Dhilebiwe na Marko 13:1-37
13 Yezu abudduwaga mumparhani, namasunza waye mmodha omususela, omwaddela: “Namasunziha, moone! Okoddela wa malugu aba na nyumba esi.”
2 Venevo, Yezu ohimwaddela dhahi: “Kunowona nyumba esi dhinddimuwa? Apa kavanahale nlugu vadhulu va nlugu nina nihinatolotxiwe.”
3 Mugilateliye vamwangoni wa Olivera, ang’anaga mparha, Pedro, Tiago, Joau vina André ahinvuza vawa-vene:
4 “Munaddele: Nsaka gani ninapadduwe dhilobo esi vina ezinddiyelo gani enonihe wi dhotedhene dhinfuna ofiya omagomo?”
5 Venevo Yezu oroma wawaddela: “Mukale txenjewa wila ahikalewo onaunyengetteni.
6 Enjene anele odha na nzina naga alogaga, ‘Ddi miyo,’ vina anele wanyengetta attu enjene.
7 Ottiya ejo, mugewa miselu dhinloga dha koddo mmimburoni dhottiyana-ttiyana, kamutxutxeye, enofuneya esodhá opadduwa, mbwenyi kahiyo ogoma wa elabo.
8 “Vowi nlogo ninele owana na nlogo nina, omwene na omwene mwina; onele okala ottekenyeya wa mattaka mmimburoni dhottiyana-ttiyana; ottiya ejo onele okala orameya wa dhoja. Dhilobo esi, dhinoniha wi omaromo wa goyi.*
9 “Nyuwo mukale txenjewa. Attu anele wuttukulelani mmatribunalini mwawa, munele obubuddiwa mmasinagoga,* munele ottukuleliwa vamentoni va agovernador vina va amwene sabwa yaga, wi mwavahe onamoona awene.
10 Voroma-vene, attu a malogo otene anele olaleyiwa miselu dhapama.
11 Mugattukuliwa wi muperhekiwe, kamuzuzume na enfunenyu ologa, mbwenyi muloge enobuwelihiwenyu mudhidhene obo, sabwani onloga kahiyo nyuwo, bu muya wokoddela.
12 Ottiya ejo, abali anele opana abalivi, babi onele ompa mwanaye, aima anele wasadduwela amambalawa ofiyedha wapiha.
13 Nyuwo munele widdiwa na attu otene sabwa ya nzina naga. Mbwenyi ole onavilele mpaka omagomo ddinavuneye.
14 “Nona, mugona elobo yonyakuwa entota masoso, bili mburo wahafwanyelani okala (ole onengesa atamele ononelamo), venevo abale ali mu Judeya, attawele omyangoni.
15 Muttu oli vadhulu va nyumba,* katite nne kavolowe mba wi attukule elobo,
16 vina muttu oli omundda keyele wi attukule mukumi waye.
17 Goyi dhinele wattabwela ayana anakane yari vina anamwihege nsaka-nene ntto!
18 Mudidele olobela wi esidhá dhinapadduwe nsaka n’oridha,
19 vowi masiku abo, anakale masiku a goyi ehinoneyaga oromana mupaddutxele Mulugu elabo ofiyedha masaka abano, nne kinoneye vina.
20 Txibarene, Yehova kohivugula masiku abo, kavo nne mmodha agavuneyile. Mbwenyi sabwa ya abale asakuliwe, abale àsakuliliye, ohivugula masikuyá.
21 “Vano, akala muttu onouwaddelani eraga, ‘Mmone! Kristu oli veneva,’ obe ‘Mmone! Oli apale,’ kammurumele.
22 Vowi anele witeya Akristu a ottambi na anamavuhulela a ottambi, anakose vizinddiyelo na matikiniho menjene wi àpupurutxena attu, egawodheya na abaleyá asakuliwe.
23 Nona mukale txenjewa. Miyo ddihuwaddelani dhotedhene mutanene.
24 “Mbwenyi masiku abo, goyi egavira, nzuwa ninele ottima, mweri kunamoneyege,
25 vineneri dhinele omotta wirimu vina guru dhili wirimuwá dhinele ottekenyeya.
26 Venevo, anele omona Mwana-muttu adhaga mmiraboni na owodha onddimuwa vina na nttittimiho.
27 Iyene onele waruma anju aye, awene anele watugumaniha otene asakuliwe, anfwanyeya dhipaddi dhonayi* dha elabo, oromana komo ya elabo mpaka komo ya wirimu.
28 “Kasunzani na yoladdaniha ya mfigera: Virasidhá dhigaroma opweta mataba maswa, munoziwa wi elimwe eli vakuvi.
29 Yakakene vina, mugona dhilobo esi dhipadduwaga, muziwe wi iyene* oli vakuvi, vamusuwo.
30 Ddinouwaddelani ebaribari, attu a nsaka nttino kanafiyedhe omala dhilobo esi dhotedhene dhihinatti opadduwa.
31 Erimu na elabo dhinele ovira, mbwenyi mazu aga txipo kanavire.
32 “Vano siku ntto vina mudhidhi obo kawo onziwa, nne anju a wirimu, nne Mwana, mbwenyi onziwa ddi Baba.
33 Mukale txenjewa vina ovyang’anelene vowi kamunziwa nsaka nipimeleliwe.
34 Enoligana na mulobwana mmodha wafuna okosa oleddo wolapela, ahinatti ovenyavo ohattiyedha adhari aye mabasa, muttu-muttu na mabasa aye, vina omwaddela mwang’aneli wa vamusuwo wi akale txenjewa.
35 Nona mukale txenjewa, vowi kamunziwa mudhidhi onadhe mwinya wa vatakuluva, peno txiguwo vati vahinariba, peno vari va mattiyu, peno vati vahinaya,* obe membesi,
36 wi iyene agadha morurumutxa anaufwanyeni mugonaga.
37 Dhinuwaddelani miyo, ddinowawaddela attu otene: Mukale txenjewa.”
Manota
^ Enoladdanihiwa na wiwa opa wa muyana ofiyedhiwe mudhidhi waye wobala.
^ Kang’ana Mazu Atapuleliwe.
^ Nyumba dhinjene vadhuluva vanttiddiwa mabasa ottiyana-ttiyana.
^ Na egregu, “komo nayi.”
^ Kuloga, Mwana-muttu.
^ Na egregu, “mitubi dhigaroma wunla.”
