Dhilebiwe na Marko 11:1-33
11 Awene addamelaga o Jeruzalemi, o Betfajé vina o Betánia Omwangoni wa Olivera, Yezu oharuma anamasunza aye eli
2 vina ohawaddela: “Mudhowe murudda oli osogorho wenyu, mugafiyawo munonfwanya mwana-buru omageleliwe, ohinaweliwaga. Mmutapule vina mudhena okuno.
3 Muttu agauvuzani, ‘Munimutapulela nni?’ Muloge, ‘Nabuya ddinimutamela, n’eji munottiyiwa odhana.’”
4 Dhahene adhowa vina ahinfwanya mwana-buruyá bamageleliwe otakulu na musuwo, waddamela na rampa, amutapula.
5 Vano ena àlivo ahavuza: “Munkosavo eni, munimutapulela nni mwana-buruyá?”
6 Ahawakula alogaga dhaddeliwani na Yezu, n’eji awene attiyiwa odhowa.
7 Awene amudhelana Yezu mwana-buruyá, attanika guwo dhawa vina Yezu omugilatela.
8 Ena anttanika guwo dhawa mudila, oku ena atadelagamo makupu endani muddebe.
9 Attu àli osogorho waye na àli mundduni mwaye ankuwa eraga: “Ninoulobani, kanvuneni! Worurihiwa ddule ondha na nzina na Yehova.
10 Mulugu arurihe Omwene onadhe wa babihu Davidi, ninoulobani nyuwo munkala wirimu, kanvuneni!”
11 Yezu ofiya o Jeruzalemi vina ovolowa mumparhani, ohang’ana dhotene dhalimo, mbwenyi vowi vati vahiriba, obudduwa vamodha na arumiwi aye Kumi na Eli adhowa o Betánia.
12 Mmangwananimwá adhaga o Betánia okaliwa dala.
13 Wolapela-wene ohona mfigera wanna mataba, odhowa wona akala agahifwanyamo elobo. Mbwenyi mfiyedhiye kafwanyilemo elo, ahili mataba, sabwani kanali nsaka na figu.
14 Venevo Yezu ohilogela mfigerayá dhahi: “Ahikalewo vina muttu onaje milima dhawo.” Anamasunza aye ahiwa mazu abo.
15 Mfiyedhani o Jeruzalemi, Yezu ovolowa mumparhani, oroma wattamagiha agulihamo vina agula, orayila meza a anamatxinja kobiri na mipaddo dha abale aguliha kangayiwa.
16 Vina kamuttiya muttu ovira mumparhani battukulile elobo.
17 Iyene wannasunziha vina wannawaddela: “Kilebiwe wi, ‘Nyumba yaga enakuweliwege nyumba ya malobelo a attu a malogo otene’? Vano nyuwo musaddula jikala nyumba ya ambava.”
18 Anddimuwa a anamakutta na anamasunziha magano mwiwalani eso, aroma otamela marhe a ompana vowi annimova, mbwenyi muttitti wotene wantikina na masunziho aye.
19 Muribele vati, ahibudduwamo musidadimwa.
20 Mmembesinimwá, aviraga vàli mfigerayá ahona wi ohuma wetene na mitxitxidha.
21 Pedro ohubuwela vina ohiloga: “Rabi, kang’anani! mfigera obu ogwihedhinyu ntowa, ohuma.”
22 Yezu omwakula: “Mmuroromele Mulugu.
23 Ddinouwaddelani ebaribari, onloga na mwango obu, ‘Kabwanyuwa odhowe wavivokele mbara,’ ahaganyedhaga mmurimani mwaye, mbwenyi aroromela wi elogiliye enele opadduwa, enopadduwa dhawene.
24 Nona ddinouwaddelani: Dhotene dhinkumbirenyu munlobeloni muroromelaga wi muhakela, nyuwo munele wakela-wene.
25 Vina mugalobelaga owimelene, mulevelele dhilobo dhotedhene dhireliwenyu, wi Babinyu oli wirimu auleveleleni vina dhovonya dhenyu.”
26 * ——
27 Afiya wili o Jeruzalemi, oku iyene eddaga mumparhani, anddimuwa a anamakutta, anamasunziha magano na anddimuwa a nlogo àdha
28 vina ahinvuza dhahi: “Na owodha gani onkosinyuna esidhá? Vina ouvahileni owodhawa bani?”
29 Yezu ohawakula dhahi: “Miyo vina ddikaana y’ouvuzani. Kaddakuleni, vina miyo ddinele ouwaddelani na owodha gani onkosimina esidhá.
30 Batismu ya Joau, yali ya wirimu obe ya attu? Kaddakuleni.”
31 Awene aroma wubuwela oka-oka alogaga: “Iyo nigaloga, ‘Ya wirimu,’ iyene ononivuza, ‘Kito mukoddele nni omuroromela?’
32 Vano, nitagiheni ologa wi: ‘Ya attu’?” Awene annova muttitti wa attu, vowi attuyá abo amona Joau ninga namavuhulela.
33 N’eji awene amwakula Yezu: “Kaninziwa.” Yezu ohalogana: “Miyo vina kaddinauwaddeleni na owodha gani onkosimina esidhá.”
Manota
^ Versikulu eji enofwanyeya mmaBibiliani meena, mbwenyi mmapapini awale okuluveleya kinfwanyeyamo.
