Dhilebiwe na Marko 10:1-52
-
Otela vina omwalana (1-12)
-
Yezu onowaruriha aima (13-16)
-
Nivuzo na mulobwana worela (17-25)
-
Oleva dhilobo mwaha wa Omwene (26-31)
-
Yezu onologa dila yina mwaha wa okwa waye (32-34)
-
Yokumbirha ya Tiago na Joau (35-45)
-
Yezu operheka egumi yaye wi awobolelena enjene (45)
-
-
Ovulumutxiwa wa Bartimeu, muliba ohona (46-52)
10 Yezu ovenya venevale odhowa murudda wali waddamana na o Judeya, epaddi yina y’o Jordau, wili muttitti otugumana vàliye. Iyene oroma wasunziha dila yina ninga mwakoseliye.
2 Afarizi ena amususela Yezu afunaga omweha, ahinvuza akala yanrumelihiwa mulobwana ommwala mwadhiye.
3 Iyene ohavuza: “Mizé owaddeleni eni?”
4 Awene ahakula: “Mizé ohirumeliha wi mulobwana amvahe mwadhiye njangarha n’omwalana ngamala amusukumihe.”
5 Mbwenyi Yezu ohawakula: “Emuttukuleli Mizé oleba nlamulo ntti, ji sabwa y’ovadda wenyu murima.
6 Vano omaromelo wa dhottanddiwa ‘Iyene wattanddile mulobwana na muyana.
7 Nona mulobwana onele omuttiya babe na maye,
8 vina oheli anakale nningo nimodha,’ awene kankala vina eli, mbwenyi ali nningo nimodha.
9 Nona, emagile Mulugu, muttu katapule.”
10 Mwiyelelani vatakulu wili, anamasunza aye ahinvuza mwaha wa makani abo.
11 Iyene ohawakula: “Onimmwala mwadhiye amutela mwina, onolupa matelo amuttegelaga mwadhiyeyá,
12 vina akala muyana onomwalana na mamune, ateliwa na mulobwana mwina, onolupa matelo.”
13 Attu aroma wattukulela aima vàliye wila àtapulele mada, vano anamasunza aye annasaddeya n’owali.
14 Moneliye eso, Yezu otikina vina ohiloga: “Kaattiyeni aima adhe vali miyo, kamwakoddihe sabwani Omwene wa Mulugu bwa abale ankala ninga awene.”
15 “Ddinouwaddelani ebaribari, oddule ohinakela Omwene wa Mulugu dhahene ninga mwana, txipo kanavolowe Mumwenenimwa.”
16 Iyene ohattukula aimayá baroma waruriha, àtapulelaga mada aye.
17 Abudduwagavo mulobwana dhahi omuttamagela, okokora osogorho waye vina ohinvuza: “Namasunziha Wapama, ddikose eni wi ddakele egumi yohimala?”
18 Yezu omwakula: “Onddikuwelela eni wapama? Kawo wapama ohili mmodha bahi, Mulugu.
19 Weyo onoziwa malamuloyá: ‘Kumpe muttu, kulupe matelo, kuwiye, kuvahe onamoona wottambi, kumujele muttu, omurihe babo na mayo.’”
20 Mulobwana oddule omwakula: “Namasunziha, miyo ddinovirihamo dhotedhene eso, ovenyana muzombweni.”
21 Yezu omwang’ana, sabwa y’omukwela, omwaddela: “Enoujombela elobo modha: Odhowe wagulihe dhili dhawo, vina kobiridhá wavahe ayelegi, onele okaana nifumo wirimu, ogamala odhe okale namafwara waga.”
22 Mbwenyi iyene oribiwa murima na yowakulayá, vina odhowa wokubanyene vowi wahikana dhorela dhinjene.
23 Mmalele Yezu wang’ana oku-n’oku, ohawaddela anamasunza aye: “Enele warutxa abale anna kobiri dhinji ovolowa Mumweneni mwa Mulugu!”
24 Mbwenyi anamasunza aye atikina na dhilogiliye. Venevo Yezu ohawaddela: “Anaga, enorutxa ovolowa Mumweneni mwa Mulugu!
25 Akala enorutxa kamelo ovolowa munintoni mwa singano, yottabwetxayá ja mureli ovolowa Mumweneni mwa Mulugu.”
26 Awene atikina venjene vina ahinvuza:* “Bani onawodhe ovuneya?”
27 Yezu ohawang’ana vina ohiloga: “Mwa attu eji kinwodheya mbwenyi Mulugu onowodha, vowi mwa Mulugu dhilobo dhotedhene dhinowodheya.”
28 Pedro oroma ologa na iyene: “Moone! Iyo nittiya dhilobo dhotedhene vina nihufwarani.”
29 Yezu ohiloga: “Txibarene miyo ddinouwaddelani, kawo ottiyile nyumba yaye, abalaye, arogoriye, babe, maye, anaye, mindda sabwa ya nzina naga, vina sabwa ya miselu dhapama
30 ohinattambirhe nsaka nttino—opitta dila 100, nyumba, abali, arogora, amayi, ana, mindda na ofwara-fwariwa—vina elabo endha,* egumi yohimala.
31 Vano enjene ali oroma anele okala omariha, vina omariha anale okala oroma.”
32 Yezu wannasogorhela adhowaga dila y’o Jeruzalemi, anamasunza aye atikina, mbwenyi ena àli na iyene annova. Venevo Yezu ohapottotxa anamasunza aye 12, oroma wawaddela dháfuna ompadduwela.
33 “Kewani! Iyo nindhowa o Jeruzalemi, Mwana-muttu onele operhekiwa mmadani mwa anddimuwa a anamakutta vina mwa anamasunziha magano. Awene anele omuttongela okwa vina anele omperheka mmadani mwa attu a malogo,
34 aboyá anele ompuja, omuturela mara, ombubudda vina ompa; mbwenyi agavira masiku mararu onele ovenyihiwa mukwani.”
35 Tiago na Joau ana Zebedeu, amususela vina amwaddela: “Namasunziha, ninfuna wila munikosele enfunihu oukumbirhani.”
36 Iyene ohavuza: “Munfuna wi miyo ddukoseleni eni?”
37 Awene amwakula: “Munirumelihe ogilati na nyuwo mwina omononi wenyu woja, mwina omononi wenyu wemara, Mumweneni mwenyu”
38 Yezu ohawaddela: “Nyuwo kamunziwa enkumbirhenyu. Munowodha omwa kalisi emmwa miyo vina obatiziwa na obatizo onabatiziwemina?”
39 Awene amwakula: “Ninowodha.” Vano Yezu ohawiyedha: “Nyuwo munele omwa kalisi enamwe miyo, vina obatiziwa na obatizo onabatiziwemina;
40 mbwenyi, kahiyo miyo onimuttoma ole onagilati omononi waga woja peno omononi waga wemara, vowi mimburo eso anya babale asakuliwe.”
41 Ena kumi mwiwalani makani aba, atikina na Tiago vina na Joau.
42 Vano Yezu ohakuwela anamasunza aye otene vina ohawaddela: “Nyuwo munoziwa wi abale analamulela attu a malogo, anovikosiha anya a abale analamulelani, anddimuwa, anolabihedha onddimuwa wawa wi atabutxena attu.
43 Vano nyuwo kamukosege dhawene, onfuna okala ninga munddimuwayá akale mudhari wa ena,
44 vina onfuna okala woromayá vari venyu, akale mudhari wa otene.
45 Vowi Mwana-muttu, kadhele olabiwa, mbwenyi odhele olaba vina operheka egumi yaye wi awobolelena attu enjene.”
46 Yezu na anamasunza aye afiya o Jerikó. Mbwenyi awene vamodha na muttitti mwinjene wa attu abudduwaga o Jerikó ahinfwanya namakumbirha esmola wohona, wakuweliwa Bartimeu (mwana wa Timeu), bagilatile nikome na rampa.
47 Mwiwaliye wi Yezu Munazareti onovira vakuvi, oroma okuwa eraga: “Mwana Davidi, Yezu, muddeddele ttagaraga!”
48 Venevo enjene aroma omusaddeya, ammalihaga, mbwenyi iyene wankuwavi eraga: “Mwana Davidi, muddeddele ttagaraga!”
49 Venevo Yezu ohimela vina ohiloga: “Kamukuweleni.” Amukuwela muliba ohonayá, amwaddela “Kaliba murima! Kavenya, iyene onoukuwela.”
50 Iyene orayila mukumi waye, ovenya momaguva vina odhowa vàli Yezu.
51 Yezu ohinvuza: “Weyo onfuna wi miyo ddukosele eni?” Muliba ohonayá omwakula: “Raboni,* kaddikamihedheni wiyelela wona.”
52 Yezu omwakula: “Kadhowa. Nroromelo nawo niuvulumutxa.” Momaguva-mwene ohiyelela wona vina oroma omfwara.
Manota
^ Obe txino, “anvuzana muttu na mukwaye.”
^ Obe, “nsaka.” Kang’ana Mazu Atapuleliwe.
^ Entapulela, “Namasunziha.”
