali mwana-mulobwana mmodha* wa mamukwela. Vina muttitti mwinjene wa attu a musidadimwá wanninvelela.
13 Nabuya Yezu mmoneliye, omweddela ttagaraga, ohiloga: “Kamalani, kamunle.”
14 Mmaleliye osusela vàli makayá, oddiginya, anamattebayá ahimela. Venevo iyene ohiloga: “Muzombwe wé, ddinouwaddela, kavenya!”
15 Marafulayá ovenya, ogilati, oroma ologa, venevo Yezu ohimperhekela maye.
16 Otene ahova vaddiddi aroma omuttittimiha Mulugu, alogaga: “Namavuhulela munddimuwa ohoneya vari vehu” vina “Mulugu ohang’ana wili nlogo naye.”
17 Muselu obu ovuwa mu Judeya mwetemwene na mirudda dhotene dhowaddamela.
18 Venevo anamasunza a Joau amwaddela dhotedhene dhipadduwile.
19 Joau ohakuweliha anamasunza aye eli, oharuma wa Yezu wi amvuze dhahi: “Muli Ole Wafuna Odha, obe nimujedhele mwina?”
20 Mfiyedhani vàli Yezu alobwana abale, ahiloga: “Joau Batista oniruma ouvuzani, ‘Muli Ole Wafuna Odha, obe nimujedhele muttu mwina?’”
21 Mudhidhene obule ohavulumutxa enjene anna viredda dhokattamiha na avolowiwe muya dhabure vina ohafugula mento aliba ohona enjene.
22 Yezu ohawakula dhahi: “Kadhowani mwamwaddele Joau dhonilenyu na dhiwalenyu: Aliba ohona anowona, aragali anowedda, aliba maranya anovulumutxiwa, aliba ohiwa anowiwa, akwile anovenyihiwa mukwani, ayelegi anolaleyeliwa miselu dhapama.
23 Wohagalala dduddule ohinkwakwattuwa na merelo aga.”
24 Mudhoweli abale arumiwe na Joau, Yezu oroma ologa na muttitti mwaha wa Joau: “Nyuwo mwadhowile wona nni mwiddeddereni? Mwadhowile wona murere onttekenyiwa na pevo?
25 Kito mwadhowile wonamo nni? Mwadhowile omona muttu onabala guwo dhattima? Sabwani abale anabala guwo dhattima vina afumile ankala mmatakulu mwa amwene.
26 Kito mwadhowile omona ani? Mwadhowile omona namavuhulela? Txibarene miyo ddinouwaddelani, iyene onompitta namavuhulela.
27 Oddu ddule ologiwe mmaleboni wi: ‘Moone! Ddinomuruma mwanamukatti waga osogorho wawo* wi ausasanyedhe dila!’
28 Miyo ddinouwaddelani ebaribari, mwa attu otene abaliwe, kavo onimpitta Joau; mbwenyi ole oli mung’ono Mumweneni mwa Mulugu, munddimuwa ompitta iyene.”
29 (Mwiwalani eso nlogo notene vamodha na anamapitxihayá musoko, ahilaleya wi Mulugu ddoligana, vowi abatiziwe na obatizo wa Joau.
30 Vano Afarizi na anamasunziha Magano apwaza yaafunana* Mulugu, vowi kabatiziwe na Joau.)
31 “Ddinaladdanihe na eni, attu a nsaka nttino, anligana na eni?
32 Awene ali ninga aima agilatile vamusika anloga na akwawa dhahi: ‘Iyo nihuwobelani flauta, mbwenyi nyuwo kamutxettile, iyo nihikubanya nyuwo kamunlile.’
33 Yakakene vina, odha Joau Batista, ohinja pawu, ohimmwa vinyu, mbwenyi nyuwo munloga: ‘Iyene okaana domonyo.’
34 Mwana-muttu onoja vina onomwa, mbwenyi nyuwo munloga: ‘Mmone! Oddu ottabwiha oja vina omwa vinyu; akwaye ba anamapitxiha musoko na attegi!’
35 Vano zelu ya muttu enoneya na merelo otene oligana ankosiye.”
36 Mfarizi mmodha omukumbirha amudidelaga wi aje na iyene. Venevo Yezu odhowa vatakulu va Mfarizi ole, ogilati vameza.
37 Muyana dhahi, waziwiwe musidadi ninga muttegi, muziweliye wi Yezu onoja* vatakulu va Mfarizi ole ottukula garafa* mwali makura onukwela.
38 Muyanayá okokora omyeddoni wa Yezu, oroma wunla, anyettihaga manyalo aye na mintori vina akuputtaga na nttitti naye. Iyene wanbejari venjene manyalo a Yezu akuttulelaga makura onukwela.
39 Moneliye esodhá Mfarizi ole wamukuwelele vatakulu vaye, oroma ologa mmurimani mwaye: “Mulobwana oddu kokala-wene namavuhulela, agamuzinddiyela bani onimuttidda vina agahona wi muyana oddu muttegi.”
40 Nowidhawo Yezu ohiloga: “Simoni, ddikaana elobo enfunemi ouwaddela.” Iyene ohakula: “Kalogani namasunziha!”
41 “Namaboleyiha kobiri dhahi, wahaboleya alobwana eli, mmodha wamboleyile adenáriyu 500 mwina 50.
42 Vowi alobwana abale kaana yompitxela iyene ohalevelela na murima wotene. Mwa alobwana aba oheli, bani onamukweletxe venjene?”
43 Simoni omwakula dhahi: “Ddinona ninga ddule omuleveleliye kobiri dhinjene.” Yezu ohiloga: “Ohakula pama.”
44 Venevo iyene ozugunuwa omwang’ana muyanayá vina ohiloga na Simoni: “Onomona muyana oddu? Miyo ddifiya vatakulu vawo, weyo kuddivahile manje osuwana manyalo aga. Mbwenyi muyana oddu ohinyettiha manyalo aga na mintori dhaye vina okuputta na nttitti naye.
45 Weyo kuddivahile beju, mbwenyi oromana mudhidhi ofiyilemi ofiyedha ovanene, muyana oddu onobejarivi manyalo aga.
46 Weyo kukuttuleli makura onukela mmusorhoni mwaga, mbwenyi muyana oddu okuttulela makura manyalo aga.
47 Nona ddinouwaddela: Dhottega dhaye masiki dhinjivilevi* dhileveleliwa, sabwani iyene okwela venjene, mbwenyi ole onkwela vang’onovi onleveleliwa vang’onovi.”
48 Venevo Yezu ohiloga na muyanayá: “Dhottega dhawo dhileveleliwa.”
49 Àli vamodha na iyene vameza, aroma ologa oka-oka: “Mulobwanayá oddu bani, onfiyedha olevelela dhottega?”
50 Venevo, iyene ohiloga na muyanayá: “Nroromelo nawo nihuvuna; kadhowa na murenddele.”
Manota
^ Kang’ana Mazu Atapuleliwe.
^ Na egregu, “nammodha.”
^ Na egregu, “vamentoni vawo.”
^ Obe, “osogorhela wa.”
^ Obe, “ogilati vameza.”
^ Na egregu, “garafa na alabastro.” Wali muringa mung’ono wasasanyiwa na nlugu nafwanyeya waddamela sidadi ya alabastroni, w’Ejipitu.
^ Obe, ”dhinddimuwa.”
